Pātimokkhaṭṭhapanakkhandhaka

Codakacuditakapaṭisaṃyuttakathā

401. 1936 “Adhammacodakassa, bhante, bhikkhuno katihākārehi vippaṭisāro upadahātabbo”ti? “Adhammacodakassa, upāli, bhikkhuno pañcahākārehi vippaṭisāro upadahātabbo—  akālenāyasmā codesi, no kālena, alaṃ te vippaṭisārāya; abhūtenāyasmā codesi, no bhūtena, alaṃ te vippaṭisārāya; pharusenāyasmā codesi, no saṇhena, alaṃ te vippaṭisārāya; anatthasaṃhitenāyasmā codesi, no atthasaṃhitena, alaṃ te vippaṭisārāya; dosantaro āyasmā codesi, no mettacitto, alaṃ te vippaṭisārāyāti. Adhammacodakassa, upāli, bhikkhuno imehi pañcahākārehi vippaṭisāro upadahātabbo. Taṃ kissa hetu? Yathā na aññopi bhikkhu abhūtena codetabbaṃ maññeyyā”ti.

1937 “Adhammacuditassa pana, bhante, bhikkhuno katihākārehi avippaṭisāro upadahātabbo”ti? “Adhammacuditassa, upāli, bhikkhuno pañcahākārehi avippaṭisāro upadahātabbo—  akālenāyasmā cudito, no kālena, alaṃ te avippaṭisārāya; abhūtenāyasmā cudito, no bhūtena, alaṃ te avippaṭisārāya; pharusenāyasmā cudito, no saṇhena, alaṃ te avippaṭisārāya; anatthasaṃhitenāyasmā cudito, no atthasaṃhitena, alaṃ te avippaṭisārāya; dosantarenāyasmā cudito, no mettacittena, alaṃ te avippaṭisārāyāti. Adhammacuditassa, upāli, bhikkhuno imehi pañcahākārehi avippaṭisāro upadahātabbo”ti.

1938 “Dhammacodakassa, bhante, bhikkhuno katihākārehi avippaṭisāro upadahātabbo”ti? “Dhammacodakassa, upāli, bhikkhuno pañcahākārehi avippaṭisāro upadahātabbo—  kālenāyasmā codesi, no akālena, alaṃ te avippaṭisārāya; bhūtenāyasmā codesi, no abhūtena, alaṃ te avippaṭisārāya; saṇhenāyasmā codesi, no pharusena, alaṃ te avippaṭisārāya; atthasaṃhitenāyasmā codesi, no anatthasaṃhitena, alaṃ te avippaṭisārāya; mettacitto āyasmā codesi, no dosantaro, alaṃ te avippaṭisārāyāti. Dhammacodakassa, upāli, bhikkhuno imehi pañcahākārehi avippaṭisāro upadahātabbo. Taṃ kissa hetu? Yathā aññopi bhikkhu bhūtena codetabbaṃ maññeyyā”ti.

1939 “Dhammacuditassa pana, bhante, bhikkhuno katihākārehi vippaṭisāro upadahātabbo”ti? “Dhammacuditassa, upāli, bhikkhuno pañcahākārehi vippaṭisāro upadahātabbo—  kālenāyasmā cudito, no akālena, alaṃ te vippaṭisārāya; bhūtenāyasmā cudito, no abhūtena, alaṃ te vippaṭisārāya; saṇhenāyasmā cudito, no pharusena, alaṃ te vippaṭisārāya; atthasaṃhitenāyasmā cudito, no anatthasaṃhitena, alaṃ te vippaṭisārāya; mettacittenāyasmā cudito, no dosantarena, alaṃ te vippaṭisārāyāti. Dhammacuditassa, upāli, bhikkhuno imehi pañcahākārehi vippaṭisāro upadahātabbo”ti.

1940 “Codakena, bhante, bhikkhunā paraṃ codetukāmena kati dhamme ajjhattaṃ manasi karitvā paro codetabbo”ti? “Codakenupāli, bhikkhunā paraṃ codetukāmena pañca dhamme ajjhattaṃ manasi karitvā paro codetabbo—  kāruññatā, hitesitā, anukampitā, āpattivuṭṭhānatā, vinayapurekkhāratāti. Codakenupāli, bhikkhunā paraṃ codetukāmena ime pañca dhamme ajjhattaṃ manasi karitvā paro codetabbo”ti.

1941 “Cuditena pana, bhante, bhikkhunā katisu dhammesu patiṭṭhātabban”ti? “Cuditenupāli, bhikkhunā dvīsu dhammesu patiṭṭhātabbaṃ—  sacce ca akuppe cā”ti.

1942 Dutiyabhāṇavāro niṭṭhito.
Pātimokkhaṭṭhapanakkhandhako navamo.
Imamhi khandhake vatthū tiṃsa.

1943 Tassuddānaṃ

1944 Uposathe yāvatikaṃ,

pāpabhikkhu na nikkhami;

Moggallānena nicchuddho,

accherā jinasāsane.

1945 Ninnonupubbasikkhā ca,

ṭhitadhammo nātikkamma;

Kuṇapukkhipati saṃgho,

savantiyo jahanti ca.

1946 Savanti parinibbanti,

ekarasa vimutti ca;

Bahu dhammavinayopi,

bhūtaṭṭhāriyapuggalā.

1947 Samuddaṃ upamaṃ katvā,

vācesi sāsane guṇaṃ;

Uposathe pātimokkhaṃ,

na amhe koci jānāti.

1948 Paṭikacceva ujjhanti,

eko dve tīṇi cattāri;

Pañca cha satta aṭṭhāni,

navā ca dasamāni ca.

1949 Sīlaācāradiṭṭhi ca,

ājīvaṃ catubhāgike;

Pārājikañca saṃghādi,

pācitti pāṭidesani.

1950 Dukkaṭaṃ pañcabhāgesu,

sīlācāravipatti ca;

Akatāya katāya ca,

chabhāgesu yathāvidhi.

1951 Pārājikañca saṃghādi,

thullaṃ pācittiyena ca;

Pāṭidesaniyañceva,

dukkaṭañca dubbhāsitaṃ.

1952 Sīlācāravipatti ca,

Diṭṭhiājīvavipatti;

Yā ca aṭṭhā katākate,

Tenetā sīlācāradiṭṭhiyā.

1953 Akatāya katāyāpi,

katākatāyameva ca;

Evaṃ navavidhā vuttā,

yathābhūtena ñāyato.

1954 Pārājiko vippakatā,

paccakkhāto tatheva ca;

Upeti paccādiyati,

paccādānakathā ca yā.

1955 Sīlācāravipatti ca,

tathā diṭṭhivipattiyā;

Diṭṭhasutaparisaṅkitaṃ,

dasadhā taṃ vijānātha.

1956 Bhikkhu vipassati bhikkhuṃ,

añño cārocayāti taṃ;

Soyeva tassa akkhāti,

pātimokkhaṃ ṭhapeti so.

1957 Vuṭṭhāti antarāyena,

Rājacoraggudakā ca;

Manussaamanussā ca,

Vāḷasarīsapā jīvibrahmaṃ.

1958 Dasannamaññatarena,

tasmiṃ aññataresu vā;

Dhammikādhammikā ceva,

yathā maggena jānātha.

1959 Kālabhūtatthasaṃhitaṃ,

labhissāmi bhavissati;

Kāyavācasikā mettā,

bāhusaccaṃ ubhayāni.

1960 Kālabhūtena saṇhena,

atthamettena codaye;

Vippaṭisāradhammena,

tathā vācā vinodaye.

1961 Dhammacodacuditassa,

vinodeti vippaṭisāro;

Karuṇā hitānukampi,

vuṭṭhānapurekkhārato.

1962 Codakassa paṭipatti,

sambuddhena pakāsitā;

Sacce ceva akuppe ca,

cuditasseva dhammatāti.

1963 Pātimokkhaṭṭhapanakkhandhako niṭṭhito.