7.6 Ādāyapannarasaka

Kathinakkhandhaka

Ādāyapannarasaka

315. 1427 Bhikkhu atthatakathino cīvaraṃ ādāya pakkamati. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa bhikkhuno niṭṭhānantiko kathinuddhāro. (1)

1428 Bhikkhu atthatakathino cīvaraṃ ādāya pakkamati. Tassa bahisīmagatassa evaṃ hoti—  “nevimaṃ cīvaraṃ kāressaṃ, na paccessan”ti. Tassa bhikkhuno sanniṭṭhānantiko kathinuddhāro. (2)

1429 Bhikkhu atthatakathino cīvaraṃ ādāya pakkamati. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro. (3)

1430 Tikaṃ. (1)

1431 Bhikkhu atthatakathino cīvaraṃ ādāya pakkamati “na paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressan”ti. So taṃ cīvaraṃ kāreti. Tassa bhikkhuno niṭṭhānantiko kathinuddhāro. (4)

1432 Bhikkhu atthatakathino cīvaraṃ ādāya pakkamati “na paccessan”ti. Tassa bahisīmagatassa evaṃ hoti—  “nevimaṃ cīvaraṃ kāressan”ti. Tassa bhikkhuno sanniṭṭhānantiko kathinuddhāro. (5)

1433 Bhikkhu atthatakathino cīvaraṃ ādāya pakkamati “na paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressan”ti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro. (6)

1434 Tikaṃ. (2)

1435 Bhikkhu atthatakathino cīvaraṃ ādāya pakkamati anadhiṭṭhitena; nevassa hoti “paccessan”ti, na panassa hoti “na paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa bhikkhuno niṭṭhānantiko kathinuddhāro. (7)

1436 Bhikkhu atthatakathino cīvaraṃ ādāya pakkamati anadhiṭṭhitena; nevassa hoti “paccessan”ti, na panassa hoti “na paccessan”ti. Tassa bahisīmagatassa evaṃ hoti—  “nevimaṃ cīvaraṃ kāressaṃ, na paccessan”ti. Tassa bhikkhuno sanniṭṭhānantiko kathinuddhāro. (8)

1437 Bhikkhu atthatakathino cīvaraṃ ādāya pakkamati anadhiṭṭhitena; nevassa hoti “paccessan”ti, na panassa hoti “na paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro. (9)

1438 Tikaṃ. (3)

1439 Bhikkhu atthatakathino cīvaraṃ ādāya pakkamati “paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa bhikkhuno niṭṭhānantiko kathinuddhāro. (10)

1440 Bhikkhu atthatakathino cīvaraṃ ādāya pakkamati “paccessan”ti. Tassa bahisīmagatassa evaṃ hoti—  “nevimaṃ cīvaraṃ kāressaṃ, na paccessan”ti. Tassa bhikkhuno sanniṭṭhānantiko kathinuddhāro. (11)

1441 Bhikkhu atthatakathino cīvaraṃ ādāya pakkamati “paccessan”ti. Tassa bahisīmagatassa evaṃ hoti—  “idhevimaṃ cīvaraṃ kāressaṃ, na paccessan”ti. So taṃ cīvaraṃ kāreti. Tassa taṃ cīvaraṃ kayiramānaṃ nassati. Tassa bhikkhuno nāsanantiko kathinuddhāro. (12)

1442 Bhikkhu atthatakathino cīvaraṃ ādāya pakkamati “paccessan”ti. So bahisīmagato taṃ cīvaraṃ kāreti. So katacīvaro suṇāti—  “ubbhataṃ kira tasmiṃ āvāse kathinan”ti. Tassa bhikkhuno savanantiko kathinuddhāro. (13)

1443 Bhikkhu atthatakathino cīvaraṃ ādāya pakkamati “paccessan”ti. So bahisīmagato taṃ cīvaraṃ kāreti. So katacīvaro “paccessaṃ paccessan”ti—  bahiddhā kathinuddhāraṃ vītināmeti. Tassa bhikkhuno sīmātikkantiko kathinuddhāro. (14)

1444 Bhikkhu atthatakathino cīvaraṃ ādāya pakkamati “paccessan”ti. So bahisīmagato taṃ cīvaraṃ kāreti. So katacīvaro—  “paccessaṃ paccessan”ti sambhuṇāti kathinuddhāraṃ. Tassa bhikkhuno saha bhikkhūhi kathinuddhāro. (15)

1445 Chakkaṃ.
Ādāyapannarasakaṃ.