Mahāvibhaṅga
Nissaggiyakaṇḍa
Kosiyavagga
Kayavikkayasikkhāpada
593. 2238 Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā upanando sakyaputto paṭṭo hoti cīvarakammaṁ kātuṁ. So paṭapilotikānaṁ saṅghāṭiṁ karitvā surattaṁ suparikammakataṁ katvā pārupi. Atha kho aññataro paribbājako mahagghaṁ paṭaṁ pārupitvā yenāyasmā upanando sakyaputto tenupasaṅkami; upasaṅkamitvā āyasmantaṁ upanandaṁ sakyaputtaṁ etadavoca— “sundarā kho tyāyaṁ, āvuso, saṅghāṭi; dehi me paṭenā”ti. “Jānāhi, āvuso”ti. “Āmāvuso, jānāmī”ti. “Handāvuso”ti, adāsi. Atha kho so paribbājako taṁ saṅghāṭiṁ pārupitvā paribbājakārāmaṁ agamāsi. Paribbājakā taṁ paribbājakaṁ etadavocuṁ— “sundarā kho tyāyaṁ, āvuso, saṅghāṭi; kuto tayā laddhā”ti? “Tena me, āvuso, paṭena parivattitā”ti. “Katihipi tyāyaṁ, āvuso, saṅghāṭi bhavissati, soyeva te paṭo varo”ti.
2239 Atha kho so paribbājako— “saccaṁ kho paribbājakā āhaṁsu— ‘katihipi myāyaṁ saṅghāṭi[339] bhavissati. Soyeva me paṭo varo’”ti yenāyasmā upanando sakyaputto tenupasaṅkami; upasaṅkamitvā āyasmantaṁ upanandaṁ sakyaputtaṁ etadavoca— “handa te, āvuso, saṅghāṭi; dehi me paṭan”ti. “Nanu tvaṁ, āvuso, mayā vutto— ‘jānāhi, āvuso’ti. Nāhaṁ dassāmī”ti. Atha kho so paribbājako ujjhāyati khiyyati vipāceti— “gihīpi naṁ gihissa vippaṭisārissa denti, kiṁ pana pabbajito pabbajitassa na dassatī”ti.
2240 Assosuṁ kho bhikkhū tassa paribbājakassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti— “kathañhi nāma āyasmā upanando sakyaputto paribbājakena saddhiṁ kayavikkayaṁ samāpajjissatī”ti.
2241 Atha kho te bhikkhū āyasmantaṁ upanandaṁ sakyaputtaṁ anekapariyāyena vigarahitvā bhagavato etamatthaṁ ārocesuṁ…pe… “saccaṁ kira tvaṁ, upananda, paribbājakena saddhiṁ kayavikkayaṁ samāpajjasī”ti? “Saccaṁ, bhagavā”ti. Vigarahi buddho bhagavā…pe… kathañhi nāma tvaṁ, moghapurisa, paribbājakena saddhiṁ kayavikkayaṁ samāpajjissasi. Netaṁ, moghapurisa, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—
594. 2242 “Yo pana bhikkhu nānappakārakaṁ kayavikkayaṁ samāpajjeyya, nissaggiyaṁ pācittiyan”ti. (20:39)
595. 2243 Yo panāti yo yādiso…pe… bhikkhūti…pe… ayaṁ imasmiṁ atthe adhippeto bhikkhūti.
2244 Nānappakārakaṁ nāma cīvarapiṇḍapātasenāsanagilānappaccayabhesajjaparikkhārā, antamaso cuṇṇapiṇḍopi dantakaṭṭhampi dasikasuttampi.
2245 Kayavikkayaṁ samāpajjeyyāti iminā imaṁ dehi, iminā imaṁ āhara, iminā imaṁ parivattehi, iminā imaṁ cetāpehīti. Ajjhācarati, āpatti dukkaṭassa. Yato kayitañca hoti vikkayitañca attano bhaṇḍaṁ parahatthagataṁ parabhaṇḍaṁ attano hatthagataṁ, nissaggiyaṁ hoti. Nissajjitabbaṁ saṁghassa vā gaṇassa vā puggalassa vā. Evañca pana, bhikkhave, nissajjitabbaṁ…pe… “ahaṁ, bhante, nānappakārakaṁ kayavikkayaṁ samāpajjiṁ. Idaṁ me nissaggiyaṁ. Imāhaṁ saṁghassa nissajjāmī”ti…pe… dadeyyāti…pe… dadeyyunti…pe… āyasmato dammīti.
596. 2246 Kayavikkaye kayavikkayasaññī, nissaggiyaṁ pācittiyaṁ. Kayavikkaye vematiko, nissaggiyaṁ pācittiyaṁ. Kayavikkaye nakayavikkayasaññī, nissaggiyaṁ pācittiyaṁ.
2247 Nakayavikkaye kayavikkayasaññī, āpatti dukkaṭassa. Nakayavikkaye vematiko, āpatti dukkaṭassa. Nakayavikkaye nakayavikkayasaññī, anāpatti.
597. 2248 Anāpatti— agghaṁ pucchati, kappiyakārakassa ācikkhati, “idaṁ amhākaṁ atthi, amhākañca iminā ca iminā ca attho”ti bhaṇati, ummattakassa, ādikammikassāti.
2249 Kayavikkayasikkhāpadaṁ niṭṭhitaṁ dasamaṁ.
Kosiyavaggo dutiyo.
2250
2251 Kosiyā suddhadvebhāgā,
chabbassāni nisīdanaṁ;
Dve ca lomāni uggaṇhe,
ubho nānappakārakāti.
- saṅghāṭi: saṅghāṭiṁ (syā1-3, pā1, ka-ma) (Word Variant) ↩