Aṭṭhakavagga
Kāmasutta
773. 934 [418] Kāmaṁ kāmayamānassa,
tassa ce taṁ samijjhati;
Addhā pītimano hoti,
laddhā macco yadicchati. (1)
774. 935 Tassa ce kāmayānassa[419],
chandajātassa jantuno;
Te kāmā parihāyanti,
sallaviddhova ruppati. (2)
775. 936 Yo kāme parivajjeti,
sappasseva padā siro;
Somaṁ visattikaṁ loke,
sato samativattati. (3) [420]
776. 937 Khettaṁ vatthuṁ hiraññaṁ vā,
gavāssaṁ dāsaporisaṁ;
Thiyo bandhū puthu kāme,
yo naro anugijjhati. (4) [421]
777. 938 Abalā naṁ balīyanti,
maddantenaṁ parissayā;
Tato naṁ dukkhamanveti,
nāvaṁ bhinnamivodakaṁ. (5)
778. 939 Tasmā jantu sadā sato,
Kāmāni parivajjaye;
Te pahāya tare oghaṁ,
Nāvaṁ sitvāva[422] pāragūti. (6)
940 Kāmasuttaṁ paṭhamaṁ.