6.1.2 Tekicchakārittheragāthā

381.

650 “Atihitā vīhi,

khalagatā sālī;

Na ca labhe piṇḍaṃ,

kathamahaṃ kassaṃ”.

382.

651 “Buddhamappameyyaṃ anussara pasanno,

Pītiyā phuṭasarīro hohisi satatamudaggo.

383.

652 Dhammamappameyyaṃ anussara pasanno,

Pītiyā phuṭasarīro hohisi satatamudaggo.

384.

653 Saṃghamappameyyaṃ anussara pasanno,

Pītiyā phuṭasarīro hohisi satatamudaggo”.

385.

654 “Abbhokāse viharasi,

Sītā hemantikā imā ratyo;

Mā sītena pareto vihaññittho,

Pavisa tvaṃ vihāraṃ phusitaggaḷaṃ”.

386.

655 “Phusissaṃ catasso appamaññāyo,

Tāhi ca sukhito viharissaṃ;

Nāhaṃ sītena vihaññissaṃ,

Aniñjito viharanto”ti.

656 … Tekicchakārī thero… .