Cūḷavagga
Sammāparibbājanīyasutta
362. 419 [218] “Pucchāmi muniṁ pahūtapaññaṁ,
Tiṇṇaṁ pāraṅgataṁ parinibbutaṁ ṭhitattaṁ;
Nikkhamma gharā panujja kāme,
Kathaṁ bhikkhu sammā so loke paribbajeyya”. (1)
363. 420 “Yassa maṅgalā samūhatā, (iti bhagavā)
Uppātā supinā ca lakkhaṇā ca;
So maṅgaladosavippahīno,
Sammā so loke paribbajeyya. (2)
364. 421 Rāgaṁ vinayetha mānusesu,
Dibbesu kāmesu cāpi bhikkhu;
Atikkamma bhavaṁ samecca dhammaṁ,
Sammā so loke paribbajeyya. (3)
365. 422 Vipiṭṭhikatvāna pesuṇāni,
Kodhaṁ kadarīyaṁ jaheyya bhikkhu;
Anurodhavirodhavippahīno,
Sammā so loke paribbajeyya. (4)
366. 423 Hitvāna piyañca appiyañca,
Anupādāya anissito kuhiñci;
Saṁyojaniyehi vippamutto,
Sammā so loke paribbajeyya. (5)
367. 424 Na so upadhīsu sārameti,
Ādānesu vineyya chandarāgaṁ;
So anissito anaññaneyyo,
Sammā so loke paribbajeyya. (6)
368. 425 [219] Vacasā manasā ca kammunā ca,
Aviruddho sammā viditvā dhammaṁ;
Nibbānapadābhipatthayāno,
Sammā so loke paribbajeyya. (7)
369. 426 Yo vandati manti nunnameyya[220],
Akkuṭṭhopi na sandhiyetha bhikkhu;
Laddhā parabhojanaṁ na majje,
Sammā so loke paribbajeyya. (8)
370. 427 Lobhañca[221] bhavañca vippahāya,
Virato chedanabandhanā ca bhikkhu;
So tiṇṇakathaṁkatho visallo,
Sammā so loke paribbajeyya. (9)
371. 428 Sāruppaṁ attano viditvā,
No ca bhikkhu hiṁseyya kañci loke;
Yathātathiyaṁ viditvā dhammaṁ,
Sammā so loke paribbajeyya. (10)
372. 429 Yassānusayā na santi keci,
Mūlā ca[222] akusalā samūhatāse;
So nirāso[223] anāsisāno[224],
Sammā so loke paribbajeyya. (11)
373. 430 Āsavakhīṇo pahīnamāno,
Sabbaṁ rāgapathaṁ upātivatto;
Danto parinibbuto ṭhitatto,
Sammā so loke paribbajeyya. (12)
374. 431 Saddho sutavā niyāmadassī,
Vaggagatesu na vaggasāri dhīro;
Lobhaṁ dosaṁ vineyya paṭighaṁ,
Sammā so loke paribbajeyya. (13)
375. 432 Saṁsuddhajino vivaṭṭacchado,
Dhammesu vasī pāragū anejo;
Saṅkhāranirodhañāṇakusalo,
Sammā so loke paribbajeyya. (14)
376. 433 Atītesu anāgatesu cāpi,
Kappātīto aticcasuddhipañño;
Sabbāyatanehi vippamutto,
Sammā so loke paribbajeyya. (15)
377. 434 Aññāya padaṁ samecca dhammaṁ,
Vivaṭaṁ disvāna pahānamāsavānaṁ;
Sabbupadhīnaṁ parikkhayāno[225],
Sammā so loke paribbajeyya”. (16)
378. 435 “Addhā hi bhagavā tatheva etaṁ,
Yo so evaṁvihārī danto bhikkhu;
Sabbasaṁyojanayogavītivatto,
Sammā so loke paribbajeyyā”ti. (17) [226]
436 Sammāparibbājanīyasuttaṁ[227] terasamaṁ.
- sammāparibbājaniyasuttaṁ (syā1-3), sammāparibbājaniyasutta (pā1) (Word Variant) ↩
- 27Pe:289 (Cross Reference) ↩
- nunnameyya: na uṇṇameyya (sī, syā1-3, pā1), nuṇṇameyya (bahūsu) (Word Variant) ↩
- ca: chedanabandhanāto (sī, pā1), chedanabandhanato (syā1-3) (Word Variant) ↩
- ca: mūlā (sī, syā1-3, pā1) (Word Variant) ↩
- nirāso: nirāsayo (sī, pā1), nirāsaso (syā1-3) (Word Variant) ↩
- anāsisāno: anāsayāno (sī), anāsasāno (syā1-3, pā1) (Word Variant) ↩
- parikkhayāno: parikkhayā (syā1-3, pā1) (Word Variant) ↩
- Sabbasaṁyojanayogavītivatto: sabbasaṁyojaniye ca vītivatto (sī, syā1-3, pā1) (Word Variant) ↩
- Sammāparibbājanīyasuttaṁ: sammāparibbājaniyasuttaṁ (syā1-3, pā1) (Word Variant) ↩