Tipitaka2500tipitaka2500.github.io

1.1 Sumedhātherīapadāna

1.1. สุเมธาเถรีอปทาน

Sumedhāvagga

Sumedhātherīapadāna

195. 2 Atha therikāpadānāni suṇātha—

1. 3 [1] “Bhagavati koṇāgamane,
Saṁghārāmamhi navanivesanamhi[2];
Sakhiyo tisso janiyo,
Vihāradānaṁ adāsimha.

2. 4 Dasakkhattuṁ satakkhattuṁ[3],
Dasasatakkhattuṁ satānañca satakkhattuṁ;
Devesu upapajjimha,
Ko vādo mānuse bhave.

3. 5 Deve mahiddhikā ahumha,
mānusakamhi ko vādo;
Sattaratanamahesī,
itthiratanaṁ ahaṁ bhaviṁ. [4]

4. 6 Idha sañcitakusalā[5],
susamiddhakulappajā;
Dhanañjānī ca khemā ca,
ahampi ca tayo janā.

5. 7 Ārāmaṁ sukataṁ katvā,
sabbāvayavamaṇḍitaṁ;
Buddhappamukhasaṁghassa,
niyyādetvā samoditā.

6. 8 Yattha yatthūpapajjāmi,
tassa kammassa vāhasā;
Devesu aggataṁ pattā,
manussesu tatheva ca.

7. 9 Imasmiṁyeva kappamhi,
brahmabandhu mahāyaso;
Kassapo nāma gottena,
uppajji vadataṁ varo.

8. 10 Upaṭṭhāko mahesissa,
tadā āsi narissaro;
Kāsirājā kikī nāma,
bārāṇasipuruttame.

9. 11 Tassāsuṁ satta dhītaro,
rājakaññā sukhedhitā[6];
Buddhopaṭṭhānaniratā,
brahmacariyaṁ cariṁsu tā.

10. 12 Tāsaṁ sahāyikā hutvā,
sīlesu susamāhitā;
Datvā dānāni sakkaccaṁ,
agāreva vataṁ[7] cariṁ.

11. 13 Tena kammena sukatena,
cetanāpaṇidhīhi ca;
Jahitvā mānusaṁ dehaṁ,
tāvatiṁsūpagā ahaṁ.

12. 14 Tato cutā yāmamagaṁ[8],
tatohaṁ tusitaṁ gatā;
Tato ca nimmānaratiṁ,
vasavattipuraṁ tato.

13. 15 Yattha yatthūpapajjāmi,
puññakammasamohitā;
Tattha tattheva rājūnaṁ,
mahesittamakārayiṁ.

14. 16 Tato cutā manussatte,
rājūnaṁ cakkavattinaṁ;
Maṇḍalīnañca rājūnaṁ,
mahesittamakārayiṁ.

15. 17 Sampattimanubhotvāna,
devesu mānusesu ca;
Sabbattha sukhitā hutvā,
nekajātīsu saṁsariṁ.

16. 18 So hetu ca so pabhavo,
Tammūlaṁ sāsane khamaṁ[9];
Paṭhamaṁ taṁ samodhānaṁ,
Taṁ dhammaratāya nibbānaṁ[10].

17. 19 Kilesā jhāpitā mayhaṁ,
bhavā sabbe samūhatā;
Nāgīva bandhanaṁ chetvā,
viharāmi anāsavā.

18. 20 Svāgataṁ vata me āsi,
buddhaseṭṭhassa santike;
Tisso vijjā anuppattā,
kataṁ buddhassa sāsanaṁ. [11]

19. 21 Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.

22 Itthaṁ sudaṁ sumedhā bhikkhunī imā gāthāyo abhāsitthāti.

23 Sumedhātheriyāpadānaṁ paṭhamaṁ.

  1. 19Th2.450/1 (279 piṭṭhe) (Cross Reference) ↩
  2. navanivesanamhi: navanivesamhi (sī, pā1), nivesamhi (syā2, syā3) (Word Variant) ↩
  3. satakkhattuṁ: satāni ca sattakkhattuṁ (ka-ma) (Word Variant) ↩
  4. Sattaratanamahesī: sattaratanassa mahesī (sī, syā2, syā3, pā1) (Word Variant) ↩
  5. sañcitakusalā: tattha sañcitaṁ kusalaṁ (syā2, syā3), idha sañcitā kusalaṁ (pā1) (Word Variant) ↩
  6. sukhedhitā: sukhe ṭhitā (syā2, syā3, pā1) (Word Variant) ↩
  7. vataṁ: agāreva vattaṁ (syā2, syā3) (Word Variant) ↩
  8. yāmamagaṁ: yāmāsaggaṁ (syā2, syā3) (Word Variant) ↩
  9. khamaṁ: tammūlaṁ sā ca sāsane khanti (sī, ka-ma), taṁ mūlaṁ sā ca sāsane khanti (pā1) (Word Variant) ↩
  10. nibbānaṁ: nibbutaṁ (syā2, syā3) (Word Variant) ↩
  11. buddhaseṭṭhassa: mama buddhassa (pā1, cha1) (Word Variant) ↩