3.3.6 Garudhammajātaka

76.

774 “Tava saddhañca sīlañca,

viditvāna janādhipa;

Vaṇṇaṃ añjanavaṇṇena,

kāliṅgasmiṃ nimimhase”.

77.

775 “Annabhaccā cabhaccā ca,

yodha uddissa gacchati;

Sabbe te appaṭikkhippā,

pubbācariyavaco idaṃ.

78.

776 Dadāmi vo brāhmaṇā nāgametaṃ,

Rājārahaṃ rājabhoggaṃ yasassinaṃ;

Alaṅkataṃ hemajālābhichannaṃ,

Sasārathiṃ gacchatha yena kāman”ti.

777 Garudhammajātakaṃ chaṭṭhaṃ.