Tipitaka2500 tipitaka2500.github.io

1.2.6 Kuṭikārasikkhāpada

1.3.6. กุฏิการสิก์ขาปท

Mahāvibhaṅga

Saṃghādisesakaṇḍa

Kuṭikārasikkhāpada

342. 1417 Tena samayena buddho bhagavā rājagahe viharati veḷuvane kalandakanivāpe. Tena kho pana samayena āḷavakā bhikkhū saññācikāyo kuṭiyo kārāpenti assāmikāyo attuddesikāyo appamāṇikāyo. Tāyo na niṭṭhānaṁ gacchanti. Te yācanabahulā viññattibahulā viharanti— “purisaṁ detha, purisatthakaraṁ detha, goṇaṁ detha, sakaṭaṁ detha, vāsiṁ detha, parasuṁ detha, kuṭhāriṁ detha, kudālaṁ detha, nikhādanaṁ detha, valliṁ detha, veḷuṁ detha, muñjaṁ detha, pabbajaṁ detha, tiṇaṁ detha, mattikaṁ dethā”ti. Manussā upaddutā yācanāya upaddutā viññattiyā bhikkhū disvā ubbijjantipi uttasantipi palāyantipi aññenapi gacchanti aññenapi mukhaṁ karonti dvārampi thakenti, gāvimpi disvā palāyanti bhikkhūti maññamānā.

1418 Atha kho āyasmā mahākassapo rājagahe vassaṁvuṭṭho yena āḷavī tena pakkāmi. Anupubbena yena āḷavī tadavasari. Tatra sudaṁ āyasmā mahākassapo āḷaviyaṁ viharati aggāḷave cetiye. Atha kho āyasmā mahākassapo pubbaṇhasamayaṁ nivāsetvā pattacīvaramādāya āḷaviṁ piṇḍāya pāvisi. Manussā āyasmantaṁ mahākassapaṁ passitvā ubbijjantipi uttasantipi palāyantipi aññenapi gacchanti aññenapi mukhaṁ karonti dvārampi thakenti. Atha kho āyasmā mahākassapo āḷaviyaṁ piṇḍāya caritvā pacchābhattaṁ piṇḍapātapaṭikkanto bhikkhū āmantesi— “pubbāyaṁ, āvuso, āḷavī subhikkhā ahosi sulabhapiṇḍā sukarā uñchena paggahena yāpetuṁ; etarahi panāyaṁ āḷavī dubbhikkhā dullabhapiṇḍā, na sukarā uñchena paggahena yāpetuṁ. Ko nu kho, āvuso, hetu ko paccayo, yenāyaṁ āḷavī dubbhikkhā dullabhapiṇḍā, na sukarā uñchena paggahena yāpetun”ti? Atha kho te bhikkhū āyasmato mahākassapassa etamatthaṁ ārocesuṁ.

343. 1419 Atha kho bhagavā rājagahe yathābhirantaṁ viharitvā yena āḷavī tena cārikaṁ pakkāmi. Anupubbena cārikaṁ caramāno yena āḷavī tadavasari. Tatra sudaṁ bhagavā āḷaviyaṁ viharati aggāḷave cetiye. Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā mahākassapo bhagavato etamatthaṁ ārocesi.

1420 Atha kho bhagavā etasmiṁ nidāne etasmiṁ pakaraṇe bhikkhusaṁghaṁ sannipātāpetvā āḷavake bhikkhū paṭipucchi— “saccaṁ kira tumhe, bhikkhave, saññācikāyo kuṭiyo kārāpetha assāmikāyo attuddesikāyo appamāṇikāyo. Tāyo na niṭṭhānaṁ gacchanti. Te tumhe yācanabahulā viññattibahulā viharatha— ‘purisaṁ detha purisatthakaraṁ detha…pe… tiṇaṁ detha mattikaṁ dethā’ti. Manussā upaddutā yācanāya upaddutā viññattiyā bhikkhū disvā ubbijjantipi uttasantipi palāyantipi aññenapi gacchanti aññenapi mukhaṁ karonti dvārampi thakenti, gāvimpi disvā palāyanti bhikkhūti maññamānā”ti? “Saccaṁ, bhagavā”ti. Vigarahi buddho bhagavā…pe… kathañhi nāma tumhe, moghapurisā, saṁyācikāyo kuṭiyo kārāpessatha assāmikāyo attuddesikāyo appamāṇikāyo. Tāyo na niṭṭhānaṁ gacchanti. Te tumhe yācanabahulā viññattibahulā viharissatha— “purisaṁ detha purisatthakaraṁ detha…pe… tiṇaṁ detha mattikaṁ dethā”ti. Netaṁ moghapurisā, appasannānaṁ vā pasādāya…pe… vigarahitvā dhammiṁ kathaṁ katvā bhikkhū āmantesi—

344. 1421 “Bhūtapubbaṁ, bhikkhave, dve bhātaro isayo gaṅgaṁ nadiṁ upanissāya vihariṁsu. Atha kho, bhikkhave, maṇikaṇṭho nāgarājā gaṅgaṁ nadiṁ uttaritvā yena kaniṭṭho isi tenupasaṅkami; upasaṅkamitvā kaniṭṭhaṁ isiṁ sattakkhattuṁ bhogehi parikkhipitvā uparimuddhani mahantaṁ phaṇaṁ karitvā aṭṭhāsi. Atha kho, bhikkhave, kaniṭṭho isi tassa nāgassa bhayā[212] kiso ahosi lūkho dubbaṇṇo uppaṇḍuppaṇḍukajāto dhamanisanthatagatto. Addasa kho, bhikkhave, jeṭṭho isi kaniṭṭhaṁ isiṁ kisaṁ lūkhaṁ dubbaṇṇaṁ uppaṇḍuppaṇḍukajātaṁ dhamanisanthatagattaṁ. Disvāna kaniṭṭhaṁ isiṁ etadavoca— ‘kissa tvaṁ, bho, kiso lūkho dubbaṇṇo uppaṇḍuppaṇḍukajāto dhamanisanthatagatto’ti? ‘Idha, bho, maṇikaṇṭho nāgarājā gaṅgaṁ nadiṁ uttaritvā yenāhaṁ tenupasaṅkami; upasaṅkamitvā maṁ sattakkhattuṁ bhogehi parikkhipitvā uparimuddhani mahantaṁ phaṇaṁ karitvā aṭṭhāsi. Tassāhaṁ, bho, nāgassa bhayā kiso lūkho dubbaṇṇo uppaṇḍuppaṇḍukajāto dhamanisanthatagatto’ti. ‘Icchasi pana tvaṁ, bho, tassa nāgassa anāgamanan’ti? ‘Icchāmahaṁ, bho, tassa nāgassa anāgamanan’ti. ‘Api pana tvaṁ, bho, tassa nāgassa kiñci passasī’ti? ‘Passāmahaṁ, bho, maṇimassa[213] kaṇṭhe pilandhanan’ti. ‘Tena hi tvaṁ, bho, taṁ nāgaṁ maṇiṁ yāca— “maṇiṁ me, bho, dehi; maṇinā me attho”’ti.

1422 Atha kho, bhikkhave, maṇikaṇṭho nāgarājā gaṅgaṁ nadiṁ uttaritvā yena kaniṭṭho isi tenupasaṅkami; upasaṅkamitvā ekamantaṁ aṭṭhāsi. Ekamantaṁ ṭhitaṁ kho, bhikkhave, maṇikaṇṭhaṁ nāgarājānaṁ kaniṭṭho isi etadavoca— ‘maṇiṁ me, bho, dehi; maṇinā me attho’ti. Atha kho, bhikkhave, maṇikaṇṭho nāgarājā— ‘bhikkhu maṇiṁ yācati, bhikkhussa maṇinā attho’ti khippaññeva agamāsi.

1423 Dutiyampi kho, bhikkhave, maṇikaṇṭho nāgarājā gaṅgaṁ nadiṁ uttaritvā yena kaniṭṭho isi tenupasaṅkami. Addasa kho, bhikkhave, kaniṭṭho isi maṇikaṇṭhaṁ nāgarājānaṁ dūratova āgacchantaṁ. Disvāna maṇikaṇṭhaṁ nāgarājānaṁ etadavoca— ‘maṇiṁ me, bho, dehi; maṇinā me attho’ti. Atha kho, bhikkhave, maṇikaṇṭho nāgarājā— ‘bhikkhu maṇiṁ yācati, bhikkhussa maṇinā attho’ti tatova paṭinivatti.

1424 Tatiyampi kho, bhikkhave, maṇikaṇṭho nāgarājā gaṅgaṁ nadiṁ uttarati. Addasa kho, bhikkhave, kaniṭṭho isi maṇikaṇṭhaṁ nāgarājānaṁ gaṅgaṁ nadiṁ uttarantaṁ. Disvāna maṇikaṇṭhaṁ nāgarājānaṁ etadavoca— ‘maṇiṁ me, bho, dehi; maṇinā me attho’ti. Atha kho, bhikkhave, maṇikaṇṭho nāgarājā kaniṭṭhaṁ isiṁ gāthāhi ajjhabhāsi—

1425 [214] ‘Mamannapānaṁ vipulaṁ uḷāraṁ,
Uppajjatīmassa maṇissa hetu;
Taṁ te na dassaṁ atiyācakosi,
Na cāpi te assamamāgamissaṁ.

1426 Susū yathā sakkharadhotapāṇī,
Tāsesi maṁ selamāyācamāno;
Taṁ te na dassaṁ atiyācakosi,
Na cāpi te assamamāgamissan’ti.

1427 Atha kho, bhikkhave, maṇikaṇṭho nāgarājā— ‘bhikkhu maṇiṁ yācati, bhikkhussa maṇinā attho’ti pakkāmi. Tathā pakkantova[215] ahosi, na puna paccāgañchi. Atha kho, bhikkhave, kaniṭṭho isi tassa nāgassa dassanīyassa adassanena bhiyyoso mattāya kiso ahosi lūkho dubbaṇṇo, uppaṇḍuppaṇḍukajāto dhamanisanthatagatto. Addasa kho, bhikkhave, jeṭṭho isi kaniṭṭhaṁ isiṁ bhiyyoso mattāya kisaṁ lūkhaṁ dubbaṇṇaṁ uppaṇḍuppaṇḍukajātaṁ dhamanisanthatagattaṁ. Disvāna kaniṭṭhaṁ isiṁ etadavoca— ‘kissa tvaṁ, bho, bhiyyoso mattāya kiso lūkho dubbaṇṇo uppaṇḍuppaṇḍukajāto dhamanisanthatagatto’ti? ‘Tassāhaṁ, bho, nāgassa dassanīyassa adassanena bhiyyoso mattāya kiso lūkho dubbaṇṇo uppaṇḍuppaṇḍukajāto dhamanisanthatagatto’ti. Atha kho, bhikkhave, jeṭṭho isi kaniṭṭhaṁ isiṁ gāthāya ajjhabhāsi—

1428 [216] ‘Na taṁ yāce yassapiyaṁ jigīse[217],
Videsso hoti atiyācanāya;
Nāgo maṇiṁ yācito brāhmaṇena,
Adassanaññeva tadajjhagamā’ti. [218]

1429 Tesañhi nāma, bhikkhave, tiracchānagatānaṁ pāṇānaṁ amanāpā bhavissati yācanā amanāpā viññatti. Kimaṅgaṁ[219] pana manussabhūtānaṁ.

345. 1430 Bhūtapubbaṁ, bhikkhave, aññataro bhikkhu himavantapasse viharati aññatarasmiṁ vanasaṇḍe. Tassa kho, bhikkhave, vanasaṇḍassa avidūre mahantaṁ ninnaṁ pallalaṁ. Atha kho, bhikkhave, mahāsakuṇasaṅgho tasmiṁ pallale divasaṁ gocaraṁ caritvā sāyaṁ taṁ vanasaṇḍaṁ vāsāya upagacchati. Atha kho, bhikkhave, so bhikkhu tassa sakuṇasaṅghassa saddena ubbāḷho yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnaṁ kho ahaṁ, bhikkhave, taṁ bhikkhuṁ etadavoca— ‘kacci, bhikkhu, khamanīyaṁ kacci yāpanīyaṁ kaccisi appakilamathena addhānaṁ āgato? Kuto ca tvaṁ, bhikkhu, āgacchasī’ti? ‘Khamanīyaṁ, bhagavā, yāpanīyaṁ, bhagavā. Appakilamathena cāhaṁ, bhante, addhānaṁ āgato. Atthi, bhante, himavantapasse mahāvanasaṇḍo. Tassa kho pana, bhante, vanasaṇḍassa avidūre mahantaṁ ninnaṁ pallalaṁ. Atha kho, bhante, mahāsakuṇasaṅgho tasmiṁ pallale divasaṁ gocaraṁ caritvā sāyaṁ taṁ vanasaṇḍaṁ vāsāya upagacchati. Tato ahaṁ, bhagavā, āgacchāmi— tassa sakuṇasaṅghassa saddena ubbāḷho’ti. ‘Icchasi pana tvaṁ, bhikkhu, tassa sakuṇasaṅghassa anāgamanan’ti? ‘Icchāmahaṁ, bhagavā, tassa sakuṇasaṅghassa anāgamanan’ti. ‘Tena hi tvaṁ, bhikkhu, tattha gantvā taṁ vanasaṇḍaṁ ajjhogāhetvā rattiyā paṭhamaṁ yāmaṁ tikkhattuṁ saddamanussāvehi— suṇantu me, bhonto sakuṇā, yāvatikā imasmiṁ vanasaṇḍe vāsaṁ upagatā, pattena me attho. Ekekaṁ me, bhonto, pattaṁ dadantū’ti. Rattiyā majjhimaṁ yāmaṁ… rattiyā pacchimaṁ yāmaṁ tikkhattuṁ saddamanussāvehi— ‘suṇantu me, bhonto sakuṇā, yāvatikā imasmiṁ vanasaṇḍe vāsaṁ upagatā, pattena me attho. Ekekaṁ me, bhonto, pattaṁ dadantū’ti.

1431 Atha kho, bhikkhave, so bhikkhu tattha gantvā taṁ vanasaṇḍaṁ ajjhogāhetvā rattiyā paṭhamaṁ yāmaṁ tikkhattuṁ saddamanussāvesi— ‘suṇantu me, bhonto sakuṇā, yāvatikā imasmiṁ vanasaṇḍe vāsaṁ upagatā, pattena me attho. Ekekaṁ me, bhonto, pattaṁ dadantū’ti. Rattiyā majjhimaṁ yāmaṁ… rattiyā pacchimaṁ yāmaṁ tikkhattuṁ saddamanussāvesi— ‘suṇantu me, bhonto sakuṇā, yāvatikā imasmiṁ vanasaṇḍe vāsaṁ upagatā, pattena me attho. Ekekaṁ me, bhonto, pattaṁ dadantū’ti. Atha kho, bhikkhave, so sakuṇasaṅgho— ‘bhikkhu pattaṁ yācati bhikkhussa pattena attho’ti tamhā vanasaṇḍā pakkāmi. Tathā pakkantova ahosi na puna paccāgañchi. Tesañhi nāma, bhikkhave, tiracchānagatānaṁ pāṇānaṁ amanāpā bhavissati yācanā amanāpā viññatti. Kimaṅgaṁ pana manussabhūtānaṁ.

346. 1432 Bhūtapubbaṁ, bhikkhave, raṭṭhapālassa kulaputtassa pitā raṭṭhapālaṁ kulaputtaṁ gāthāya ajjhabhāsi—

1433 [220] ‘Apāhaṁ te na jānāmi,
raṭṭhapāla bahū janā;
Te maṁ saṅgamma yācanti,
kasmā maṁ tvaṁ na yācasī’ti.

1434 [221] ‘Yācako appiyo hoti,
yācaṁ adadamappiyo;
Tasmāhaṁ taṁ na yācāmi,
mā me videssanā[222] ahū’ti.

1435 So hi nāma, bhikkhave, raṭṭhapālo kulaputto sakaṁ pitaraṁ evaṁ vakkhati. Kimaṅgaṁ pana jano janaṁ.

347. 1436 Gihīnaṁ, bhikkhave, dussaṁharāni bhogāni sambhatānipi durakkhiyāni. Tattha nāma tumhe, moghapurisā, evaṁ dussaṁharesu bhogesu sambhatesupi durakkhiyesu yācanabahulā viññattibahulā viharissatha— ‘purisaṁ detha, purisatthakaraṁ detha, goṇaṁ detha, sakaṭaṁ detha, vāsiṁ detha, parasuṁ[223] detha, kuṭhāriṁ detha, kudālaṁ detha, nikhādanaṁ detha, valliṁ detha, veḷuṁ detha, muñjaṁ detha, pabbajaṁ detha, tiṇaṁ detha, mattikaṁ dethā’ti. Netaṁ, moghapurisā, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—

348. 1437 “Saññācikāya pana bhikkhunā kuṭiṁ kārayamānena assāmikaṁ attuddesaṁ pamāṇikā kāretabbā. Tatridaṁ pamāṇaṁ— dīghaso dvādasa vidatthiyo, sugatavidatthiyā; tiriyaṁ sattantarā. Bhikkhū abhinetabbā vatthu[224]desanāya. Tehi bhikkhūhi vatthu desetabbaṁ— anārambhaṁ[225] saparikkamanaṁ. Sārambhe[226] ce bhikkhu vatthusmiṁ aparikkamane saññācikāya kuṭiṁ kāreyya, bhikkhū vā anabhineyya vatthudesanāya, pamāṇaṁ vā atikkāmeyya, saṁghādiseso”ti. (6:10)

349. 1438 Saññācikā nāma sayaṁ yācitvā purisampi purisatthakarampi goṇampi sakaṭampi vāsimpi parasumpi kuṭhārimpi kudālampi nikhādanampi vallimpi veḷumpi muñjampi pabbajampi tiṇampi mattikampi.

1439 Kuṭi nāma ullittā vā hoti avalittā vā ullittāvalittā vā.

1440 Kārayamānenāti karonto vā kārāpento vā.

1441 Assāmikanti na añño koci sāmiko hoti, itthī vā puriso vā gahaṭṭho vā pabbajito vā.

1442 Attuddesanti attano atthāya.

1443 Pamāṇikā kāretabbā. Tatridaṁ pamāṇaṁ— dīghaso dvādasa vidatthiyo, sugatavidatthiyāti bāhirimena mānena.

1444 Tiriyaṁ sattantarāti abbhantarimena mānena.

1445 Bhikkhū abhinetabbā vatthudesanāyāti tena kuṭikārakena bhikkhunā kuṭivatthuṁ sodhetvā saṁghaṁ upasaṅkamitvā ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ paggahetvā evamassa vacanīyo— “ahaṁ, bhante, saññācikāya kuṭiṁ kattukāmo assāmikaṁ attuddesaṁ. Sohaṁ, bhante, saṁghaṁ kuṭivatthuolokanaṁ yācāmī”ti. Dutiyampi yācitabbā. Tatiyampi yācitabbā. Sace sabbo saṁgho ussahati kuṭivatthuṁ oloketuṁ, sabbena saṁghena oloketabbaṁ. No ce sabbo saṁgho ussahati kuṭivatthuṁ oloketuṁ, ye tattha honti bhikkhū byattā paṭibalā sārambhaṁ anārambhaṁ saparikkamanaṁ aparikkamanaṁ jānituṁ te yācitvā sammannitabbā. “Evañca pana, bhikkhave, sammannitabbā. Byattena bhikkhunā paṭibalena saṁgho ñāpetabbo—

350. 1446 ‘Suṇātu me, bhante, saṁgho. Ayaṁ itthannāmo bhikkhu saññācikāya kuṭiṁ kattukāmo assāmikaṁ attuddesaṁ. So saṁghaṁ kuṭivatthuolokanaṁ yācati. Yadi saṁghassa pattakallaṁ, saṁgho itthannāmañca itthannāmañca bhikkhū sammanneyya itthannāmassa bhikkhuno kuṭivatthuṁ oloketuṁ. Esā ñatti.

1447 Suṇātu me, bhante, saṁgho. Ayaṁ itthannāmo bhikkhu saññācikāya kuṭiṁ kattukāmo assāmikaṁ attuddesaṁ. So saṁghaṁ kuṭivatthuolokanaṁ yācati. Saṁgho itthannāmañca itthannāmañca bhikkhū sammannati itthannāmassa bhikkhuno kuṭivatthuṁ oloketuṁ. Yassāyasmato khamati itthannāmassa ca itthannāmassa ca bhikkhūnaṁ sammuti[227] itthannāmassa bhikkhuno kuṭivatthuṁ oloketuṁ, so tuṇhassa; yassa nakkhamati, so bhāseyya.

1448 Sammatā saṁghena itthannāmo ca itthannāmo ca bhikkhū itthannāmassa bhikkhuno kuṭivatthuṁ oloketuṁ. Khamati saṁghassa, tasmā tuṇhī, evametaṁ dhārayāmī’”ti.

351. 1449 Tehi sammatehi bhikkhūhi tattha gantvā kuṭivatthu oloketabbaṁ, sārambhaṁ anārambhaṁ saparikkamanaṁ aparikkamanaṁ jānitabbaṁ. Sace sārambhaṁ hoti aparikkamanaṁ, “mā idha karī”ti vattabbo. Sace anārambhaṁ hoti saparikkamanaṁ, saṁghassa ārocetabbaṁ— “anārambhaṁ saparikkamanan”ti. Tena kuṭikārakena bhikkhunā saṁghaṁ upasaṅkamitvā ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ paggahetvā evamassa vacanīyo— “ahaṁ, bhante, saññācikāya kuṭiṁ kattukāmo assāmikaṁ attuddesaṁ. Sohaṁ, bhante, saṁghaṁ kuṭivatthudesanaṁ yācāmī”ti. Dutiyampi yācitabbā. Tatiyampi yācitabbā. “Byattena bhikkhunā paṭibalena saṁgho ñāpetabbo—

352. 1450 ‘Suṇātu me, bhante, saṁgho. Ayaṁ itthannāmo bhikkhu saññācikāya kuṭiṁ kattukāmo assāmikaṁ attuddesaṁ. So saṁghaṁ kuṭivatthudesanaṁ yācati. Yadi saṁghassa pattakallaṁ, saṁgho itthannāmassa bhikkhuno kuṭivatthuṁ deseyya. Esā ñatti.

1451 Suṇātu me, bhante, saṁgho. Ayaṁ itthannāmo bhikkhu saññācikāya kuṭiṁ kattukāmo assāmikaṁ attuddesaṁ. So saṁghaṁ kuṭivatthudesanaṁ yācati. Saṁgho itthannāmassa bhikkhuno kuṭivatthuṁ deseti. Yassāyasmato khamati itthannāmassa bhikkhuno kuṭivatthussa desanā, so tuṇhassa; yassa nakkhamati, so bhāseyya.

1452 Desitaṁ saṁghena itthannāmassa bhikkhuno kuṭivatthu. Khamati saṁghassa, tasmā tuṇhī, evametaṁ dhārayāmī’”ti.

353. 1453 Sārambhaṁ nāma kipillikānaṁ vā āsayo hoti, upacikānaṁ vā āsayo hoti, undūrānaṁ[228] vā[229] āsayo hoti, ahīnaṁ vā āsayo hoti, vicchikānaṁ vā āsayo hoti, satapadīnaṁ vā āsayo hoti, hatthīnaṁ vā āsayo hoti, assānaṁ vā āsayo hoti, sīhānaṁ vā āsayo hoti, byagghānaṁ vā āsayo hoti, dīpīnaṁ vā āsayo hoti, acchānaṁ vā āsayo hoti, taracchānaṁ vā āsayo hoti, yesaṁ kesañci tiracchānagatānaṁ pāṇānaṁ āsayo hoti, pubbaṇṇanissitaṁ vā hoti, aparaṇṇanissitaṁ vā hoti, abbhāghātanissitaṁ vā hoti, āghātananissitaṁ vā hoti, susānanissitaṁ vā hoti, uyyānanissitaṁ vā hoti, rājavatthunissitaṁ vā hoti, hatthisālānissitaṁ vā hoti, assasālānissitaṁ vā hoti, bandhanāgāranissitaṁ vā hoti, pānāgāranissitaṁ vā hoti, sūnanissitaṁ vā hoti, racchānissitaṁ vā hoti, caccaranissitaṁ vā hoti, sabhānissitaṁ vā hoti, saṁsaraṇanissitaṁ vā hoti. Etaṁ sārambhaṁ nāma.

1454 Aparikkamanaṁ nāma na sakkā hoti yathāyuttena sakaṭena anuparigantuṁ samantā nisseṇiyā anuparigantuṁ. Etaṁ aparikkamanaṁ nāma.

1455 Anārambhaṁ nāma na kipillikānaṁ vā āsayo hoti, na upacikānaṁ vā āsayo hoti, na undūrānaṁ[230] vā āsayo hoti, na ahīnaṁ vā āsayo hoti, na vicchikānaṁ vā āsayo hoti, na satapadīnaṁ vā āsayo hoti…pe… na saṁsaraṇanissitaṁ vā hoti. Etaṁ anārambhaṁ nāma.

1456 Saparikkamanaṁ nāma sakkā hoti yathāyuttena sakaṭena anuparigantuṁ, samantā nisseṇiyā anuparigantuṁ. Etaṁ saparikkamanaṁ nāma.

1457 Saññācikā nāma sayaṁ yācitvā purisampi purisatthakarampi…pe… mattikampi.

1458 Kuṭi nāma ullittā vā hoti avalittā vā ullittāvalittā vā.

1459 Kāreyyāti karoti vā kārāpeti vā.

1460 Bhikkhū vā anabhineyya, vatthudesanāya pamāṇaṁ vā atikkāmeyyāti ñattidutiyena kammena kuṭivatthuṁ na desāpetvā, āyāmato vā vitthārato vā antamaso kesaggamattampi atikkāmetvā karoti vā kārāpeti vā, payoge[231] dukkaṭaṁ. Ekaṁ piṇḍaṁ anāgate āpatti thullaccayassa. Tasmiṁ piṇḍe āgate āpatti saṁghādisesassa.

1461 Saṁghādisesoti…pe… tenapi vuccati “saṁghādiseso”ti.

354. 1462 Bhikkhu kuṭiṁ karoti adesitavatthukaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ. Bhikkhu kuṭiṁ karoti adesitavatthukaṁ sārambhaṁ saparikkamanaṁ, āpatti saṁghādisesena dukkaṭassa. Bhikkhu kuṭiṁ karoti adesitavatthukaṁ anārambhaṁ aparikkamanaṁ, āpatti saṁghādisesena dukkaṭassa. Bhikkhu kuṭiṁ karoti adesitavatthukaṁ anārambhaṁ saparikkamanaṁ, āpatti saṁghādisesassa.

355. 1463 Bhikkhu kuṭiṁ karoti desitavatthukaṁ sārambhaṁ aparikkamanaṁ, āpatti dvinnaṁ dukkaṭānaṁ. Bhikkhu kuṭiṁ karoti desitavatthukaṁ sārambhaṁ saparikkamanaṁ, āpatti dukkaṭassa. Bhikkhu kuṭiṁ karoti desitavatthukaṁ anārambhaṁ aparikkamanaṁ, āpatti dukkaṭassa. Bhikkhu kuṭiṁ karoti desitavatthukaṁ anārambhaṁ saparikkamanaṁ, anāpatti.

1464 Bhikkhu kuṭiṁ karoti pamāṇātikkantaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ. Bhikkhu kuṭiṁ karoti pamāṇātikkantaṁ sārambhaṁ saparikkamanaṁ, āpatti saṁghādisesena dukkaṭassa. Bhikkhu kuṭiṁ karoti pamāṇātikkantaṁ anārambhaṁ aparikkamanaṁ, āpatti saṁghādisesena dukkaṭassa. Bhikkhu kuṭiṁ karoti pamāṇātikkantaṁ anārambhaṁ saparikkamanaṁ, āpatti saṁghādisesassa.

1465 Bhikkhu kuṭiṁ karoti pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ. Bhikkhu kuṭiṁ karoti pamāṇikaṁ sārambhaṁ saparikkamanaṁ, āpatti dukkaṭassa. Bhikkhu kuṭiṁ karoti pamāṇikaṁ anārambhaṁ aparikkamanaṁ, āpatti dukkaṭassa. Bhikkhu kuṭiṁ karoti pamāṇikaṁ anārambhaṁ saparikkamanaṁ, anāpatti.

1466 Bhikkhu kuṭiṁ karoti adesitavatthukaṁ pamāṇātikkantaṁ sārambhaṁ aparikkamanaṁ, āpatti dvinnaṁ saṁghādisesena dvinnaṁ dukkaṭānaṁ. Bhikkhu kuṭiṁ karoti adesitavatthukaṁ pamāṇātikkantaṁ sārambhaṁ saparikkamanaṁ, āpatti dvinnaṁ saṁghādisesena dukkaṭassa. Bhikkhu kuṭiṁ karoti adesitavatthukaṁ pamāṇātikkantaṁ anārambhaṁ aparikkamanaṁ, āpatti dvinnaṁ saṁghādisesena dukkaṭassa. Bhikkhu kuṭiṁ karoti adesitavatthukaṁ pamāṇātikkantaṁ anārambhaṁ saparikkamanaṁ, āpatti dvinnaṁ saṁghādisesānaṁ.

1467 Bhikkhu kuṭiṁ karoti desitavatthukaṁ pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ. Bhikkhu kuṭiṁ karoti desitavatthukaṁ pamāṇikaṁ sārambhaṁ saparikkamanaṁ, āpatti dukkaṭassa. Bhikkhu kuṭiṁ karoti desitavatthukaṁ pamāṇikaṁ anārambhaṁ aparikkamanaṁ, āpatti dukkaṭassa. Bhikkhu kuṭiṁ karoti desitavatthukaṁ pamāṇikaṁ anārambhaṁ saparikkamanaṁ, anāpatti.

356. 1468 Bhikkhu samādisati— “kuṭiṁ me karothā”ti. Tassa kuṭiṁ karonti adesitavatthukaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti saṁghādisesena dukkaṭassa…pe… anārambhaṁ aparikkamanaṁ, āpatti saṁghādisesena dukkaṭassa…pe… anārambhaṁ saparikkamanaṁ, āpatti saṁghādisesassa.

1469 Bhikkhu samādisati— “kuṭiṁ me karothā”ti. Tassa kuṭiṁ karonti desitavatthukaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

1470 Bhikkhu samādisati— “kuṭiṁ me karothā”ti. Tassa kuṭiṁ karonti pamāṇātikkantaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti saṁghādisesena dukkaṭassa…pe… anārambhaṁ aparikkamanaṁ, āpatti saṁghādisesena dukkaṭassa…pe… anārambhaṁ saparikkamanaṁ, āpatti saṁghādisesassa.

1471 Bhikkhu samādisati— “kuṭiṁ me karothā”ti. Tassa kuṭiṁ karonti pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

1472 Bhikkhu samādisati— “kuṭiṁ me karothā”ti. Tassa kuṭiṁ karonti adesitavatthukaṁ pamāṇātikkantaṁ sārambhaṁ aparikkamanaṁ, āpatti dvinnaṁ saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ aparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ saparikkamanaṁ, āpatti dvinnaṁ saṁghādisesānaṁ.

1473 Bhikkhu samādisati— “kuṭiṁ me karothā”ti. Tassa kuṭiṁ karonti desitavatthukaṁ pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

357. 1474 Bhikkhu samādisitvā pakkamati— “kuṭiṁ me karothā”ti. Na ca samādisati— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti saṁghādisesena dukkaṭassa…pe… anārambhaṁ aparikkamanaṁ, āpatti saṁghādisesena dukkaṭassa…pe… anārambhaṁ saparikkamanaṁ, āpatti saṁghādisesassa.

1475 Bhikkhu samādisitvā pakkamati— “kuṭiṁ me karothā”ti. Na ca samādisati— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

1476 Bhikkhu samādisitvā pakkamati— “kuṭiṁ me karothā”ti. Na ca samādisati— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇātikkantaṁ sārambhaṁ aparikkamanaṁ, āpatti saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti saṁghādisesena dukkaṭassa…pe… anārambhaṁ aparikkamanaṁ, āpatti saṁghādisesena dukkaṭassa…pe… anārambhaṁ saparikkamanaṁ, āpatti saṁghādisesassa.

1477 Bhikkhu samādisitvā pakkamati— “kuṭiṁ me karothā”ti. Na ca samādisati— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

1478 Bhikkhu samādisitvā pakkamati— “kuṭiṁ me karothā”ti. Na ca samādisati— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti adesitavatthukaṁ pamāṇātikkantaṁ sārambhaṁ aparikkamanaṁ, āpatti dvinnaṁ saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ aparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ saparikkamanaṁ, āpatti dvinnaṁ saṁghādisesānaṁ.

1479 Bhikkhu samādisitvā pakkamati— “kuṭiṁ me karothā”ti. Na ca samādisati— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti desitavatthukaṁ pamāṇikaṁ sārambhaṁ aparikkamanaṁ, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

358. 1480 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ sārambhaṁ aparikkamanaṁ. So suṇāti— “kuṭi kira me kayirati adesitavatthukā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “desitavatthukā ca hotu anārambhā ca saparikkamanā cā”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1481 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ sārambhaṁ saparikkamanaṁ. So suṇāti— “kuṭi kira me kayirati adesitavatthukā sārambhā saparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “desitavatthukā ca hotu anārambhā cā”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1482 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ anārambhaṁ aparikkamanaṁ. So suṇāti— “kuṭi kira me kayirati adesitavatthukā anārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “desitavatthukā ca hotu saparikkamanā cā”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1483 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ anārambhaṁ saparikkamanaṁ. So suṇāti— “kuṭi kira me kayirati adesitavatthukā anārambhā saparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “desitavatthukā hotū”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1484 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ sārambhaṁ aparikkamanaṁ. So suṇāti— “kuṭi kira me kayirati desitavatthukā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “anārambhā ca hotu saparikkamanā cā”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1485 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ sārambhaṁ saparikkamanaṁ. So suṇāti— “kuṭi kira me kayirati desitavatthukā sārambhā saparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “anārambhā hotū”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1486 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ anārambhaṁ aparikkamanaṁ. So suṇāti— “kuṭi kira me kayirati desitavatthukā anārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “saparikkamanā hotū”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1487 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ anārambhaṁ saparikkamanaṁ, anāpatti.

359. 1488 Bhikkhu samādisitvā pakkamati— “kuṭiṁ me karothā”ti. Samādisati ca— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇātikkantaṁ sārambhaṁ aparikkamanaṁ. So suṇāti— “kuṭi kira me kayirati pamāṇātikkantā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “pamāṇikā ca hotu anārambhā ca saparikkamanā cā”ti…pe… “pamāṇikā ca hotu anārambhā cā”ti…pe… “pamāṇikā ca hotu saparikkamanā cā”ti…pe… “pamāṇikā hotū”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1489 Bhikkhu samādisitvā pakkamati— “kuṭiṁ me karothā”ti. Samādisati ca— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇikaṁ sārambhaṁ aparikkamanaṁ. So suṇāti— “kuṭi kira me kayirati pamāṇikā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “anārambhā ca hotu saparikkamanā cā”ti…pe… “anārambhā hotū”ti…pe… “saparikkamanā hotū”ti…pe… anāpatti.

360. 1490 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti adesitavatthukaṁ pamāṇātikkantaṁ sārambhaṁ aparikkamanaṁ. So suṇāti— “kuṭi kira me kayirati adesitavatthukā pamāṇātikkantā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “desitavatthukā ca hotu pamāṇikā ca anārambhā ca saparikkamanā cā”ti…pe… “desitavatthukā ca hotu pamāṇikā ca anārambhā cā”ti…pe… “desitavatthukā ca hotu pamāṇikā ca saparikkamanā cā”ti…pe… “desitavatthukā ca hotu pamāṇikā cā”ti. No ce sāmaṁ vā gaccheyya dūtaṁ vā pahiṇeyya, āpatti dukkaṭassa.

1491 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti desitavatthukaṁ pamāṇikaṁ sārambhaṁ aparikkamanaṁ. So suṇāti— “kuṭi kira me kayirati desitavatthukā pamāṇikā sārambhā aparikkamanā”ti. Tena bhikkhunā sāmaṁ vā gantabbaṁ dūto vā pāhetabbo— “anārambhā ca hotu saparikkamanā cā”ti…pe… “anārambhā hotū”ti…pe… “saparikkamanā hotū”ti…pe… anāpatti.

1492 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti adesitavatthukaṁ sārambhaṁ aparikkamanaṁ, āpatti kārukānaṁ tiṇṇaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ dvinnaṁ dukkaṭānaṁ…pe… anārambhaṁ aparikkamanaṁ, āpatti kārukānaṁ dvinnaṁ dukkaṭānaṁ…pe… anārambhaṁ saparikkamanaṁ, āpatti kārukānaṁ dukkaṭassa.

1493 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu anārambhā ca saparikkamanā cā”ti. Tassa kuṭiṁ karonti desitavatthukaṁ sārambhaṁ aparikkamanaṁ, āpatti kārukānaṁ dvinnaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ dukkaṭassa…pe… anārambhaṁ aparikkamanaṁ, āpatti kārukānaṁ dukkaṭassa…pe… anārambhaṁ saparikkamanaṁ, anāpatti.

1494 Bhikkhu samādisitvā pakkamati— “kuṭiṁ me karothā”ti. Samādisati ca— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇātikkantaṁ sārambhaṁ aparikkamanaṁ, āpatti kārukānaṁ tiṇṇaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ dvinnaṁ dukkaṭānaṁ…pe… anārambhaṁ aparikkamanaṁ, āpatti kārukānaṁ dvinnaṁ dukkaṭānaṁ…pe… anārambhaṁ saparikkamanaṁ, āpatti kārukānaṁ dukkaṭassa.

1495 Bhikkhu samādisitvā pakkamati— “kuṭiṁ me karothā”ti. Samādisati ca— “pamāṇikā ca hotu anārambhā ca saparikkamanā cā”ti. Tassa kuṭiṁ karonti pamāṇikaṁ sārambhaṁ aparikkamanaṁ, āpatti kārukānaṁ dvinnaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ dukkaṭassa…pe… anārambhaṁ aparikkamanaṁ, āpatti kārukānaṁ dukkaṭassa…pe… anārambhaṁ saparikkamanaṁ, anāpatti.

1496 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti adesitavatthukaṁ pamāṇātikkantaṁ sārambhaṁ aparikkamanaṁ, āpatti kārukānaṁ catunnaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ tiṇṇaṁ dukkaṭānaṁ…pe… anārambhaṁ aparikkamanaṁ, āpatti kārukānaṁ tiṇṇaṁ dukkaṭānaṁ…pe… anārambhaṁ saparikkamanaṁ, āpatti kārukānaṁ dvinnaṁ dukkaṭānaṁ.

1497 Bhikkhu samādisitvā pakkamati— “kuṭiṁ me karothā”ti. Samādisati ca— “desitavatthukā ca hotu pamāṇikā ca anārambhā ca saparikkamanā cā”ti. Tassa kuṭiṁ karonti desitavatthukaṁ pamāṇikaṁ sārambhaṁ aparikkamanaṁ, āpatti kārukānaṁ dvinnaṁ dukkaṭānaṁ…pe… sārambhaṁ saparikkamanaṁ, āpatti kārukānaṁ dukkaṭassa…pe… anārambhaṁ aparikkamanaṁ, āpatti kārukānaṁ dukkaṭassa…pe… anārambhaṁ saparikkamanaṁ, anāpatti.

361. 1498 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti adesitavatthukaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti saṁghādisesena dvinnaṁ dukkaṭānaṁ.

1499 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti adesitavatthukaṁ sārambhaṁ saparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti saṁghādisesena dukkaṭassa…pe… anārambhaṁ aparikkamanaṁ…pe… āpatti saṁghādisesena dukkaṭassa…pe… anārambhaṁ saparikkamanaṁ…pe… āpatti saṁghādisesassa.

1500 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti desitavatthukaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

362. 1501 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti pamāṇātikkantaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti saṁghādisesena dukkaṭassa…pe… anārambhaṁ aparikkamanaṁ, āpatti saṁghādisesena dukkaṭassa…pe… anārambhaṁ saparikkamanaṁ, āpatti saṁghādisesassa.

1502 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti pamāṇikaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa…pe… anārambhaṁ saparikkamanaṁ, anāpatti.

1503 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti adesitavatthukaṁ pamāṇātikkantaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti dvinnaṁ saṁghādisesena dvinnaṁ dukkaṭānaṁ…pe… sārambhaṁ saparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ aparikkamanaṁ, āpatti dvinnaṁ saṁghādisesena dukkaṭassa…pe… anārambhaṁ saparikkamanaṁ, āpatti dvinnaṁ saṁghādisesānaṁ.

1504 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti desitavatthukaṁ pamāṇikaṁ sārambhaṁ aparikkamanaṁ. So ce vippakate āgacchati, tena bhikkhunā sā kuṭi aññassa vā dātabbā bhinditvā vā puna kātabbā. No ce aññassa vā dadeyya bhinditvā vā puna kāreyya, āpatti dvinnaṁ dukkaṭānaṁ…pe… sārambhaṁ saparikkamanaṁ, āpatti dukkaṭassa…pe… anārambhaṁ aparikkamanaṁ, āpatti dukkaṭassa.

1505 Bhikkhu samādisitvā pakkamati— “kuṭiṁ me karothā”ti. Tassa kuṭiṁ karonti desitavatthukaṁ pamāṇikaṁ anārambhaṁ saparikkamanaṁ, anāpatti.

363. 1506 Attanā vippakataṁ attanā pariyosāpeti, āpatti saṁghādisesassa.

1507 Attanā vippakataṁ parehi pariyosāpeti[232], āpatti saṁghādisesassa.

1508 Parehi vippakataṁ attanā pariyosāpeti, āpatti saṁghādisesassa.

1509 Parehi vippakataṁ parehi pariyosāpeti[233], āpatti saṁghādisesassa.

364. 1510 Anāpatti— leṇe guhāya tiṇakuṭikāya aññassatthāya vāsāgāraṁ ṭhapetvā sabbattha, anāpatti ummattakassa ādikammikassāti.

1511 Kuṭikārasikkhāpadaṁ niṭṭhitaṁ chaṭṭhaṁ.

  1. bhayā: bhayāmhi (sī) (Word Variant) ↩
  2. maṇimassa: maṇissa (sī, pā1, ka-ma) (Word Variant) ↩
  3. 22J.3.7/1-22J.3.8/1 (Cross Reference) ↩
  4. pakkantova: tadā pakkanto pakkantova (sī), tadā pakkantova (pā1, ka-ma) (Word Variant) ↩
  5. 22J.3.9/1 (Cross Reference) ↩
  6. jigīse: jigiṁse (sī, syā1-3, pā1) (Word Variant) ↩
  7. Videsso: desso (sī), desso ca (syā1-3) (Word Variant) ↩
  8. Kimaṅgaṁ: kimaṅga (sī, pā1) (Word Variant) ↩
  9. 22J.7.54/1 (Cross Reference) ↩
  10. 22J.7.55/1 (Cross Reference) ↩
  11. videssanā: viddesanā (sī, syā1-3, pā1), ka-sī, cha1-2 (Word Variant) ↩
  12. parasuṁ: pharasuṁ (sī, syā1-3, pā1), ka-sī, cha1-2 (Word Variant) ↩
  13. vatthu: vatthuṁ (sī, syā1-3) (Word Variant) ↩
  14. anārambhaṁ: anārabbhaṁ (ka-ma) (Word Variant) ↩
  15. Sārambhe: sārabbhe (ka-ma) (Word Variant) ↩
  16. sammuti: sammati (sī, syā1-3) (Word Variant) ↩
  17. undūrānaṁ: undurānaṁ (syā1-3, pā1) (Word Variant) ↩
  18. vā: sañcaraṇanissitaṁ vā (ka-ma) (Word Variant) ↩
  19. undūrānaṁ: undurānaṁ (syā1-3) (Word Variant) ↩
  20. payoge: payoge payoge (sī, cha1) (Word Variant) ↩
  21. pariyosāpeti: pariyosāvāpeti (ka-ma) (Word Variant) ↩
  22. pariyosāpeti: pariyosāvāpeti (ka-ma) (Word Variant) ↩