4.21 Dvevācikādipavāraṇā

Pavāraṇākkhandhaka

Dvevācikādipavāraṇā

234. 1075 Tena kho pana samayena kosalesu janapade aññatarasmiṃ āvāse tadahu pavāraṇāya savarabhayaṃ ahosi. Bhikkhū nāsakkhiṃsu tevācikaṃ pavāretuṃ. Bhagavato etamatthaṃ ārocesuṃ. “Anujānāmi, bhikkhave, dvevācikaṃ pavāretun”ti.

1076 Bāḷhataraṃ savarabhayaṃ ahosi. Bhikkhū nāsakkhiṃsu dvevācikaṃ pavāretuṃ. Bhagavato etamatthaṃ ārocesuṃ. “Anujānāmi, bhikkhave, ekavācikaṃ pavāretun”ti.

1077 Bāḷhataraṃ savarabhayaṃ ahosi. Bhikkhū nāsakkhiṃsu ekavācikaṃ pavāretuṃ. Bhagavato etamatthaṃ ārocesuṃ. “Anujānāmi, bhikkhave, samānavassikaṃ pavāretun”ti.

1078 Tena kho pana samayena aññatarasmiṃ āvāse tadahu pavāraṇāya manussehi dānaṃ dentehi yebhuyyena ratti khepitā hoti. Atha kho tesaṃ bhikkhūnaṃ etadahosi—  “manussehi dānaṃ dentehi yebhuyyena ratti khepitā. Sace saṃgho tevācikaṃ pavāressati, appavāritova saṃgho bhavissati, athāyaṃ ratti vibhāyissati. Kathaṃ nu kho amhehi paṭipajjitabban”ti? Bhagavato etamatthaṃ ārocesuṃ.

1079 “Idha pana, bhikkhave, aññatarasmiṃ āvāse tadahu pavāraṇāya manussehi dānaṃ dentehi yebhuyyena ratti khepitā hoti. Tatra ce, bhikkhave, bhikkhūnaṃ evaṃ hoti—  ‘manussehi dānaṃ dentehi yebhuyyena ratti khepitā. Sace saṃgho tevācikaṃ pavāressati, appavāritova saṃgho bhavissati, athāyaṃ ratti vibhāyissatī’ti, byattena bhikkhunā paṭibalena saṃgho ñāpetabbo—

1080 ‘Suṇātu me, bhante, saṃgho. Manussehi dānaṃ dentehi yebhuyyena ratti khepitā. Sace saṃgho tevācikaṃ pavāressati, appavāritova saṃgho bhavissati, athāyaṃ ratti vibhāyissati. Yadi saṃghassa pattakallaṃ, saṃgho dvevācikaṃ, ekavācikaṃ, samānavassikaṃ pavāreyyā’ti.

1081 Idha pana, bhikkhave, aññatarasmiṃ āvāse tadahu pavāraṇāya bhikkhūhi dhammaṃ bhaṇantehi…pe…  suttantikehi suttantaṃ saṅgāyantehi…  vinayadharehi vinayaṃ vinicchinantehi…  dhammakathikehi dhammaṃ sākacchantehi…  bhikkhūhi kalahaṃ karontehi yebhuyyena ratti khepitā hoti. Tatra ce bhikkhūnaṃ evaṃ hoti—  ‘bhikkhūhi kalahaṃ karontehi yebhuyyena ratti khepitā. Sace saṃgho tevācikaṃ pavāressati, appavāritova saṃgho bhavissati, athāyaṃ ratti vibhāyissatī’ti, byattena bhikkhunā paṭibalena saṃgho ñāpetabbo—

1082 ‘Suṇātu me, bhante, saṃgho. Bhikkhūhi kalahaṃ karontehi yebhuyyena ratti khepitā. Sace saṃgho tevācikaṃ pavāressati, appavāritova saṃgho bhavissati, athāyaṃ ratti vibhāyissati. Yadi saṃghassa pattakallaṃ, saṃgho dvevācikaṃ, ekavācikaṃ, samānavassikaṃ pavāreyyā’”ti.

1083 Tena kho pana samayena kosalesu janapade aññatarasmiṃ āvāse tadahu pavāraṇāya mahābhikkhusaṃgho sannipatito hoti, parittañca anovassikaṃ hoti, mahā ca megho uggato hoti. Atha kho tesaṃ bhikkhūnaṃ etadahosi—  “ayaṃ kho mahābhikkhusaṃgho sannipatito, parittañca anovassikaṃ, mahā ca megho uggato. Sace saṃgho tevācikaṃ pavāressati, appavāritova saṃgho bhavissati, athāyaṃ megho pavassissati. Kathaṃ nu kho amhehi paṭipajjitabban”ti? Bhagavato etamatthaṃ ārocesuṃ.

1084 “Idha pana, bhikkhave, aññatarasmiṃ āvāse tadahu pavāraṇāya mahābhikkhusaṃgho sannipatito hoti, parittañca anovassikaṃ hoti, mahā ca megho uggato hoti. Tatra ce bhikkhūnaṃ evaṃ hoti—  ‘ayaṃ kho mahābhikkhusaṃgho sannipatito, parittañca anovassikaṃ, mahā ca megho uggato. Sace saṃgho tevācikaṃ pavāressati, appavāritova saṃgho bhavissati, athāyaṃ megho pavassissatī’ti. Byattena bhikkhunā paṭibalena saṃgho ñāpetabbo—

1085 ‘Suṇātu me, bhante, saṃgho. Ayaṃ mahābhikkhusaṃgho sannipatito, parittañca anovassikaṃ, mahā ca megho uggato. Sace saṃgho tevācikaṃ pavāressati, appavāritova saṃgho bhavissati, athāyaṃ megho pavassissati. Yadi saṃghassa pattakallaṃ, saṃgho dvevācikaṃ, ekavācikaṃ, samānavassikaṃ pavāreyyā’ti.

1086 Idha pana, bhikkhave, aññatarasmiṃ āvāse tadahu pavāraṇāya rājantarāyo hoti…pe…  corantarāyo hoti…  agyantarāyo hoti…  udakantarāyo hoti…  manussantarāyo hoti…  amanussantarāyo hoti…  vāḷantarāyo hoti…  sarīsapantarāyo hoti…  jīvitantarāyo hoti…  brahmacariyantarāyo hoti. Tatra ce bhikkhūnaṃ evaṃ hoti—  ‘ayaṃ kho brahmacariyantarāyo. Sace saṃgho tevācikaṃ pavāressati, appavāritova saṃgho bhavissati, athāyaṃ brahmacariyantarāyo bhavissatī’ti, byattena bhikkhunā paṭibalena saṃgho ñāpetabbo—

1087 ‘Suṇātu me, bhante, saṃgho. Ayaṃ brahmacariyantarāyo. Sace saṃgho tevācikaṃ pavāressati, appavāritova saṃgho bhavissati, athāyaṃ brahmacariyantarāyo bhavissati. Yadi saṃghassa pattakallaṃ, saṃgho dvevācikaṃ, ekavācikaṃ, samānavassikaṃ pavāreyyā’”ti.