Metteyyavagga

Udenattheraapadāna

330.

5194 “Himavantassāvidūre,

padumo nāma pabbato;

Assamo sukato mayhaṃ,

paṇṇasālā sumāpitā.

331.

5195 Nadiyo sandare tattha,

supatitthā manoramā;

Acchodakā sītajalā,

sandare nadiyo sadā.

332.

5196 Pāṭhīnā pāvusā macchā,

balajā muñjarohitā;

Sobhentā nadiyo ete,

vasanti nadiyā sadā.

333.

5197 Ambajambūhi sañchannā,

kareritilakā tathā;

Uddālakā pāṭaliyo,

sobhenti mama assamaṃ.

334.

5198 Aṅkolakā bimbijālā,

māyākārī ca pupphitā;

Gandhena upavāyantā,

sobhenti mama assamaṃ.

335.

5199 Atimuttā sattalikā,

nāgā sālā ca pupphitā;

Dibbagandhaṃ sampavantā,

sobhenti mama assamaṃ.

336.

5200 Kosambā saḷalā nīpā,

aṭṭhaṅgāpi ca pupphitā;

Dibbagandhaṃ sampavantā,

sobhenti mama assamaṃ.

337.

5201 Harītakā āmalakā,

ambajambuvibhītakā;

Kolā bhallātakā billā,

phalāni bahu assame.

338.

5202 Kalambā kandalī tattha,

pupphanti mama assame;

Dibbagandhaṃ sampavantā,

sobhenti mama assamaṃ.

339.

5203 Asokapiṇḍivārī ca,

nimbarukkhā ca pupphitā;

Dibbagandhaṃ sampavantā,

sobhenti mama assamaṃ.

340.

5204 Punnāgā giripunnāgā,

timirā tattha pupphitā;

Dibbagandhaṃ sampavantā,

sobhenti mama assamaṃ.

341.

5205 Nigguṇḍī sirinigguṇḍī,

camparukkhettha pupphitā;

Dibbagandhaṃ sampavantā,

sobhenti mama assamaṃ.

342.

5206 Avidūre pokkharaṇī,

cakkavākūpakūjitā;

Mandālakehi sañchannā,

padumuppalakehi ca.

343.

5207 Acchodakā sītajalā,

supatitthā manoramā;

Acchā phalikasamānā,

sobhenti mama assamaṃ.

344.

5208 Padumā pupphare tattha,

puṇḍarīkā ca uppalā;

Mandālakehi sañchannā,

sobhenti mama assamaṃ.

345.

5209 Pāṭhīnā pāvusā macchā,

balajā muñjarohitā;

Vicarantāva te tattha,

sobhenti mama assamaṃ.

346.

5210 Kumbhīlā susumārā ca,

kacchapā ca gahā bahū;

Ogahā ajagarā ca,

sobhenti mama assamaṃ.

347.

5211 Pārevatā ravihaṃsā,

cakkavākā nadīcarā;

Dindibhā sāḷikā cettha,

sobhenti mama assamaṃ.

348.

5212 Nayitā ambagandhī ca,

ketakā tattha pupphitā;

Dibbagandhaṃ sampavantā,

sobhenti mama assamaṃ.

349.

5213 Sīhā byagghā ca dīpī ca,

acchakokataracchakā;

Anusañcarantā pavane,

sobhenti mama assamaṃ.

350.

5214 Jaṭābhārena bharitā,

ajinuttaravāsanā;

Anusañcarantā pavane,

sobhenti mama assamaṃ.

351.

5215 Ajinānidharā ete,

nipakā santavuttino;

Appāhārāva te sabbe,

sobhenti mama assamaṃ.

352.

5216 Khāribhāraṃ gahetvāna,

ajjhogayha vanaṃ tadā;

Mūlaphalāni bhuñjantā,

vasanti assame tadā.

353.

5217 Na te dāruṃ āharanti,

udakaṃ pādadhovanaṃ;

Sabbesaṃ ānubhāvena,

sayamevāharīyati.

354.

5218 Cullāsītisahassāni,

isayettha samāgatā;

Sabbeva jhāyino ete,

uttamatthagavesakā.

355.

5219 Tapassino brahmacārī,

codentā appanāva te;

Ambarāvacarā sabbe,

vasanti assame tadā.

356.

5220 Pañcāhaṃ sannipatanti,

ekaggā santavuttino;

Aññoññaṃ abhivādetvā,

pakkamanti disāmukhā.

357.

5221 Padumuttaro nāma jino,

sabbadhammāna pāragū;

Tamandhakāraṃ vidhamaṃ,

uppajji tāvade jino.

358.

5222 Mama assamasāmantā,

yakkho āsi mahiddhiko;

So me saṃsittha sambuddhaṃ,

jalajuttamanāyakaṃ.

359.

5223 ‘Esa buddho samuppanno,

Padumuttaro mahāmuni;

Khippaṃ gantvāna sambuddhaṃ,

Payirūpāsa mārisa’.

360.

5224 Yakkhassa vacanaṃ sutvā,

vippasannena cetasā;

Assamaṃ saṃsāmetvāna,

nikkhamiṃ vipinā tadā.

361.

5225 Ceḷeva ḍayhamānamhi,

nikkhamitvāna assamā;

Ekarattiṃ nivāsetvā,

upagacchiṃ vināyakaṃ.

362.

5226 Padumuttaro lokavidū,

āhutīnaṃ paṭiggaho;

Catusaccaṃ pakāsento,

desesi amataṃ padaṃ.

363.

5227 Suphullaṃ padumaṃ gayha,

upagantvā mahesino;

Pasannacitto sumano,

buddhassa abhiropayiṃ.

364.

5228 Pūjayitvāna sambuddhaṃ,

jalajuttamanāyakaṃ;

Ekaṃsaṃ ajinaṃ katvā,

santhaviṃ lokanāyakaṃ.

365.

5229 ‘Yena ñāṇena sambuddho,

vasatīha anāsavo;

Taṃ ñāṇaṃ kittayissāmi,

suṇātha mama bhāsato.

366.

5230 Saṃsārasotaṃ chinditvā,

tāresi sabbapāṇinaṃ;

Tava dhammaṃ suṇitvāna,

taṇhāsotaṃ taranti te.

367.

5231 Tuvaṃ satthā ca ketu ca,

dhajo yūpo ca pāṇinaṃ;

Parāyaṇo patiṭṭhā ca,

dīpo ca dvipaduttama.

368.

5232 Yāvatā gaṇino loke,

satthavāhā pavuccare;

Tuvaṃ aggosi sabbaññu,

tava antogadhāva te.

369.

5233 Tava ñāṇena sabbaññu,

tāresi janataṃ bahuṃ;

Tava dassanamāgamma,

dukkhassantaṃ karissare.

370.

5234 Ye kecime gandhajātā,

loke vāyanti cakkhuma;

Tava gandhasamo natthi,

puññakkhette mahāmune.

371.

5235 Tiracchānayoniṃ nirayaṃ,

parimocesi cakkhuma;

Asaṅkhataṃ padaṃ santaṃ,

desesi tvaṃ mahāmune’.

372.

5236 Padumuttaro lokavidū,

āhutīnaṃ paṭiggaho;

Bhikkhusaṃghe nisīditvā,

imā gāthā abhāsatha.

373.

5237 ‘Yo me ñāṇaṃ apūjesi,

pasanno sehi pāṇibhi;

Tamahaṃ kittayissāmi,

suṇātha mama bhāsato.

374.

5238 Tiṃsakappasahassāni,

devaloke ramissati;

Sahassakkhattuṃ rājā ca,

cakkavattī bhavissati’.

375.

5239 Suladdhalābhaṃ laddhomhi,

tosayitvāna subbataṃ;

Sabbāsave pariññāya,

viharāmi anāsavo.

376.

5240 Kilesā jhāpitā mayhaṃ,

…pe…

viharāmi anāsavo.

377.

5241 Svāgataṃ vata me āsi,

…pe…

kataṃ buddhassa sāsanaṃ.

378.

5242 Paṭisambhidā catasso,

…pe…

kataṃ buddhassa sāsanaṃ”. (4264)

5243 Itthaṃ sudaṃ āyasmā udeno thero imā gāthāyo abhāsitthāti.

5244 Udenattherassāpadānaṃ dasamaṃ.

5245 Metteyyavaggo ekacattālīsamo.

5246 Tassuddānaṃ

5247 Metteyyo puṇṇako thero,

mettagū dhotakopi ca;

Upasivo ca nando ca,

hemako sattamo tahiṃ.

5248 Todeyyo jatukaṇṇī ca,

udeno ca mahāyaso;

Tīṇi gāthāsatānettha,

asīti tīṇi cuttariṃ.