34.1 Gandhadhūpiyattheraapadāna

3715 “Siddhatthassa bhagavato,

gandhadhūpaṃ adāsahaṃ;

Sumanehi paṭicchannaṃ,

buddhānucchavikañca taṃ.

3716 Kañcanagghiyasaṅkāsaṃ,

buddhaṃ lokagganāyakaṃ;

Indīvaraṃva jalitaṃ,

ādittaṃva hutāsanaṃ.

3717 Byagghusabhaṃva pavaraṃ,

abhijātaṃva kesariṃ;

Nisinnaṃ samaṇānaggaṃ,

bhikkhusaṃghapurakkhataṃ.

3718 Disvā cittaṃ pasādetvā,

paggahetvāna añjaliṃ;

Vanditvā satthuno pāde,

pakkāmiṃ uttarāmukho.

3719 Catunnavutito kappe,

yaṃ gandhamadadiṃ tadā;

Duggatiṃ nābhijānāmi,

gandhapūjāyidaṃ phalaṃ.

3720 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṃ buddhassa sāsanaṃ”.

3721 Itthaṃ sudaṃ āyasmā gandhadhūpiyo thero imā gāthāyo abhāsitthāti.

3722 Gandhadhūpiyattherassāpadānaṃ paṭhamaṃ.