18.8 Maṇipūjakattheraapadāna

34.

2557 “Orena himavantassa,

nadikā sampavattatha;

Tassā cānupakhettamhi,

sayambhū vasate tadā.

35.

2558 Maṇiṃ paggayha pallaṅkaṃ,

sādhucittaṃ manoramaṃ;

Pasannacitto sumano,

buddhassa abhiropayiṃ.

36.

2559 Catunnavutito kappe,

yaṃ maṇiṃ abhiropayiṃ;

Duggatiṃ nābhijānāmi,

buddhapūjāyidaṃ phalaṃ.

37.

2560 Ito ca dvādase kappe,

sataraṃsīsanāmakā;

Aṭṭha te āsuṃ rājāno,

cakkavattī mahabbalā.

38.

2561 Paṭisambhidā catasso,

…pe…

kataṃ buddhassa sāsanaṃ”.

2562 Itthaṃ sudaṃ āyasmā maṇipūjako thero imā gāthāyo abhāsitthāti.

2563 Maṇipūjakattherassāpadānaṃ aṭṭhamaṃ.