Bhikkhuvagga
Goliyānisutta
173. 466 [209] Evaṁ me sutaṁ— ekaṁ samayaṁ bhagavā rājagahe viharati veḷuvane kalandakanivāpe. Tena kho pana samayena goliyāni[210] nāma bhikkhu āraññiko[211] padasamācāro[212] saṁghamajjhe osaṭo hoti kenacideva karaṇīyena. Tatra kho āyasmā sāriputto goliyāniṁ bhikkhuṁ ārabbha bhikkhū āmantesi—
467 “Āraññikenāvuso, bhikkhunā saṁghagatena saṁghe viharantena sabrahmacārīsu sagāravena bhavitabbaṁ sappatissena. Sace, āvuso, āraññiko bhikkhu saṁghagato saṁghe viharanto sabrahmacārīsu agāravo hoti appatisso, tassa[213] bhavanti vattāro. ‘Kiṁ panimassāyasmato āraññikassa ekassāraññe serivihārena, yo ayamāyasmā sabrahmacārīsu agāravo hoti appatisso’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena sabrahmacārīsu sagāravena bhavitabbaṁ sappatissena. (1)
468 Āraññikenāvuso, bhikkhunā saṁghagatena saṁghe viharantena āsanakusalena bhavitabbaṁ— ‘iti there ca bhikkhū nānupakhajja nisīdissāmi nave ca bhikkhū na āsanena paṭibāhissāmī’ti. Sace, āvuso, āraññiko bhikkhu saṁghagato saṁghe viharanto na āsanakusalo hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena, yo ayamāyasmā āsanakusalo na hotī’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena āsanakusalena bhavitabbaṁ. (2) [214]
469 Āraññikenāvuso, bhikkhunā saṁghagatena saṁghe viharantena ābhisamācārikopi dhammo jānitabbo[215]. Sace, āvuso, āraññiko bhikkhu saṁghagato saṁghe viharanto ābhisamācārikampi dhammaṁ na jānāti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā ābhisamācārikampi dhammaṁ na jānātī’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena ābhisamācārikopi dhammo jānitabbo. (3)
470 Āraññikenāvuso, bhikkhunā saṁghagatena saṁghe viharantena nātikālena gāmo pavisitabbo nātidivā[216] paṭikkamitabbaṁ. Sace, āvuso, āraññiko bhikkhu saṁghagato saṁghe viharanto atikālena gāmaṁ pavisati atidivā paṭikkamati, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā atikālena gāmaṁ pavisati atidivā paṭikkamatī’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena nātikālena gāmo pavisitabbo, nātidivā paṭikkamitabbaṁ. (4)
471 Āraññikenāvuso, bhikkhunā saṁghagatena saṁghe viharantena na purebhattaṁ pacchābhattaṁ kulesu cārittaṁ āpajjitabbaṁ. Sace, āvuso, āraññiko bhikkhu saṁghagato saṁghe viharanto purebhattaṁ pacchābhattaṁ kulesu cārittaṁ āpajjati, tassa bhavanti vattāro. ‘Ayaṁ nūnimassāyasmato āraññikassa ekassāraññe serivihārena viharato vikālacariyā bahulīkatā, tamenaṁ saṁghagatampi samudācaratī’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena na purebhattaṁ pacchābhattaṁ kulesu cārittaṁ āpajjitabbaṁ. (5)
472 Āraññikenāvuso, bhikkhunā saṁghagatena saṁghe viharantena anuddhatena bhavitabbaṁ acapalena. Sace, āvuso, āraññiko bhikkhu saṁghagato saṁghe viharanto uddhato hoti capalo, tassa bhavanti vattāro. ‘Idaṁ nūnimassāyasmato āraññikassa ekassāraññe serivihārena viharato uddhaccaṁ cāpalyaṁ bahulīkataṁ, tamenaṁ saṁghagatampi samudācaratī’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena anuddhatena bhavitabbaṁ acapalena. (6)
473 Āraññikenāvuso, bhikkhunā saṁghagatena saṁghe viharantena amukharena bhavitabbaṁ avikiṇṇavācena. Sace, āvuso, āraññiko bhikkhu saṁghagato saṁghe viharanto mukharo hoti vikiṇṇavāco, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā mukharo vikiṇṇavāco’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena amukharena bhavitabbaṁ avikiṇṇavācena. (7)
474 Āraññikenāvuso, bhikkhunā saṁghagatena saṁghe viharantena suvacena[217] bhavitabbaṁ kalyāṇamittena. Sace, āvuso, āraññiko bhikkhu saṁghagato saṁghe viharanto dubbaco hoti pāpamitto, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā dubbaco pāpamitto’ti— tassa bhavanti vattāro. Tasmā āraññikena bhikkhunā saṁghagatena saṁghe viharantena suvacena bhavitabbaṁ kalyāṇamittena. (8)
475 Āraññikenāvuso, bhikkhunā indriyesu guttadvārena bhavitabbaṁ. Sace, āvuso, āraññiko bhikkhu indriyesu aguttadvāro hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā indriyesu aguttadvāro’ti— tassa bhavanti vattāro. Tasmā āraññikena bhikkhunā indriyesu guttadvārena bhavitabbaṁ. (9)
476 Āraññikenāvuso, bhikkhunā bhojane mattaññunā bhavitabbaṁ. Sace, āvuso, āraññiko bhikkhu bhojane amattaññū hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā bhojane amattaññū’ti— tassa bhavanti vattāro. Tasmā āraññikena bhikkhunā bhojane mattaññunā bhavitabbaṁ. (10)
477 Āraññikenāvuso, bhikkhunā jāgariyaṁ anuyuttena bhavitabbaṁ. Sace, āvuso, āraññiko bhikkhu jāgariyaṁ ananuyutto hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā jāgariyaṁ ananuyutto’ti— tassa bhavanti vattāro. Tasmā āraññikena bhikkhunā jāgariyaṁ anuyuttena bhavitabbaṁ. (11)
478 Āraññikenāvuso, bhikkhunā āraddhavīriyena bhavitabbaṁ. Sace, āvuso, āraññiko bhikkhu kusīto hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā kusīto’ti— tassa bhavanti vattāro. Tasmā āraññikena bhikkhunā āraddhavīriyena bhavitabbaṁ. (12)
479 Āraññikenāvuso, bhikkhunā upaṭṭhitassatinā bhavitabbaṁ. Sace, āvuso, āraññiko bhikkhu muṭṭhassatī hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā muṭṭhassatī’ti— tassa bhavanti vattāro. Tasmā āraññikena bhikkhunā upaṭṭhitassatinā bhavitabbaṁ. (13)
480 Āraññikenāvuso, bhikkhunā samāhitena bhavitabbaṁ. Sace, āvuso, āraññiko bhikkhu asamāhito hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā asamāhito’ti— tassa bhavanti vattāro. Tasmā āraññikena bhikkhunā samāhitena bhavitabbaṁ. (14)
481 Āraññikenāvuso, bhikkhunā paññavatā bhavitabbaṁ. Sace, āvuso, āraññiko bhikkhu duppañño hoti, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā duppañño’ti— tassa bhavanti vattāro. Tasmā āraññikena bhikkhunā paññavatā bhavitabbaṁ. (15)
482 Āraññikenāvuso, bhikkhunā abhidhamme abhivinaye yogo karaṇīyo. Santāvuso, āraññikaṁ bhikkhuṁ abhidhamme abhivinaye pañhaṁ pucchitāro. Sace, āvuso, āraññiko bhikkhu abhidhamme abhivinaye pañhaṁ puṭṭho na sampāyati, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā abhidhamme abhivinaye pañhaṁ puṭṭho na sampāyatī’ti— tassa bhavanti vattāro. Tasmā āraññikena bhikkhunā abhidhamme abhivinaye yogo karaṇīyo. (16)
483 Āraññikenāvuso, bhikkhunā ye te santā vimokkhā atikkamma rūpe āruppā tattha yogo karaṇīyo. Santāvuso, āraññikaṁ bhikkhuṁ ye te santā vimokkhā atikkamma rūpe āruppā tattha pañhaṁ pucchitāro. Sace, āvuso, āraññiko bhikkhu ye te santā vimokkhā atikkamma rūpe āruppā tattha pañhaṁ puṭṭho na sampāyati, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā ye te santā vimokkhā atikkamma rūpe āruppā tattha pañhaṁ puṭṭho na sampāyatī’ti— tassa bhavanti vattāro. Tasmā āraññikena bhikkhunā ye te santā vimokkhā atikkamma rūpe āruppā tattha yogo karaṇīyo. (17)
484 Āraññikenāvuso, bhikkhunā uttari manussadhamme yogo karaṇīyo. Santāvuso, āraññikaṁ bhikkhuṁ uttari manussadhamme pañhaṁ pucchitāro. Sace, āvuso, āraññiko bhikkhu uttari manussadhamme pañhaṁ puṭṭho na sampāyati, tassa bhavanti vattāro. ‘Kiṁ panimassāyasmato āraññikassa ekassāraññe serivihārena yo ayamāyasmā yassatthāya pabbajito tamatthaṁ na jānātī’ti— tassa bhavanti vattāro. Tasmā āraññikena bhikkhunā uttari manussadhamme yogo karaṇīyo”ti. (18)
485 Evaṁ vutte, āyasmā mahāmoggallāno[218] āyasmantaṁ sāriputtaṁ etadavoca— “āraññikeneva nu kho, āvuso sāriputta, bhikkhunā ime dhammā samādāya vattitabbā udāhu gāmantavihārināpī”ti? “Āraññikenāpi kho, āvuso moggallāna, bhikkhunā ime dhammā samādāya vattitabbā pageva gāmantavihārinā”ti.
486 Goliyānisuttaṁ[219] niṭṭhitaṁ navamaṁ.
- gulissānisuttaṁ (sī), golissānisuttaṁ (syā1-3) (Word Variant) ↩
- goliyāni: gulissāni (sī, pā1), golissāni (syā1-3, kaṃ) (Word Variant) ↩
- āraññiko: āraññako (sabbattha) (Word Variant) ↩
- padasamācāro: padarasamācāro (sī, syā1-3, kaṃ, pā1) (Word Variant) ↩
- tassa: appatissotissa (sī, pā1) (Word Variant) ↩
- hotī'ti: yo ayamāyasmā ābhisamācārikampi dhammaṁ na jānātītissa (sī), yo ayamāyasmā ābhisamācārikampi dhammaṁ na jānātīti (syā1, kaṃ), yo ayamāyasmā abhisamācārikampi dhammaṁ na jānātīti (syā2, syā3), yo ayamāyasmā abhisamācārikampi dhammaṁ na jānāti tissa (pā1) (Word Variant) ↩
- jānitabbo: ayaṁ ābhisamācārikatatiyavāro sī, syā1-3, kaṃ, pā1 potthakesu na (Word Variant) ↩
- nātidivā: na divā (syā1-3, kaṃ, pā1, ka-ma) (Word Variant) ↩
- suvacena: subbacena (sī, ka-ma) (Word Variant) ↩
- mahāmoggallāno: mahāmoggalāno (ka-ma) (Word Variant) ↩
- Goliyānisuttaṁ: gulissānisuttaṁ (sī), golissānisuttaṁ (syā1-3), gulissānisuttantaṁ (pā1) (Word Variant) ↩