Bhaddālivagga

Yāgudāyakattheraapadāna

149.

5412 “Atithiṃ me gahetvāna,

agacchiṃ gāmakaṃ tadā;

Sampuṇṇanadikaṃ disvā,

saṃghārāmaṃ upāgamiṃ.

150.

5413 Āraññakā dhutadharā,

jhāyino lūkhacīvarā;

Vivekābhiratā dhīrā,

saṃghārāme vasanti te.

151.

5414 Gati tesaṃ upacchinnā,

suvimuttāna tādinaṃ;

Piṇḍāya te na gacchanti,

oruddhanaditāya hi.

152.

5415 Pasannacitto sumano,

vedajāto katañjalī;

Taṇḍulaṃ me gahetvāna,

yāgudānaṃ adāsahaṃ.

153.

5416 Pañcannaṃ yāguṃ datvāna,

pasanno sehi pāṇibhi;

Sakakammābhiraddhohaṃ,

tāvatiṃsamagacchahaṃ.

154.

5417 Maṇimayañca me byamhaṃ,

nibbatti tidase gaṇe;

Nārīgaṇehi sahito,

modāmi byamhamuttame.

155.

5418 Tettiṃsakkhattuṃ devindo,

devarajjamakārayiṃ;

Tiṃsakkhattuṃ cakkavattī,

mahārajjamakārayiṃ.

156.

5419 Padesarajjaṃ vipulaṃ,

gaṇanāto asaṅkhiyaṃ;

Devaloke manusse vā,

anubhotvā sayaṃ ahaṃ.

157.

5420 Pacchime bhave sampatte,

pabbajiṃ anagāriyaṃ;

Saha oropite kese,

sabbaṃ sampaṭivijjhahaṃ.

158.

5421 Khayato vayato cāpi,

sammasanto kaḷevaraṃ;

Pure sikkhāpadādānā,

arahattamapāpuṇiṃ.

159.

5422 Sudinnaṃ me dānavaraṃ,

vāṇijjaṃ sampayojitaṃ;

Teneva yāgudānena,

pattomhi acalaṃ padaṃ.

160.

5423 Sokaṃ pariddavaṃ byādhiṃ,

darathaṃ cittatāpanaṃ;

Nābhijānāmi uppannaṃ,

yāgudānassidaṃ phalaṃ.

161.

5424 Yāguṃ saṃghassa datvāna,

puññakkhette anuttare;

Pañcānisaṃse anubhomi,

aho yāgusuyiṭṭhatā.

162.

5425 Abyādhitā rūpavatā,

khippaṃ dhammanisantitā;

Lābhitā annapānassa,

āyu pañcamakaṃ mama.

163.

5426 Yo koci vedaṃ janayaṃ,

saṃghe yāguṃ dadeyya so;

Imāni pañca ṭhānāni,

paṭigaṇheyya paṇḍito.

164.

5427 Karaṇīyaṃ kataṃ sabbaṃ,

bhavā ugghāṭitā mayā;

Sabbāsavā parikkhīṇā,

natthi dāni punabbhavo.

165.

5428 So ahaṃ vicarissāmi,

gāmā gāmaṃ purā puraṃ;

Namassamāno sambuddhaṃ,

dhammassa ca sudhammataṃ.

166.

5429 Tiṃsakappasahassamhi,

yaṃ dānamadadiṃ tadā;

Duggatiṃ nābhijānāmi,

yāgudānassidaṃ phalaṃ.

167.

5430 Kilesā jhāpitā mayhaṃ,

…pe…

viharāmi anāsavo.

168.

5431 Svāgataṃ vata me āsi,

…pe…

kataṃ buddhassa sāsanaṃ.

169.

5432 Paṭisambhidā catasso,

…pe…

kataṃ buddhassa sāsanaṃ”.

5433 Itthaṃ sudaṃ āyasmā yāgudāyako thero imā gāthāyo abhāsitthāti.

5434 Yāgudāyakattherassāpadānaṃ aṭṭhamaṃ.