5.1.2 Subhūtattheragāthā

320.

573 “Ayoge yuñjamattānaṃ,

puriso kiccamicchako;

Carañce nādhigaccheyya,

‘taṃ me dubbhagalakkhaṇaṃ’.

321.

574 Abbūḷhaṃ aghagataṃ vijitaṃ,

Ekañce ossajeyya kalīva siyā;

Sabbānipi ce ossajeyya andhova siyā,

Samavisamassa adassanato.

322.

575 Yañhi kayirā tañhi vade,

yaṃ na kayirā na taṃ vade;

Akarontaṃ bhāsamānaṃ,

parijānanti paṇḍitā.

323.

576 Yathāpi ruciraṃ pupphaṃ,

vaṇṇavantaṃ agandhakaṃ;

Evaṃ subhāsitā vācā,

aphalā hoti akubbato.

324.

577 Yathāpi ruciraṃ pupphaṃ,

Vaṇṇavantaṃ sugandhakaṃ;

Evaṃ subhāsitā vācā,

Saphalā hoti kubbato”ti.

578 … Subhūto thero… .