1.4.7 Samayasutta

Devatāsaṃyutta

Satullapakāyikavagga

Samayasutta

37. 205 Evaṃ me sutaṃ— ekaṃ samayaṃ bhagavā sakkesu viharati kapilavatthusmiṃ mahāvane mahatā bhikkhusaṃghena saddhiṃ pañcamattehi bhikkhusatehi sabbeheva arahantehi; dasahi ca lokadhātūhi devatā yebhuyyena sannipatitā honti bhagavantaṃ dassanāya bhikkhusaṃghañca. Atha kho catunnaṃ suddhāvāsakāyikānaṃ devatānaṃ etadahosi— “ayaṃ kho bhagavā sakkesu viharati kapilavatthusmiṃ mahāvane mahatā bhikkhusaṃghena saddhiṃ pañcamattehi bhikkhusatehi sabbeheva arahantehi; dasahi ca lokadhātūhi devatā yebhuyyena sannipatitā honti bhagavantaṃ dassanāya bhikkhusaṃghañca. Yannūna mayampi yena bhagavā tenupasaṅkameyyāma; upasaṅkamitvā bhagavato santike paccekaṃ gāthaṃ bhāseyyāmā”ti.

206 Atha kho tā devatā— seyyathāpi nāma balavā puriso samiñjitaṃ vā bāhaṃ pasāreyya pasāritaṃ vā bāhaṃ samiñjeyya; evameva— suddhāvāsesu devesu antarahitā bhagavato purato pāturahesuṃ. Atha kho tā devatā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ gāthaṃ abhāsi—

207 “Mahāsamayo pavanasmiṃ,

Devakāyā samāgatā;

Āgatamha imaṃ dhammasamayaṃ,

Dakkhitāye aparājitasaṃghan”ti.

208 Atha kho aparā devatā bhagavato santike imaṃ gāthaṃ abhāsi—

209 “Tatra bhikkhavo samādahaṃsu,

Cittamattano ujukaṃ akaṃsu;

Sārathīva nettāni gahetvā,

Indriyāni rakkhanti paṇḍitā”ti.

210 Atha kho aparā devatā bhagavato santike imaṃ gāthaṃ abhāsi—

211 “Chetvā khīlaṃ chetvā palighaṃ,

Indakhīlaṃ ūhacca manejā;

Te caranti suddhā vimalā,

Cakkhumatā sudantā susunāgā”ti.

212 Atha kho aparā devatā bhagavato santike imaṃ gāthaṃ abhāsi—

213 “Ye keci buddhaṃ saraṇaṃ gatāse,

Na te gamissanti apāyabhūmiṃ;

Pahāya mānusaṃ dehaṃ,

Devakāyaṃ paripūressantī”ti.