Kathinakkhandhaka

Palibodhāpalibodhakathā

325. 1524 Dveme, bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati “paccessan”ti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.

1525 Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho “na paccessan”ti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhā”ti.

1526 Kathinakkhandhako niṭṭhito sattamo.

1527 Tassuddānaṃ

1528 Tiṃsa pāveyyakā bhikkhū,

sāketukkaṇṭhitā vasuṃ;

Vassaṃvuṭṭhokapuṇṇehi,

agamuṃ jinadassanaṃ.

1529 Idaṃ vatthu kathinassa,

kappissanti ca pañcakā;

Anāmantā asamācārā,

tatheva gaṇabhojanaṃ.

1530 Yāvadatthañca uppādo,

atthatānaṃ bhavissati;

Ñatti evatthatañceva,

evañceva anatthataṃ.

1531 Ullikhi dhovanā ceva,

vicāraṇañca chedanaṃ;

Bandhano vaṭṭi kaṇḍusa,

daḷhīkammānuvātikā.

1532 Paribhaṇḍaṃ ovaddheyyaṃ,

maddanā nimittaṃ kathā;

Kukku sannidhi nissaggi,

na kappaññatra te tayo.

1533 Aññatra pañcātireke,

sañchinnena samaṇḍalī;

Nāññatra puggalā sammā,

nissīmaṭṭhonumodati.

1534 Kathinānatthataṃ hoti,

evaṃ buddhena desitaṃ;

Ahatākappapiloti,

paṃsu pāpaṇikāya ca.

1535 Animittāparikathā,

akukku ca asannidhi;

Anissaggi kappakate,

tathā ticīvarena ca.

1536 Pañcake vātireke vā,

chinne samaṇḍalīkate;

Puggalassatthārā sammā,

sīmaṭṭho anumodati.

1537 Evaṃ kathinattharaṇaṃ,

ubbhārassaṭṭhamātikā;

Pakkamananti niṭṭhānaṃ,

sanniṭṭhānañca nāsanaṃ.

1538 Savanaṃ āsāvacchedi,

sīmā sahubbhāraṭṭhamī;

Katacīvaramādāya,

“na paccessan”ti gacchati.

1539 Tassa taṃ kathinuddhāro,

hoti pakkamanantiko;

Ādāya cīvaraṃ yāti,

nissīme idaṃ cintayi.

1540 “Kāressaṃ na paccessan”ti,

niṭṭhāne kathinuddhāro;

Ādāya nissīmaṃ neva,

“na paccessan”ti mānaso.

1541 Tassa taṃ kathinuddhāro,

sanniṭṭhānantiko bhave;

Ādāya cīvaraṃ yāti,

nissīme idaṃ cintayi.

1542 “Kāressaṃ na paccessan”ti,

kayiraṃ tassa nassati;

Tassa taṃ kathinuddhāro,

bhavati nāsanantiko.

1543 Ādāya yāti “paccessaṃ”,

bahi kāreti cīvaraṃ;

Katacīvaro suṇāti,

ubbhataṃ kathinaṃ tahiṃ.

1544 Tassa taṃ kathinuddhāro,

bhavati savanantiko;

Ādāya yāti “paccessaṃ”,

bahi kāreti cīvaraṃ.

1545 Katacīvaro bahiddhā,

nāmeti kathinuddhāraṃ;

Tassa taṃ kathinuddhāro,

sīmātikkantiko bhave.

1546 Ādāya yāti “paccessaṃ”,

bahi kāreti cīvaraṃ;

Katacīvaro paccessaṃ,

sambhoti kathinuddhāraṃ.

1547 Tassa taṃ kathinuddhāro,

saha bhikkhūhi jāyati;

Ādāya ca samādāya,

sattasattavidhā gati.

1548 Pakkamanantikā natthi,

chakke vippakate gati;

Ādāya nissīmagataṃ,

kāressaṃ iti jāyati.

1549 Niṭṭhānaṃ sanniṭṭhānañca,

nāsanañca ime tayo;

Ādāya “na paccessan”ti,

bahisīme karomiti.

1550 Niṭṭhānaṃ sanniṭṭhānampi,

nāsanampi idaṃ tayo;

Anadhiṭṭhitena nevassa,

heṭṭhā tīṇi nayāvidhi.

1551 Ādāya yāti paccessaṃ,

bahisīme karomiti;

“Na paccessan”ti kāreti,

niṭṭhāne kathinuddhāro.

1552 Sanniṭṭhānaṃ nāsanañca,

savanasīmātikkamā;

Saha bhikkhūhi jāyetha,

evaṃ pannarasaṃ gati.

1553 Samādāya vippakatā,

samādāya punā tathā;

Ime te caturo vārā,

sabbe pannarasavidhi.

1554 Anāsāya ca āsāya,

karaṇīyo ca te tayo;

Nayato taṃ vijāneyya,

tayo dvādasa dvādasa.

1555 Apavilānā navettha,

phāsu pañcavidhā tahiṃ;

Palibodhāpalibodhā,

uddānaṃ nayato katanti.

1556 Imamhi khandhake vatthū doḷasakapeyyālamukhāni ekasataṃ aṭṭhārasa.

1557 Kathinakkhandhako niṭṭhito.