1.8.7 Issariyasutta

77.

351 “Kiṃsu issariyaṃ loke,

kiṃsu bhaṇḍānamuttamaṃ;

Kiṃsu satthamalaṃ loke,

kiṃsu lokasmimabbudaṃ.

352 Kiṃsu harantaṃ vārenti,

haranto pana ko piyo;

Kiṃsu punappunāyantaṃ,

abhinandanti paṇḍitā”ti.

353 “Vaso issariyaṃ loke,

itthī bhaṇḍānamuttamaṃ;

Kodho satthamalaṃ loke,

corā lokasmimabbudā.

354 Coraṃ harantaṃ vārenti,

haranto samaṇo piyo;

Samaṇaṃ punappunāyantaṃ,

abhinandanti paṇḍitā”ti.