Metteyyavagga

Upasivattheraapadāna

100.

4954 “Himavantassāvidūre,

anomo nāma pabbato;

Assamo sukato mayhaṃ,

paṇṇasālā sumāpitā.

101.

4955 Nadī ca sandatī tattha,

supatitthā manoramā;

Anūpatitthe jāyanti,

padumuppalakā bahū.

102.

4956 Pāṭhīnā pāvusā macchā,

balajā muñjarohitā;

Macchakacchapasañchannā,

nadikā sandate tadā.

103.

4957 Timirā pupphitā tattha,

asokā khuddamālakā;

Punnāgā giripunnāgā,

sampavanti mamassamaṃ.

104.

4958 Kuṭajā pupphitā tattha,

tiṇasūlavanāni ca;

Sālā ca saḷalā tattha,

campakā pupphitā bahū.

105.

4959 Ajjunā atimuttā ca,

mahānāmā ca pupphitā;

Asanā madhugandhī ca,

pupphitā te mamassame.

106.

4960 Uddālakā pāṭalikā,

yūthikā ca piyaṅgukā;

Bimbijālakasañchannā,

samantā aḍḍhayojanaṃ.

107.

4961 Mātaggārā sattaliyo,

pāṭalī sinduvārakā;

Aṅkolakā bahū tattha,

tālakuṭṭhi ca pupphitā;

Seleyyakā bahū tattha,

pupphitā mama assame.

108.

4962 Etesu pupphajātesu,

sobhanti pādapā bahū;

Samantā tena gandhena,

vāyate mama assamo.

109.

4963 Harītakā āmalakā,

ambajambuvibhītakā;

Kolā bhallātakā billā,

phārusakaphalāni ca.

110.

4964 Tindukā ca piyālā ca,

madhukā kāsumārayo;

Labujā panasā tattha,

kadalī badarīphalā.

111.

4965 Ambāṭakā bahū tattha,

vallikāraphalāni ca;

Bījapūrasapāriyo,

phalitā mama assame.

112.

4966 Āḷakā isimuggā ca,

tato modaphalā bahū;

Avaṭā pakkabharitā,

pilakkhudumbarāni ca.

113.

4967 Pipphalī marīcā tattha,

nigrodhā ca kapitthanā;

Udumbarakā bahavo,

kaṇḍupaṇṇā ca hariyo.

114.

4968 Ete caññe ca bahavo,

phalitā assame mama;

Puppharukkhāpi bahavo,

pupphitā mama assame.

115.

4969 Āluvā ca kaḷambā ca,

biḷālī takkalāni ca;

Ālakā tālakā ceva,

vijjanti assame mama.

116.

4970 Assamassāvidūre me,

mahājātassaro ahu;

Acchodako sītajalo,

supatittho manoramo.

117.

4971 Padumuppalā bahū tattha,

puṇḍarīkasamāyutā;

Mandālakehi sañchannā,

nānāgandhasameritā.

118.

4972 Gabbhaṃ gaṇhanti padumā,

aññe pupphanti kesarī;

Opupphapattā tiṭṭhanti,

padumākaṇṇikā bahū.

119.

4973 Madhu bhisamhā savati,

khīraṃ sappi mulāḷibhi;

Samantā tena gandhena,

nānāgandhasameritā.

120.

4974 Kumudā ambagandhi ca,

nayitā dissare bahū;

Jātassarassānukūlaṃ,

ketakā pupphitā bahū.

121.

4975 Suphullā bandhujīvā ca,

setavārī sugandhikā;

Kumbhilā susumārā ca,

gahakā tattha jāyare.

122.

4976 Uggāhakā ajagarā,

tattha jātassare bahū;

Pāṭhīnā pāvusā macchā,

balajā muñjarohitā.

123.

4977 Macchakacchapasañchannā,

atho papaṭakāhi ca;

Pārevatā ravihaṃsā,

kukutthā ca nadīcarā.

124.

4978 Dindibhā cakkavākā ca,

pampakā jīvajīvakā;

Kalandakā ukkusā ca,

senakā uddharā bahū.

125.

4979 Koṭṭhakā sukapotā ca,

tuliyā camarā bahū;

Kāreniyo ca tilakā,

upajīvanti taṃ saraṃ.

126.

4980 Sīhā byagghā ca dīpī ca,

acchakokataracchakā;

Vānarā kinnarā ceva,

dissanti mama assame.

127.

4981 Tāni gandhāni ghāyanto,

bhakkhayanto phalānahaṃ;

Gandhodakaṃ pivanto ca,

vasāmi mama assame.

128.

4982 Eṇīmigā varāhā ca,

pasadā khuddarūpakā;

Aggikā jotikā ceva,

vasanti mama assame.

129.

4983 Haṃsā koñcā mayūrā ca,

sālikāpi ca kokilā;

Majjārikā bahū tattha,

kosikā poṭṭhasīsakā.

130.

4984 Pisācā dānavā ceva,

kumbhaṇḍā rakkhasā bahū;

Garuḷā pannagā ceva,

vasanti mama assame.

131.

4985 Mahānubhāvā isayo,

santacittā samāhitā;

Kamaṇḍaludharā sabbe,

ajinuttaravāsanā;

Jaṭābhārabharitāva,

vasanti mama assame.

132.

4986 Yugamattañca pekkhantā,

nipakā santavuttino;

Lābhālābhena santuṭṭhā,

vasanti mama assame.

133.

4987 Vākacīraṃ dhunantā te,

phoṭentājinacammakaṃ;

Sabalehi upatthaddhā,

gacchanti ambare tadā.

134.

4988 Na te dakaṃ āharanti,

kaṭṭhaṃ vā aggidārukaṃ;

Sayañca upasampannā,

pāṭihīrassidaṃ phalaṃ.

135.

4989 Lohadoṇiṃ gahetvāna,

vanamajjhe vasanti te;

Kuñjarāva mahānāgā,

asambhītāva kesarī.

136.

4990 Aññe gacchanti goyānaṃ,

aññe pubbavidehakaṃ;

Aññe ca uttarakuruṃ,

sakaṃ balamavassitā.

137.

4991 Tato piṇḍaṃ āharitvā,

paribhuñjanti ekato;

Sabbesaṃ pakkamantānaṃ,

uggatejāna tādinaṃ.

138.

4992 Ajinacammasaddena,

vanaṃ saddāyate tadā;

Edisā te mahāvīra,

sissā uggatapā mama.

139.

4993 Parivuto ahaṃ tehi,

vasāmi mama assame;

Tositā sakakammena,

vinītāpi samāgatā.

140.

4994 Ārādhayiṃsu maṃ ete,

sakakammābhilāsino;

Sīlavanto ca nipakā,

appamaññāsu kovidā.

141.

4995 Padumuttaro lokavidū,

āhutīnaṃ paṭiggaho;

Samayaṃ saṃviditvāna,

upagacchi vināyako.

142.

4996 Upagantvāna sambuddho,

ātāpī nipako muni;

Pattaṃ paggayha sambuddho,

bhikkhāya mamupāgami.

143.

4997 Upāgataṃ mahāvīraṃ,

jalajuttamanāyakaṃ;

Tiṇasantharaṃ paññāpetvā,

sālapupphehi okiriṃ.

144.

4998 Nisādetvāna sambuddhaṃ,

haṭṭho saṃviggamānaso;

Khippaṃ pabbatamāruyha,

agaḷuṃ aggahiṃ ahaṃ.

145.

4999 Kumbhamattaṃ gahetvāna,

panasaṃ devagandhikaṃ;

Khandhe āropayitvāna,

upagacchiṃ vināyakaṃ.

146.

5000 Phalaṃ buddhassa datvāna,

agaḷuṃ anulimpahaṃ;

Pasannacitto sumano,

buddhaseṭṭhaṃ avandihaṃ.

147.

5001 Padumuttaro lokavidū,

āhutīnaṃ paṭiggaho;

Isimajjhe nisīditvā,

imā gāthā abhāsatha.

148.

5002 ‘Yo me phalañca agaḷuṃ,

āsanañca adāsi me;

Tamahaṃ kittayissāmi,

suṇātha mama bhāsato.

149.

5003 Gāme vā yadi vāraññe,

pabbhāresu guhāsu vā;

Imassa cittamaññāya,

nibbattissati bhojanaṃ.

150.

5004 Devaloke manusse vā,

upapanno ayaṃ naro;

Bhojanehi ca vatthehi,

parisaṃ tappayissati.

151.

5005 Upapajjati yaṃ yoniṃ,

devattaṃ atha mānusaṃ;

Akkhobhabhogo hutvāna,

saṃsarissatiyaṃ naro.

152.

5006 Tiṃsakappasahassāni,

devaloke ramissati;

Sahassakkhattuṃ rājā ca,

cakkavattī bhavissati.

153.

5007 Ekasattatikkhattuñca,

devarajjaṃ karissati;

Padesarajjaṃ vipulaṃ,

gaṇanāto asaṅkhiyaṃ.

154.

5008 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

155.

5009 Tassa dhammesu dāyādo,

oraso dhammanimmito; ( )

Sabbāsave pariññāya,

viharissatināsavo’.

156.

5010 Suladdhalābho laddho me,

yohaṃ addakkhiṃ nāyakaṃ;

Tisso vijjā anuppattā,

kataṃ buddhassa sāsanaṃ.

157.

5011 Gāme vā yadi vāraññe,

pabbhāresu guhāsu vā;

Mama saṅkappamaññāya,

bhojanaṃ hoti me sadā.

158.

5012 Kilesā jhāpitā mayhaṃ,

…pe…

viharāmi anāsavo.

159.

5013 Svāgataṃ vata me āsi,

…pe…

kataṃ buddhassa sāsanaṃ.

160.

5014 Paṭisambhidā catasso,

…pe…

kataṃ buddhassa sāsanaṃ”.

5015 Itthaṃ sudaṃ āyasmā upasivo thero imā gāthāyo abhāsitthāti.

5016 Upasivattherassāpadānaṃ pañcamaṃ.