Vattakkhandhaka

Antevāsikavattakathā

381. 1755 Tena kho pana samayena ācariyā antevāsikesu na sammā vattanti. Ye te bhikkhū appicchā…pe…  te ujjhāyanti khiyyanti vipācenti—  “kathañhi nāma ācariyā antevāsikesu na sammā vattissantī”ti. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṃghaṃ sannipātāpetvā bhikkhū paṭipucchi—  “saccaṃ kira, bhikkhave, ācariyā antevāsikesu na sammā vattantī”ti? “Saccaṃ, bhagavā”ti…pe…  vigarahitvā…pe…  dhammiṃ kathaṃ katvā bhikkhū āmantesi—

382. 1756 “Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā—

1757 Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ—  kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ—  kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ—  kinti nu kho antevāsikassa parikkhāro uppajjiyethāti.

1758 Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti, bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ. Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.

1759 Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.

1760 Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ—  mā majjhe bhaṅgo ahosīti. Obhoge kāyabandhanaṃ kātabbaṃ.

1761 Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe…  cīvaraṃ nikkhipantena…pe…  pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.

1762 Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.

1763 Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.

1764 Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.

1765 Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe…  ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.

1766 Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ—  kinti nu kho saṃgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ—  kinti nu kho saṃgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ—  kinti nu kho saṃgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ—  kinti nu kho saṃgho antevāsikaṃ abbheyyāti. Sace saṃgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ—  kinti nu kho saṃgho antevāsikassa kammaṃ na kareyya, lahukāya vā pariṇāmeyyāti. Kataṃ vā panassa hoti, saṃghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ—  kinti nu kho antevāsiko sammā vatteyya, lomaṃ pāteyya, netthāraṃ vatteyya, saṃgho taṃ kammaṃ paṭippassambheyyāti.

1767 Sace antevāsikassa cīvaraṃ dhovitabbaṃ hoti, ācariyena ācikkhitabbaṃ—  evaṃ dhoveyyāsīti, ussukkaṃ vā kātabbaṃ—  kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ—  evaṃ kareyyāsīti, ussukkaṃ vā kātabbaṃ—  kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ—  evaṃ paceyyāsīti, ussukkaṃ vā kātabbaṃ—  kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ—  evaṃ rajeyyāsīti, ussukkaṃ vā kātabbaṃ—  kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabban”ti.

1768 Vattakkhandhako aṭṭhamo.
Imamhi khandhake vatthū ekūnavīsati, vattā cuddasa.

1769 Tassuddānaṃ

1770 Saupāhanā chattā ca,

oguṇṭhi sīsaṃ pānīyaṃ;

Nābhivāde na pucchanti,

ahi ujjhanti pesalā.

1771 Omuñci chattaṃ khandhe ca,

atarañca paṭikkamaṃ;

Pattacīvaraṃ nikkhipā,

patirūpañca pucchitā.

1772 Āsiñceyya dhovitena,

sukkhenallenupāhanā;

Vuḍḍho navako puccheyya,

ajjhāvuṭṭhañca gocarā.

1773 Sekkhā vaccā pānī pari,

kattaraṃ katikaṃ tato;

Kālaṃ muhuttaṃ uklāpo,

bhūmattharaṇaṃ nīhare.

1774 Paṭipādo bhisibibbo,

mañcapīṭhañca mallakaṃ;

Apassenullokakaṇṇā,

gerukā kāḷa akatā.

1775 Saṅkārañca bhūmattharaṇaṃ,

paṭipādakaṃ mañcapīṭhaṃ;

Bhisi nisīdanampi,

mallakaṃ apassena ca.

1776 Pattacīvaraṃ bhūmi ca,

pārantaṃ orato bhogaṃ;

Puratthimā pacchimā ca,

uttarā atha dakkhiṇā.

1777 Sītuṇhe ca divārattiṃ,

pariveṇañca koṭṭhako;

Upaṭṭhānaggi sālā ca,

vattaṃ vaccakuṭīsu ca.

1778 Pānī paribhojaniyā,

kumbhi ācamanesu ca;

Anopamena paññattaṃ,

vattaṃ āgantukehime.

1779 Nevāsanaṃ na udakaṃ,

na paccu na ca pāniyaṃ;

Nābhivāde na paññape,

ujjhāyanti ca pesalā.

1780 Vuḍḍhāsanañca udakaṃ,

paccuggantvā ca pāniyaṃ;

Upāhane ekamantaṃ,

abhivāde ca paññape.

1781 Vutthaṃ gocarasekkho ca,

ṭhānaṃ pāniyabhojanaṃ;

Kattaraṃ katikaṃ kālaṃ,

navakassa nisinnake.

1782 Abhivādaye ācikkhe,

yathā heṭṭhā tathā naye;

Niddiṭṭhaṃ satthavāhena,

vattaṃ āvāsikehime.

1783 Gamikā dārumatti ca,

vivaritvā na pucchiya;

Nassanti ca aguttañca,

ujjhāyanti ca pesalā.

1784 Paṭisāmetvā thaketvā,

āpucchitvāva pakkame;

Bhikkhu vā sāmaṇero vā,

ārāmiko upāsako.

1785 Pāsāṇakesu ca puñjaṃ,

paṭisāme thakeyya ca;

Sace ussahati ussukkaṃ,

anovasse tatheva ca.

1786 Sabbo ovassati gāmaṃ,

ajjhokāse tatheva ca;

Appevaṅgāni seseyyuṃ,

vattaṃ gamikabhikkhunā.

1787 Nānumodanti therena,

ohāya catupañcahi;

Vaccito mucchito āsi,

vattānumodanesume.

1788 Chabbaggiyā dunnivatthā,

athopi ca duppārutā;

Anākappā ca vokkamma,

there anupakhajjane.

1789 Nave bhikkhū ca saṅghāṭi,

ujjhāyanti ca pesalā;

Timaṇḍalaṃ nivāsetvā,

kāyasaguṇagaṇṭhikā.

1790 Na vokkamma paṭicchannaṃ,

susaṃvutokkhittacakkhu;

Ukkhittojjagghikāsaddo,

tayo ceva pacālanā.

1791 Khambhoguṇṭhiukkuṭikā,

paṭicchannaṃ susaṃvuto;

Okkhittukkhittaujjagghi,

appasaddo tayo calā.

1792 Khambhoguṇṭhipallatthi ca,

anupakhajja nāsane;

Ottharitvāna udake,

nīcaṃ katvāna siñciyā.

1793 Paṭi sāmantā saṅghāṭi,

odane ca paṭiggahe;

Sūpaṃ uttaribhaṅgena,

sabbesaṃ samatitthi ca.

1794 Sakkaccaṃ pattasaññī ca,

sapadānañca sūpakaṃ;

Na thūpato paṭicchāde,

viññattujjhānasaññinā.

1795 Mahantamaṇḍaladvāraṃ,

sabbahattho na byāhare;

Ukkhepo chedanāgaṇḍa,

dhunaṃ sitthāvakārakaṃ.

1796 Jivhānicchārakañceva,

capucapu surusuru;

Hatthapattoṭṭhanillehaṃ,

sāmisena paṭiggahe.

1797 Yāva na sabbe udake,

nīcaṃ katvāna siñciyaṃ;

Paṭi sāmantā saṅghāṭi,

nīcaṃ katvā chamāya ca.

1798 Sasitthakaṃ nivattante,

suppaṭicchannamukkuṭi;

Dhammarājena paññattaṃ,

idaṃ bhattaggavattanaṃ.

1799 Dunnivatthā anākappā,

asallakkhetvā ca sahasā;

Dūre acca ciraṃ lahuṃ,

tatheva piṇḍacāriko.

1800 Paṭicchannova gaccheyya,

susaṃvutokkhittacakkhu;

Ukkhittojjagghikāsaddo,

tayo ceva pacālanā.

1801 Khambhoguṇṭhiukkuṭikā,

sallakkhetvā ca sahasā;

Dūre acca ciraṃ lahuṃ,

āsanakaṃ kaṭacchukā.

1802 Bhājanaṃ vā ṭhapeti ca,

uccāretvā paṇāmetvā;

Paṭiggahe na ulloke,

sūpesupi tatheva taṃ.

1803 Bhikkhu saṅghāṭiyā chāde,

paṭicchanneva gacchiyaṃ;

Saṃvutokkhittacakkhu ca,

ukkhittojjagghikāya ca;

Appasaddo tayo cālā,

khambhoguṇṭhikaukkuṭi.

1804 Paṭhamāsanavakkāra,

pāniyaṃ paribhojanī;

Pacchākaṅkhati bhuñjeyya,

opilāpeyya uddhare.

1805 Paṭisāmeyya sammajje,

rittaṃ tucchaṃ upaṭṭhape;

Hatthavikāre bhindeyya,

vattidaṃ piṇḍacārike.

1806 Pānī pari aggiraṇi,

nakkhattadisacorā ca;

Sabbaṃ natthīti koṭṭetvā,

pattaṃse cīvaraṃ tato.

1807 Idāni aṃse laggetvā,

timaṇḍalaṃ parimaṇḍalaṃ;

Yathā piṇḍacārivattaṃ,

naye āraññakesupi.

1808 Pattaṃse cīvaraṃ sīse,

ārohitvā ca pāniyaṃ;

Paribhojaniyaṃ aggi,

araṇī cāpi kattaraṃ.

1809 Nakkhattaṃ sappadesaṃ vā,

disāpi kusalo bhave;

Sattuttamena paññattaṃ,

vattaṃ āraññakesume.

1810 Ajjhokāse okiriṃsu,

ujjhāyanti ca pesalā;

Sace vihāro uklāpo,

paṭhamaṃ pattacīvaraṃ.

1811 Bhisibibbohanaṃ mañcaṃ,

pīṭhañca kheḷamallakaṃ;

Apassenullokakaṇṇā,

gerukā kāḷa akatā.

1812 Saṅkāraṃ bhikkhusāmantā,

senāvihārapāniyaṃ;

Paribhojanasāmantā,

paṭivāte ca aṅgaṇe.

1813 Adhovāte attharaṇaṃ,

paṭipādakamañco ca;

Pīṭhaṃ bhisi nisīdanaṃ,

mallakaṃ apassena ca.

1814 Pattacīvaraṃ bhūmi ca,

pārantaṃ orato bhogaṃ;

Puratthimā ca pacchimā,

uttarā atha dakkhiṇā.

1815 Sītuṇhe ca divā rattiṃ,

pariveṇañca koṭṭhako;

Upaṭṭhānaggisālā ca,

vaccakuṭī ca pāniyaṃ.

1816 Ācamanakumbhi vuḍḍhe ca,

uddesapucchanā sajjhā;

Dhammo padīpaṃ vijjhāpe,

na vivare napi thake.

1817 Yena vuḍḍho parivatti,

kaṇṇenapi na ghaṭṭaye;

Paññapesi mahāvīro,

vattaṃ senāsanesu taṃ.

1818 Nivāriyamānā dvāraṃ,

mucchitujjhanti pesalā;

Chārikaṃ chaḍḍaye jantā,

paribhaṇḍaṃ tatheva ca.

1819 Pariveṇaṃ koṭṭhako sālā,

cuṇṇamattikadoṇikā;

Mukhaṃ purato na there,

na nave ussahati sace.

1820 Purato uparimaggo,

cikkhallaṃ matti pīṭhakaṃ;

Vijjhāpetvā thaketvā ca,

vattaṃ jantāgharesume.

1821 Nācameti yathāvuḍḍhaṃ,

paṭipāṭi ca sahasā;

Ubbhaji nitthuno kaṭṭhaṃ,

vaccaṃ passāva kheḷakaṃ.

1822 Pharusā kūpa sahasā,

ubbhaji capu sesena;

Bahi anto ca ukkāse,

rajju ataramānañca.

1823 Sahasā ubbhaji ṭhite,

nitthune kaṭṭha vaccañca;

Passāva kheḷa pharusā,

kūpañca vaccapāduke.

1824 Nātisahasā ubbhaji,

pādukāya capucapu;

Na sesaye paṭicchāde,

uhatapidharena ca.

1825 Vaccakuṭī paribhaṇḍaṃ,

pariveṇañca koṭṭhako;

Ācamane ca udakaṃ,

vattaṃ vaccakuṭīsume.

1826 Upāhanā dantakaṭṭhaṃ,

mukhodakañca āsanaṃ;

Yāgu udakaṃ dhovitvā,

uddhāruklāpa gāma ca.

1827 Nivāsanā kāyabandhā,

saguṇaṃ pattasodakaṃ;

Pacchā timaṇḍalo ceva,

parimaṇḍala bandhanaṃ.

1828 Saguṇaṃ dhovitvā pacchā,

nātidūre paṭiggahe;

Bhaṇamānassa āpatti,

paṭhamāgantvāna āsanaṃ.

1829 Udakaṃ pīṭhakathali,

paccuggantvā nivāsanaṃ;

Otāpe nidahi bhaṅgo,

obhoge bhuñjitu name.

1830 Pānīyaṃ udakaṃ nīcaṃ,

muhuttaṃ na ca nidahe;

Pattacīvaraṃ bhūmi ca,

pārantaṃ orato bhogaṃ.

1831 Uddhare paṭisāme ca,

uklāpo ca nahāyituṃ;

Sītaṃ uṇhaṃ jantāgharaṃ,

cuṇṇaṃ mattika piṭṭhito.

1832 Pīṭhañca cīvaraṃ cuṇṇaṃ,

mattikussahati mukhaṃ;

Purato there nave ca,

parikammañca nikkhame.

1833 Purato udake nhāte,

nivāsetvā upajjhāyaṃ;

Nivāsanañca saṅghāṭi,

pīṭhakaṃ āsanena ca.

1834 Pādo pīṭhaṃ kathaliñca,

pānīyuddesapucchanā;

Uklāpaṃ susodheyya,

paṭhamaṃ pattacīvaraṃ.

1835 Nisīdanapaccattharaṇaṃ,

bhisi bibbohanāni ca;

Mañco pīṭhaṃ paṭipādaṃ,

mallakaṃ apassena ca.

1836 Bhūma santāna āloka,

gerukā kāḷa akatā;

Bhūmattharapaṭipādā,

mañco pīṭhaṃ bibbohanaṃ.

1837 Nisīdattharaṇaṃ kheḷa,

apasse pattacīvaraṃ;

Puratthimā pacchimā ca,

uttarā atha dakkhiṇā.

1838 Sītuṇhañca divā rattiṃ,

pariveṇañca koṭṭhako;

Upaṭṭhānaggisālā ca,

vaccapāniyabhojanī.

1839 Ācamaṃ anabhirati,

kukkuccaṃ diṭṭhi ca garu;

Mūlamānattaabbhānaṃ,

tajjanīyaṃ niyassakaṃ.

1840 Pabbāja paṭisāraṇī,

ukkhepañca kataṃ yadi;

Dhove kātabbaṃ rajañca,

raje samparivattakaṃ.

1841 Pattañca cīvarañcāpi,

parikkhārañca chedanaṃ;

Parikammaṃ veyyāvaccaṃ,

pacchā piṇḍaṃ pavisanaṃ.

1842 Na susānaṃ disā ceva,

yāvajīvaṃ upaṭṭhahe;

Saddhivihārikenetaṃ,

vattupajjhāyakesume.

1843 Ovādasāsanuddesā,

pucchā pattañca cīvaraṃ;

Parikkhāro gilāno ca,

na pacchāsamaṇo bhave.

1844 Upajjhāyesu ye vattā,

evaṃ ācariyesupi;

Saddhivihārike vattā,

tatheva antevāsike.

1845 Āgantukesu ye vattā,

puna āvāsikesu ca;

Gamikānumodanikā,

bhattagge piṇḍacārike.

1846 Āraññakesu yaṃ vattaṃ,

yañca senāsanesupi;

Jantāghare vaccakuṭī,

upajjhā saddhivihārike.

1847 Ācariyesu yaṃ vattaṃ,

tatheva antevāsike;

Ekūnavīsati vatthū,

vattā cuddasa khandhake.

1848 Vattaṃ aparipūrento,

na sīlaṃ paripūrati;

Asuddhasīlo duppañño,

cittekaggaṃ na vindati.

1849 Vikkhittacittonekaggo,

sammā dhammaṃ na passati;

Apassamāno saddhammaṃ,

dukkhā na parimuccati.

1850 Yaṃ vattaṃ paripūrento,

sīlampi paripūrati;

Visuddhasīlo sappañño,

cittekaggampi vindati.

1851 Avikkhittacitto ekaggo,

sammā dhammaṃ vipassati;

Sampassamāno saddhammaṃ,

dukkhā so parimuccati.

1852 Tasmā hi vattaṃ pūreyya,

jinaputto vicakkhaṇo;

Ovādaṃ buddhaseṭṭhassa,

tato nibbānamehitīti.

1853 Vattakkhandhako niṭṭhito.