2.38 Vajjanīyapuggalasandassana

Uposathakkhandhaka

Vajjanīyapuggalasandassana

183. 797 Na, bhikkhave, bhikkhuniyā nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na sikkhamānāya…pe… na sāmaṇerassa …pe… na sāmaṇeriyā…pe… na sikkhāpaccakkhātakassa…pe… na antimavatthuṃ ajjhāpannakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.

798 Na āpattiyā adassane ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo. Na āpattiyā appaṭikamme ukkhittakassa nisinnaparisāya…pe… na pāpikāya diṭṭhiyā appaṭinissagge ukkhittakassa nisinnaparisāya pātimokkhaṃ uddisitabbaṃ. Yo uddiseyya, yathādhammo kāretabbo.

799 Na paṇḍakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa. Na theyyasaṃvāsakassa…pe… na titthiyapakkantakassa…pe… na tiracchānagatassa…pe… na mātughātakassa…pe… na pitughātakassa…pe… na arahantaghātakassa…pe… na bhikkhunidūsakassa…pe… na saṃghabhedakassa…pe… na lohituppādakassa…pe… na ubhatobyañjanakassa nisinnaparisāya pātimokkhaṃ uddisitabbaṃ. Yo uddiseyya, āpatti dukkaṭassa.

800 Na, bhikkhave, pārivāsikapārisuddhidānena uposatho kātabbo, aññatra avuṭṭhitāya parisāya. Na ca, bhikkhave, anuposathe uposatho kātabbo, aññatra saṃghasāmaggiyā”ti.

801 Tatiyabhāṇavāro niṭṭhito.
Uposathakkhandhako dutiyo.

802 Tassuddānaṃ

803 Titthiyā bimbisāro ca,

sannipatituṃ tuṇhikā;

Dhammaṃ raho pātimokkhaṃ,

devasikaṃ tadā sakiṃ.

804 Yathāparisā samaggaṃ,

sāmaggī maddakucchi ca;

Sīmā mahatī nadiyā,

anu dve khuddakāni ca.

805 Navā rājagahe ceva,

Sīmā avippavāsanā;

Sammanne paṭhamaṃ sīmaṃ,

Pacchā sīmaṃ samūhane.

806 Asammatā gāmasīmā,

nadiyā samudde sare;

Udakukkhepo bhindanti,

tathevajjhottharanti ca.

807 Kati kammāni uddeso,

savarā asatīpi ca;

Dhammaṃ vinayaṃ tajjenti,

puna vinayatajjanā.

808 Codanā kate okāse,

adhammappaṭikkosanā;

Catupañcaparā āvi,

sañcicca cepi vāyame.

809 Sagahaṭṭhā anajjhiṭṭhā,

codanamhi na jānati;

Sambahulā na jānanti,

sajjukaṃ na ca gacchare.

810 Katimī kīvatikā dūre,

ārocetuñca nassari;

Uklāpaṃ āsanaṃ dīpo,

disā añño bahussuto.

811 Sajjukaṃ vassuposatho,

suddhikammañca ñātakā;

Gaggo catutayo dveko,

āpattisabhāgā sari.

812 Sabbo saṃgho vematiko,

na jānanti bahussuto;

Bahū samasamā thokā,

parisā avuṭṭhitāya ca.

813 Ekaccā vuṭṭhitā sabbā,

jānanti ca vematikā;

Kappatevāti kukkuccā,

jānaṃ passaṃ suṇanti ca.

814 Āvāsikena āgantu,

cātupannaraso puna;

Pāṭipado pannaraso,

liṅgasaṃvāsakā ubho.

815 Pārivāsānuposatho,

aññatra saṃghasāmaggiyā;

Ete vibhattā uddānā,

vatthuvibhūtakāraṇāti.

816 Imasmiṃ khandhake vatthūni chaasīti.

817 Uposathakkhandhako niṭṭhito.