6.3.2 Avebhaṅgiyavatthu

Senāsanakkhandhaka

Tatiyabhāṇavāra

Avebhaṅgiyavatthu

322. 1390 Atha kho bhagavā sāvatthiyaṃ yathābhirantaṃ viharitvā yena kīṭāgiri tena cārikaṃ pakkāmi mahatā bhikkhusaṃghena saddhiṃ pañcamattehi bhikkhusatehi sāriputtamoggallānehi ca. Assosuṃ kho assajipunabbasukā bhikkhū—  “bhagavā kira kīṭāgiriṃ āgacchati mahatā bhikkhusaṃghena saddhiṃ pañcamattehi bhikkhusatehi sāriputtamoggallānehi ca. Handa mayaṃ, āvuso, sabbaṃ saṃghikaṃ senāsanaṃ bhājema. Pāpicchā sāriputtamoggallānā, pāpikānaṃ icchānaṃ vasaṃ gatā; na mayaṃ tesaṃ senāsanaṃ paññapessāmā”ti, te sabbaṃ saṃghikaṃ senāsanaṃ bhājesuṃ.

1391 Atha kho bhagavā anupubbena cārikaṃ caramāno yena kīṭāgiri tadavasari. Atha kho bhagavā sambahule bhikkhū āmantesi—  “gacchatha tumhe, bhikkhave; assajipunabbasuke bhikkhū upasaṅkamitvā evaṃ vadetha—  ‘bhagavā, āvuso, āgacchati mahatā bhikkhusaṃghena saddhiṃ pañcamattehi bhikkhusatehi sāriputtamoggallānehi ca. Bhagavato ca, āvuso, senāsanaṃ paññapetha, bhikkhusaṃghassa ca, sāriputtamoggallānānañcā’”ti. “Evaṃ, bhante”ti kho te bhikkhū bhagavato paṭissutvā yena assajipunabbasukā bhikkhū tenupasaṅkamiṃsu, upasaṅkamitvā assajipunabbasuke bhikkhū etadavocuṃ—  “bhagavā, āvuso, āgacchati mahatā bhikkhusaṃghena saddhiṃ pañcamattehi bhikkhusatehi sāriputtamoggallānehi ca. Bhagavato ca, āvuso, senāsanaṃ paññapetha, bhikkhusaṃghassa ca, sāriputtamoggallānānañcā”ti. “Natthāvuso, saṃghikaṃ senāsanaṃ. Sabbaṃ amhehi bhājitaṃ. Svāgataṃ, āvuso, bhagavato. Yasmiṃ vihāre bhagavā icchissati tasmiṃ vihāre vasissati. Pāpicchā sāriputtamoggallānā, pāpikānaṃ icchānaṃ vasaṃ gatā. Na mayaṃ tesaṃ senāsanaṃ paññapessāmā”ti. “Kiṃ pana tumhe, āvuso, saṃghikaṃ senāsanaṃ bhājitthā”ti? “Evamāvuso”ti.

1392 Ye te bhikkhū appicchā…pe…  te ujjhāyanti khiyyanti vipācenti—  “kathañhi nāma assajipunabbasukā bhikkhū saṃghikaṃ senāsanaṃ bhājessantī”ti. Atha kho te bhikkhū bhagavato etamatthaṃ ārocesuṃ…pe…  “saccaṃ kira, bhikkhave…pe…  “saccaṃ, bhagavā”ti. Vigarahi buddho bhagavā…pe…  kathañhi nāma te, bhikkhave, moghapurisā saṃghikaṃ senāsanaṃ bhājessanti? Netaṃ, bhikkhave, appasannānaṃ vā pasādāya…pe…  vigarahitvā…pe…  dhammiṃ kathaṃ katvā bhikkhū āmantesi—

1393 “Pañcimāni, bhikkhave, avebhaṅgiyāni, na vibhajitabbāni, saṃghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassa.

1394 Katamāni pañca? Ārāmo, ārāmavatthu—  idaṃ paṭhamaṃ avebhaṅgiyaṃ, na vibhajitabbaṃ, saṃghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.

1395 Vihāro, vihāravatthu—  idaṃ dutiyaṃ avebhaṅgiyaṃ, na vibhajitabbaṃ, saṃghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.

1396 Mañco, pīṭhaṃ, bhisi, bibbohanaṃ—  idaṃ tatiyaṃ avebhaṅgiyaṃ, na vibhajitabbaṃ, saṃghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.

1397 Lohakumbhī, lohabhāṇakaṃ, lohavārako, lohakaṭāhaṃ, vāsī, parasu, kuṭhārī, kudālo, nikhādanaṃ—  idaṃ catutthaṃ avebhaṅgiyaṃ, na vibhajitabbaṃ, saṃghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa.

1398 Vallī, veḷu, muñjaṃ, pabbajaṃ, tiṇaṃ, mattikā, dārubhaṇḍaṃ, mattikābhaṇḍaṃ—  idaṃ pañcamaṃ avebhaṅgiyaṃ, na vibhajitabbaṃ, saṃghena vā gaṇena vā puggalena vā. Vibhattampi avibhattaṃ hoti. Yo vibhajeyya, āpatti thullaccayassa. Imāni kho, bhikkhave, pañca avebhaṅgiyāni, na vibhajitabbāni, saṃghena vā gaṇena vā puggalena vā. Vibhattānipi avibhattāni honti. Yo vibhajeyya, āpatti thullaccayassā”ti.