Mahāvagga

Sabhiyasutta

597 Evaṃ me sutaṃ—  ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena sabhiyassa paribbājakassa purāṇasālohitāya devatāya pañhā uddiṭṭhā honti—  “yo te, sabhiya, samaṇo vā brāhmaṇo vā ime pañhe puṭṭho byākaroti tassa santike brahmacariyaṃ careyyāsī”ti.

598 Atha kho sabhiyo paribbājako tassā devatāya santike te pañhe uggahetvā ye te samaṇabrāhmaṇā saṃghino gaṇino gaṇācariyā ñātā yasassino titthakarā sādhusammatā bahujanassa, seyyathidaṃ—  pūraṇo kassapo makkhaligosālo ajito kesakambalo pakudho kaccāno sañcayo belaṭṭhaputto nigaṇṭho nāṭaputto, te upasaṅkamitvā te pañhe pucchati. Te sabhiyena paribbājakena pañhe puṭṭhā na sampāyanti; asampāyantā kopañca dosañca appaccayañca pātukaronti. Api ca sabhiyaṃyeva paribbājakaṃ paṭipucchanti.

599 Atha kho sabhiyassa paribbājakassa etadahosi—  “ye kho te bhonto samaṇabrāhmaṇā saṃghino gaṇino gaṇācariyā ñātā yasassino titthakarā sādhusammatā bahujanassa, seyyathidaṃ—  pūraṇo kassapo…pe…  nigaṇṭho nāṭaputto, te mayā pañhe puṭṭhā na sampāyanti, asampāyantā kopañca dosañca appaccayañca pātukaronti; api ca maññevettha paṭipucchanti. Yannūnāhaṃ hīnāyāvattitvā kāme paribhuñjeyyan”ti.

600 Atha kho sabhiyassa paribbājakassa etadahosi—  “ayampi kho samaṇo gotamo saṃghī ceva gaṇī ca gaṇācariyo ca ñāto yasassī titthakaro sādhusammato bahujanassa; yannūnāhaṃ samaṇaṃ gotamaṃ upasaṅkamitvā ime pañhe puccheyyan”ti.

601 Atha kho sabhiyassa paribbājakassa etadahosi—  “yepi kho te bhonto samaṇabrāhmaṇā jiṇṇā vuḍḍhā mahallakā addhagatā vayoanuppattā therā rattaññū cirapabbajitā saṃghino gaṇino gaṇācariyā ñātā yasassino titthakarā sādhusammatā bahujanassa, seyyathidaṃ—  pūraṇo kassapo…pe…  nigaṇṭho nāṭaputto, tepi mayā pañhe puṭṭhā na sampāyanti, asampāyantā kopañca dosañca appaccayañca pātukaronti, api ca maññevettha paṭipucchanti; kiṃ pana me samaṇo gotamo ime pañhe puṭṭho byākarissati. Samaṇo hi gotamo daharo ceva jātiyā, navo ca pabbajjāyā”ti.

602 Atha kho sabhiyassa paribbājakassa etadahosi—  “samaṇo kho daharoti na uññātabbo na paribhotabbo. Daharopi cesa samaṇo gotamo mahiddhiko hoti mahānubhāvo, yannūnāhaṃ samaṇaṃ gotamaṃ upasaṅkamitvā ime pañhe puccheyyan”ti.

603 Atha kho sabhiyo paribbājako yena rājagahaṃ tena cārikaṃ pakkāmi. Anupubbena cārikaṃ caramāno yena rājagahaṃ veḷuvanaṃ kalandakanivāpo, yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sabhiyo paribbājako bhagavantaṃ gāthāya ajjhabhāsi—

516.

604 “Kaṅkhī vecikicchī āgamaṃ, (iti sabhiyo)

Pañhe pucchituṃ abhikaṅkhamāno;

Tesantakaro bhavāhi pañhe me puṭṭho,

Anupubbaṃ anudhammaṃ byākarohi me”. (1)

517.

605 “Dūrato āgatosi sabhiya, (iti bhagavā)

Pañhe pucchituṃ abhikaṅkhamāno;

Tesantakaro bhavāmi pañhe te puṭṭho,

Anupubbaṃ anudhammaṃ byākaromi te. (2)

518.

606 Puccha maṃ sabhiya pañhaṃ,

Yaṃ kiñci manasicchasi;

Tassa tasseva pañhassa,

Ahaṃ antaṃ karomi te”ti. (3)

607 Atha kho sabhiyassa paribbājakassa etadahosi—  “acchariyaṃ vata bho, abbhutaṃ vata bho. Yaṃ vatāhaṃ aññesu samaṇabrāhmaṇesu okāsakammamattampi nālatthaṃ taṃ me idaṃ samaṇena gotamena okāsakammaṃ katan”ti. Attamano pamudito udaggo pītisomanassajāto bhagavantaṃ pañhaṃ apucchi—

519.

608 “Kiṃpattinamāhu bhikkhunaṃ, (iti sabhiyo)

Sorataṃ kena kathañca dantamāhu;

Buddhoti kathaṃ pavuccati,

Puṭṭho me bhagavā byākarohi”. (4)

520.

609 “Pajjena katena attanā, (sabhiyāti bhagavā)

Parinibbānagato vitiṇṇakaṅkho;

Vibhavañca bhavañca vippahāya,

Vusitavā khīṇapunabbhavo sa bhikkhu. (5)

521.

610 Sabbattha upekkhako satimā,

Na so hiṃsati kañci sabbaloke;

Tiṇṇo samaṇo anāvilo,

Ussadā yassa na santi sorato so. (6)

522.

611 Yassindriyāni bhāvitāni,

Ajjhattaṃ bahiddhā ca sabbaloke;

Nibbijjha imaṃ parañca lokaṃ,

Kālaṃ kaṅkhati bhāvito sa danto. (7)

523.

612 Kappāni viceyya kevalāni,

Saṃsāraṃ dubhayaṃ cutūpapātaṃ;

Vigatarajamanaṅgaṇaṃ visuddhaṃ,

Pattaṃ jātikhayaṃ tamāhu buddhan”ti. (8)

613 Atha kho sabhiyo paribbājako bhagavato bhāsitaṃ abhinanditvā anumoditvā attamano pamudito udaggo pītisomanassajāto bhagavantaṃ uttariṃ pañhaṃ apucchi—

524.

614 “Kiṃpattinamāhu brāhmaṇaṃ, (iti sabhiyo)

Samaṇaṃ kena kathañca nhātakoti;

Nāgoti kathaṃ pavuccati,

Puṭṭho me bhagavā byākarohi”. (9)

525.

615 “Bāhitvā sabbapāpakāni, (sabhiyāti bhagavā)

Vimalo sādhusamāhito ṭhitatto;

Saṃsāramaticca kevalī so,

Asito tādi pavuccate sa brahmā. (10)

526.

616 Samitāvi pahāya puññapāpaṃ,

Virajo ñatvā imaṃ parañca lokaṃ;

Jātimaraṇaṃ upātivatto,

Samaṇo tādi pavuccate tathattā. (11)

527.

617 Ninhāya sabbapāpakāni,

Ajjhattaṃ bahiddhā ca sabbaloke;

Devamanussesu kappiyesu,

Kappaṃ neti tamāhu nhātakoti. (12)

528.

618 Āguṃ na karoti kiñci loke,

Sabbasaṃyoge visajja bandhanāni;

Sabbattha na sajjatī vimutto,

Nāgo tādi pavuccate tathattā”ti. (13)

619 Atha kho sabhiyo paribbājako…pe…  bhagavantaṃ uttariṃ pañhaṃ apucchi—

529.

620 “Kaṃ khettajinaṃ vadanti buddhā, (iti sabhiyo)

Kusalaṃ kena kathañca paṇḍitoti;

Muni nāma kathaṃ pavuccati,

Puṭṭho me bhagavā byākarohi”. (14)

530.

621 “Khettāni viceyya kevalāni, (sabhiyāti bhagavā)

Dibbaṃ mānusakañca brahmakhettaṃ;

Sabbakhettamūlabandhanā pamutto,

Khettajino tādi pavuccate tathattā. (15)

531.

622 Kosāni viceyya kevalāni,

Dibbaṃ mānusakañca brahmakosaṃ;

Sabbakosamūlabandhanā pamutto,

Kusalo tādi pavuccate tathattā. (16)

532.

623 Dubhayāni viceyya paṇḍarāni,

Ajjhattaṃ bahiddhā ca suddhipañño;

Kaṇhaṃ sukkaṃ upātivatto,

Paṇḍito tādi pavuccate tathattā. (17)

533.

624 Asatañca satañca ñatvā dhammaṃ,

Ajjhattaṃ bahiddhā ca sabbaloke;

Devamanussehi pūjanīyo,

Saṅgaṃ jālamaticca so munī”ti. (18)

625 Atha kho sabhiyo paribbājako…pe…  bhagavantaṃ uttariṃ pañhaṃ apucchi—

534.

626 “Kiṃpattinamāhu vedaguṃ, (iti sabhiyo)

Anuviditaṃ kena kathañca viriyavāti;

Ājāniyo kinti nāma hoti,

Puṭṭho me bhagavā byākarohi”. (19)

535.

627 “Vedāni viceyya kevalāni, (sabhiyāti bhagavā)

Samaṇānaṃ yānidhatthi brāhmaṇānaṃ;

Sabbavedanāsu vītarāgo,

Sabbaṃ vedamaticca vedagū so. (20)

536.

628 Anuvicca papañcanāmarūpaṃ,

Ajjhattaṃ bahiddhā ca rogamūlaṃ;

Sabbarogamūlabandhanā pamutto,

Anuvidito tādi pavuccate tathattā. (21)

537.

629 Virato idha sabbapāpakehi,

Nirayadukkhaṃ aticca viriyavāso;

So vīriyavā padhānavā,

Dhīro tādi pavuccate tathattā. (22)

538.

630 Yassassu lunāni bandhanāni,

Ajjhattaṃ bahiddhā ca saṅgamūlaṃ;

Sabbasaṅgamūlabandhanā pamutto,

Ājāniyo tādi pavuccate tathattā”ti. (23)

631 Atha kho sabhiyo paribbājako…pe…  bhagavantaṃ uttariṃ pañhaṃ apucchi—

539.

632 “Kiṃpattinamāhu sottiyaṃ, (iti sabhiyo)

Ariyaṃ kena kathañca caraṇavāti;

Paribbājako kinti nāma hoti,

Puṭṭho me bhagavā byākarohi”. (24)

540.

633 “Sutvā sabbadhammaṃ abhiññāya loke, (sabhiyāti bhagavā)

Sāvajjānavajjaṃ yadatthi kiñci;

Abhibhuṃ akathaṃkathiṃ vimuttaṃ,

Anighaṃ sabbadhimāhu sottiyoti. (25)

541.

634 Chetvā āsavāni ālayāni,

Vidvā so na upeti gabbhaseyyaṃ;

Saññaṃ tividhaṃ panujja paṅkaṃ,

Kappaṃ neti tamāhu ariyoti. (26)

542.

635 Yo idha caraṇesu pattipatto,

Kusalo sabbadā ājānāti dhammaṃ;

Sabbattha na sajjati vimuttacitto,

Paṭighā yassa na santi caraṇavā so. (27)

543.

636 Dukkhavepakkaṃ yadatthi kammaṃ,

Uddhamadho tiriyaṃ vāpi majjhe;

Paribbājayitvā pariññacārī,

Māyaṃ mānamathopi lobhakodhaṃ;

Pariyantamakāsi nāmarūpaṃ,

Taṃ paribbājakamāhu pattipattan”ti. (28)

637 Atha kho sabhiyo paribbājako bhagavato bhāsitaṃ abhinanditvā anumoditvā attamano pamudito udaggo pītisomanassajāto uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ sammukhā sāruppāhi gāthāhi abhitthavi—

544.

638 “Yāni ca tīṇi yāni ca saṭṭhi,

Samaṇappavādasitāni bhūripañña;

Saññakkharasaññanissitāni,

Osaraṇāni vineyya oghatamagā. (29)

545.

639 Antagūsi pāragū dukkhassa,

Arahāsi sammāsambuddho khīṇāsavaṃ taṃ maññe;

Jutimā mutimā pahūtapañño,

Dukkhassantakara atāresi maṃ. (30)

546.

640 Yaṃ me kaṅkhitamaññāsi,

Vicikicchā maṃ tārayi namo te;

Muni monapathesu pattipatta,

Akhila ādiccabandhu soratosi. (31)

547.

641 Yā me kaṅkhā pure āsi,

Taṃ me byākāsi cakkhumā;

Addhā munīsi sambuddho,

Natthi nīvaraṇā tava. (32)

548.

642 Upāyāsā ca te sabbe,

Viddhastā vinaḷīkatā;

Sītibhūto damappatto,

Dhitimā saccanikkamo. (33)

549.

643 Tassa te nāganāgassa,

Mahāvīrassa bhāsato;

Sabbe devānumodanti,

Ubho nāradapabbatā. (34)

550.

644 Namo te purisājañña,

Namo te purisuttama;

Sadevakasmiṃ lokasmiṃ,

Natthi te paṭipuggalo. (35)

551.

645 Tuvaṃ buddho tuvaṃ satthā,

Tuvaṃ mārābhibhū muni;

Tuvaṃ anusaye chetvā,

Tiṇṇo tāresi maṃ pajaṃ. (36)

552.

646 Upadhī te samatikkantā,

Āsavā te padālitā;

Sīhosi anupādāno,

Pahīnabhayabheravo. (37)

553.

647 Puṇḍarīkaṃ yathā vaggu,

Toye na upalimpati;

Evaṃ puññe ca pāpe ca,

Ubhaye tvaṃ na limpasi;

Pāde vīra pasārehi,

Sabhiyo vandati satthuno”ti. (38)

648 Atha kho sabhiyo paribbājako bhagavato pādesu sirasā nipatitvā bhagavantaṃ etadavoca—  “abhikkantaṃ, bhante…pe…  esāhaṃ bhagavantaṃ saraṇaṃ gacchāmi dhammañca bhikkhusaṃghañca; labheyyāhaṃ, bhante, bhagavato santike pabbajjaṃ, labheyyaṃ upasampadan”ti.

649 “Yo kho, sabhiya, aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, so cattāro māse parivasati; catunnaṃ māsānaṃ accayena āraddhacittā bhikkhū pabbājenti, upasampādenti bhikkhubhāvāya. Api ca mettha puggalavemattatā viditā”ti.

650 “Sace, bhante, aññatitthiyapubbā imasmiṃ dhammavinaye ākaṅkhantā pabbajjaṃ, ākaṅkhantā upasampadaṃ cattāro māse parivasanti, catunnaṃ māsānaṃ accayena āraddhacittā bhikkhū pabbājenti, upasampādenti bhikkhubhāvāya, ahaṃ cattāri vassāni parivasissāmi; catunnaṃ vassānaṃ accayena āraddhacittā bhikkhū pabbājentu upasampādentu bhikkhubhāvāyā”ti. Alattha kho sabhiyo paribbājako bhagavato santike pabbajjaṃ alattha upasampadaṃ…pe…  aññataro kho panāyasmā sabhiyo arahataṃ ahosīti.

651 Sabhiyasuttaṃ chaṭṭhaṃ.