tipitaka2500.github.io
-
-
- Khuddakapāṭhapāḷi
- Dhammapadapāḷi
- Udānapāḷi
- Itivuttakapāḷi
- Suttanipātapāḷi
- Vimānavatthupāḷi
- Petavatthupāḷi
- Theragāthāpāḷi
- Therīgāthāpāḷi
- Therāpadānapāḷi
- Therīapadānapāḷi
- Buddhavaṃsapāḷi
- Cariyāpiṭakapāḷi
- Jātakapāḷi
- Jātakapāḷi
- Mahāniddesapāḷi
- Cūḷaniddesapāḷi
- Paṭisambhidāmaggapāḷi
- Nettipāḷi
- Peṭakopadesapāḷi
- Milindapañhapāḷi
-
1.6 Āpattiyāappaṭikammeukkhepanīyakamma
Kammakkhandhaka
Āpattiyāappaṭikammeukkhepanīyakamma
56. 260 Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo āpattiṃ āpajjitvā na icchati āpattiṃ paṭikātuṃ. Ye te bhikkhū appicchā…pe… te ujjhāyanti khiyyanti vipācenti— “kathañhi nāma āyasmā channo āpattiṃ āpajjitvā na icchissati āpattiṃ paṭikātun”ti? Atha kho te bhikkhū bhagavato etamatthaṃ ārocesuṃ.
Kammakkhandhaka
Āpattiyāappaṭikammeukkhepanīyakamma
261 Atha kho bhagavā etasmiṃ nidāne etasmiṃ pakaraṇe bhikkhusaṃghaṃ sannipātāpetvā bhikkhū paṭipucchi— “saccaṃ kira, bhikkhave, channo bhikkhu āpattiṃ āpajjitvā na icchati āpattiṃ paṭikātun”ti? “Saccaṃ, bhagavā”ti. Vigarahi buddho bhagavā— “ananucchavikaṃ…pe… kathañhi nāma so, bhikkhave, moghapuriso āpattiṃ āpajjitvā na icchissati āpattiṃ paṭikātuṃ. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi— “tena hi, bhikkhave, saṃgho channassa bhikkhuno, āpattiyā appaṭikamme, ukkhepanīyakammaṃ karotu— asambhogaṃ saṃghena. Evañca pana, bhikkhave, kātabbaṃ— paṭhamaṃ channo bhikkhu codetabbo, codetvā sāretabbo, sāretvā āpattiṃ āropetabbo, āpattiṃ āropetvā byattena bhikkhunā paṭibalena saṃgho ñāpetabbo—
Kammakkhandhaka
Āpattiyāappaṭikammeukkhepanīyakamma
262 ‘Suṇātu me, bhante, saṃgho. Ayaṃ channo bhikkhu āpattiṃ āpajjitvā na icchati āpattiṃ paṭikātuṃ. Yadi saṃghassa pattakallaṃ, saṃgho channassa bhikkhuno, āpattiyā appaṭikamme, ukkhepanīyakammaṃ kareyya— asambhogaṃ saṃghena. Esā ñatti.
Kammakkhandhaka
Āpattiyāappaṭikammeukkhepanīyakamma
263 Suṇātu me, bhante, saṃgho. Ayaṃ channo bhikkhu āpattiṃ āpajjitvā na icchati āpattiṃ paṭikātuṃ. Saṃgho channassa bhikkhuno, āpattiyā appaṭikamme, ukkhepanīyakammaṃ karoti— asambhogaṃ saṃghena. Yassāyasmato khamati channassa bhikkhuno, āpattiyā appaṭikamme, ukkhepanīyassa kammassa karaṇaṃ— asambhogaṃ saṃghena, so tuṇhassa; yassa nakkhamati, so bhāseyya.
Kammakkhandhaka
Āpattiyāappaṭikammeukkhepanīyakamma
264 Dutiyampi etamatthaṃ vadāmi…pe… tatiyampi etamatthaṃ vadāmi— suṇātu me, bhante, saṃgho. Ayaṃ channo bhikkhu āpattiṃ āpajjitvā na icchati āpattiṃ paṭikātuṃ. Saṃgho channassa bhikkhuno, āpattiyā appaṭikamme, ukkhepanīyakammaṃ karoti— asambhogaṃ saṃghena. Yassāyasmato khamati channassa bhikkhuno, āpattiyā appaṭikamme, ukkhepanīyassa kammassa karaṇaṃ— asambhogaṃ saṃghena, so tuṇhassa; yassa nakkhamati, so bhāseyya.
Kammakkhandhaka
Āpattiyāappaṭikammeukkhepanīyakamma
265 Kataṃ saṃghena channassa bhikkhuno, āpattiyā appaṭikamme, ukkhepanīyakammaṃ— asambhogaṃ saṃghena. Khamati saṃghassa, tasmā tuṇhī, evametaṃ dhārayāmī’ti.
Kammakkhandhaka
Āpattiyāappaṭikammeukkhepanīyakamma
266 Āvāsaparamparañca, bhikkhave, saṃsatha— ‘channo bhikkhu saṃghena āpattiyā appaṭikamme, ukkhepanīyakammakato— asambhogaṃ saṃghenā’ti.