Paṭhamapaṇṇāsaka
Samacittavagga
34. 72 “Dvinnāhaṁ, bhikkhave, na suppatikāraṁ vadāmi. Katamesaṁ dvinnaṁ? Mātu ca pitu ca. Ekena, bhikkhave, aṁsena mātaraṁ parihareyya, ekena aṁsena pitaraṁ parihareyya vassasatāyuko vassasatajīvī so ca nesaṁ ucchādanaparimaddananhāpanasambāhanena. Te ca tattheva muttakarīsaṁ cajeyyuṁ, na tveva, bhikkhave, mātāpitūnaṁ kataṁ vā hoti paṭikataṁ[37] vā. Imissā ca, bhikkhave, mahāpathaviyā pahūtarattaratanāya[38] mātāpitaro issarādhipacce rajje patiṭṭhāpeyya, na tveva, bhikkhave, mātāpitūnaṁ kataṁ vā hoti paṭikataṁ vā. Taṁ kissa hetu? Bahukārā[39], bhikkhave, mātāpitaro puttānaṁ āpādakā posakā imassa lokassa dassetāro. Yo ca kho, bhikkhave, mātāpitaro assaddhe saddhāsampadāya samādapeti niveseti patiṭṭhāpeti, dussīle sīlasampadāya samādapeti niveseti patiṭṭhāpeti, maccharī cāgasampadāya samādapeti niveseti patiṭṭhāpeti, duppaññe paññāsampadāya samādapeti niveseti patiṭṭhāpeti, ettāvatā kho, bhikkhave, mātāpitūnaṁ katañca hoti paṭikatañcā”ti. [40]
- paṭikataṁ: patikataṁ (sī) (Word Variant) ↩
- pahūtarattaratanāya: pahūtasattaratanāya (sī, syā1-3, kaṃ, pā1) tikanipāte mahāvagge dasamasuttaṭīkāyaṁ dassitapāḷiyā (Word Variant) ↩
- Bahukārā: bahūkārā (sī), bahupakārā (syā1, syā2), bahūpakārā (syā3, ka-ma) (Word Variant) ↩
- paṭikatañcā"ti: patikatañca atikatañcāti (sī, pā1) (Word Variant) ↩