3.2.4 Addhāsutta

Tikanipāta

Dutiyavagga

Addhāsutta

63. 406 Vuttañhetaṃ bhagavatā vuttamarahatāti me sutaṃ—

407 “Tayome, bhikkhave, addhā. Katame tayo? Atīto addhā, anāgato addhā, paccuppanno addhā— ime kho, bhikkhave, tayo addhā”ti. Etamatthaṃ bhagavā avoca. Tatthetaṃ iti vuccati—

408 “Akkheyyasaññino sattā,

akkheyyasmiṃ patiṭṭhitā;

Akkheyyaṃ apariññāya,

yogamāyanti maccuno.

409 Akkheyyañca pariññāya,

akkhātāraṃ na maññati;

Phuṭṭho vimokkho manasā,

santipadamanuttaraṃ.

410 Sa ve akkheyyasampanno,

santo santipade rato;

Saṅkhāyasevī dhammaṭṭho,

saṅkhyaṃ nopeti vedagū”ti.

411 Ayampi attho vutto bhagavatā, iti me sutanti.

412 Catutthaṃ.