Campeyyakkhandhaka

Appaṭinissaggeukkhepanīyakammapaṭippassaddhikathā

450. 1896 Idha pana, bhikkhave, bhikkhu saṃghena pāpikāya diṭṭhiyā appaṭinissagge ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti—  ‘ayaṃ kho, āvuso, bhikkhu saṃghena pāpikāya diṭṭhiyā appaṭinissagge ukkhepanīyakammakato sammā vattati, lomaṃ pāteti, netthāraṃ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṃ yācati. Handassa mayaṃ pāpikāya diṭṭhiyā appaṭinissagge ukkhepanīyakammaṃ paṭippassambhemā’ti. Te tassa pāpikāya diṭṭhiyā appaṭinissagge ukkhepanīyakammaṃ paṭippassambhenti—  adhammena vaggā…pe…  adhammena samaggā…  dhammena vaggā…  dhammapatirūpakena vaggā…  dhammapatirūpakena samaggā. Tatraṭṭho saṃgho vivadati—  ‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamman’ti. Tatra, bhikkhave, ye te bhikkhū evamāhaṃsu—  ‘dhammapatirūpakena samaggakamman’ti, ye ca te bhikkhū evamāhaṃsu—  ‘akataṃ kammaṃ dukkaṭaṃ kammaṃ puna kātabbaṃ kamman’ti, ime tattha bhikkhū dhammavādino. Imepi pañca vārā saṃkhittā”.

1897 Campeyyakkhandhako navamo.

1898 Tassuddānaṃ

1899 Campāyaṃ bhagavā āsi,

vatthu vāsabhagāmake;

Āgantukānamussukkaṃ,

akāsi icchitabbake.

1900 Pakataññunoti ñatvā,

ussukkaṃ na karī tadā;

Ukkhitto na karotīti,

sāgamā jinasantike.

1901 Adhammena vaggakammaṃ,

samaggaṃ adhammena ca;

Dhammena vaggakammañca,

patirūpakena vaggikaṃ.

1902 Patirūpakena samaggaṃ,

eko ukkhipatekakaṃ;

Eko ca dve sambahule,

saṃghaṃ ukkhipatekako.

1903 Duvepi sambahulāpi,

saṃgho saṃghañca ukkhipi;

Sabbaññupavaro sutvā,

adhammanti paṭikkhipi.

1904 Ñattivipannaṃ yaṃ kammaṃ,

sampannaṃ anusāvanaṃ;

Anussāvanavipannaṃ,

sampannaṃ ñattiyā ca yaṃ.

1905 Ubhayena vipannañca,

aññatra dhammameva ca;

Vinayā satthu paṭikuṭṭhaṃ,

kuppaṃ aṭṭhānārahikaṃ.

1906 Adhammavaggaṃ samaggaṃ,

Dhamma patirūpāni ye duve;

Dhammeneva ca sāmaggiṃ,

Anuññāsi tathāgato.

1907 Catuvaggo pañcavaggo,

dasavaggo ca vīsati;

Parovīsativaggo ca,

saṃgho pañcavidho tathā.

1908 Ṭhapetvā upasampadaṃ,

yañca kammaṃ pavāraṇaṃ;

Abbhānakammena saha,

catuvaggehi kammiko.

1909 Duve kamme ṭhapetvāna,

majjhadesūpasampadaṃ;

Abbhānaṃ pañcavaggiko,

sabbakammesu kammiko.

1910 Abbhānekaṃ ṭhapetvāna,

ye bhikkhū dasavaggikā;

Sabbakammakaro saṃgho,

vīso sabbattha kammiko.

1911 Bhikkhunī sikkhamānā ca,

sāmaṇero sāmaṇerī;

Paccakkhātantimavatthū,

ukkhittāpattidassane.

1912 Appaṭikamme diṭṭhiyā,

paṇḍako theyyasaṃvāsakaṃ;

Titthiyā tiracchānagataṃ,

mātu pitu ca ghātakaṃ.

1913 Arahaṃ bhikkhunīdūsi,

bhedakaṃ lohituppādaṃ;

Byañjanaṃ nānāsaṃvāsaṃ,

nānāsīmāya iddhiyā.

1914 Yassa saṃgho kare kammaṃ,

hontete catuvīsati;

Sambuddhena paṭikkhittā,

na hete gaṇapūrakā.

1915 Pārivāsikacatuttho,

parivāsaṃ dadeyya vā;

Mūlā mānattamabbheyya,

akammaṃ na ca karaṇaṃ.

1916 Mūlā arahamānattā,

abbhānārahameva ca;

Na kammakārakā pañca,

sambuddhena pakāsitā.

1917 Bhikkhunī sikkhamānā ca,

sāmaṇero sāmaṇerikā;

Paccakkhantimaummattā,

khittāvedanadassane.

1918 Appaṭikamme diṭṭhiyā,

paṇḍakāpi ca byañjanā;

Nānāsaṃvāsakā sīmā,

vehāsaṃ yassa kamma ca.

1919 Aṭṭhārasannametesaṃ,

paṭikkosaṃ na ruhati;

Bhikkhussa pakatattassa,

ruhati paṭikkosanā.

1920 Suddhassa dunnisārito,

bālo hi sunissārito;

Paṇḍako theyyasaṃvāso,

pakkanto tiracchānagato.

1921 Mātu pitu arahanta,

dūsako saṃghabhedako;

Lohituppādako ceva,

ubhatobyañjano ca yo.

1922 Ekādasannaṃ etesaṃ,

osāraṇaṃ na yujjati;

Hatthapādaṃ tadubhayaṃ,

kaṇṇanāsaṃ tadūbhayaṃ.

1923 Aṅguli aḷakaṇḍaraṃ,

phaṇaṃ khujjo ca vāmano;

Gaṇḍī lakkhaṇakasā ca,

likhitako ca sīpadī.

1924 Pāpā parisakāṇo ca,

kuṇī khañjo hatopi ca;

Iriyāpathadubbalo,

andho mūgo ca badhiro.

1925 Andhamūgandhabadhiro,

mūgabadhirameva ca;

Andhamūgabadhiro ca,

dvattiṃsete anūnakā.

1926 Tesaṃ osāraṇaṃ hoti,

sambuddhena pakāsitaṃ;

Daṭṭhabbā paṭikātabbā,

nissajjetā na vijjati.

1927 Tassa ukkhepanā kammā,

satta honti adhammikā;

Āpannaṃ anuvattantaṃ,

satta tepi adhammikā.

1928 Āpannaṃ nānuvattantaṃ,

satta kammā sudhammikā;

Sammukhā paṭipucchā ca,

paṭiññāya ca kāraṇā.

1929 Sati amūḷhapāpikā,

tajjanīniyassena ca;

Pabbājanīya paṭisāro,

ukkhepaparivāsa ca.

1930 Mūlā mānattaabbhānā,

tatheva upasampadā;

Aññaṃ kareyya aññassa,

soḷasete adhammikā.

1931 Taṃ taṃ kareyya taṃ tassa,

soḷasete sudhammikā;

Paccāropeyya aññaññaṃ,

soḷasete adhammikā.

1932 Dve dve tammūlakaṃ tassa,

tepi soḷasa dhammikā;

Ekekamūlakaṃ cakkaṃ,

“adhamman”ti jinobravi.

1933 Akāsi tajjanīyaṃ kammaṃ,

saṃgho bhaṇḍanakārako;

Adhammena vaggakammaṃ,

aññaṃ āvāsaṃ gacchi so.

1934 Tatthādhammena samaggā,

tassa tajjanīyaṃ karuṃ;

Aññattha vaggādhammena,

tassa tajjanīyaṃ karuṃ.

1935 Patirūpena vaggāpi,

samaggāpi tathā karuṃ;

Adhammena samaggā ca,

dhammena vaggameva ca.

1936 Patirūpakena vaggā ca,

samaggā ca ime padā;

Ekekamūlakaṃ katvā,

cakkaṃ bandhe vicakkhaṇo.

1937 Bālā byattassa niyassaṃ,

pabbāje kuladūsakaṃ;

Paṭisāraṇīyaṃ kammaṃ,

kare akkosakassa ca.

1938 Adassanāppaṭikamme,

yo ca diṭṭhiṃ na nissajje;

Tesaṃ ukkhepanīyakammaṃ,

satthavāhena bhāsitaṃ.

1939 Upari nayakammānaṃ,

pañño tajjanīyaṃ naye;

Tesaṃyeva anulomaṃ,

sammā vattati yācite.

1940 Passaddhi tesaṃ kammānaṃ,

heṭṭhā kammanayena ca;

Tasmiṃ tasmiṃ tu kammesu,

tatraṭṭho ca vivadati.

1941 Akataṃ dukkaṭañceva,

punakātabbakanti ca;

Kamme passaddhiyā cāpi,

te bhikkhū dhammavādino.

1942 Vipattibyādhite disvā,

kammappatte mahāmuni;

Paṭippassaddhimakkhāsi,

sallakattova osadhanti.

1943 Imamhi khandhake vatthūni chattiṃsāti.

1944 Campeyyakkhandhako niṭṭhito.