Mahāpaṇṇāsaka

Paṭhamavagga

Parihānikathā

Suttasādhanaparihāni

265. 498 ๐ Parihāyati arahā arahattāti? Āmantā. Nanu vuttaṃ bhagavatā—

499 “Uccāvacā hi paṭipadā,

Samaṇena pakāsitā;

Na pāraṃ diguṇaṃ yanti,

Nayidaṃ ekaguṇaṃ mutan”ti.

500 Attheva suttantoti? Āmantā. Tena hi na vattabbaṃ—  “parihāyati arahā arahattā”ti.

501 ๐ Parihāyati arahā arahattāti? Āmantā. Atthi chinnassa chediyanti? Na hevaṃ vattabbe.

502 ๐ Atthi chinnassa chediyanti? Āmantā. Nanu vuttaṃ bhagavatā—

503 “Vītataṇho anādāno,

kiccaṃ yassa na vijjati;

Chinnassa chediyaṃ natthi,

oghapāso samūhato”ti.

504 Attheva suttantoti? Āmantā. Tena hi na vattabbaṃ—  “atthi chinnassa chediyan”ti.

266. 505 ๐ Parihāyati arahā arahattāti? Āmantā. Atthi katassa paticayoti? Na hevaṃ vattabbe.

506 ๐ Atthi katassa paticayoti? Āmantā. Nanu vuttaṃ bhagavatā—

507 “Tassa sammā vimuttassa,

santacittassa bhikkhuno;

Katassa paticayo natthi,

karaṇīyaṃ na vijjati.

508 Selo yathā ekagghano,

vātena na samīrati;

Evaṃ rūpā rasā saddā,

gandhā phassā ca kevalā.

509 Iṭṭhā dhammā aniṭṭhā ca,

nappavedhenti tādino;

Ṭhitaṃ cittaṃ vippamuttaṃ,

vayaṃ cassānupassatī”ti.

510 Attheva suttantoti? Āmantā. Tena hi na vattabbaṃ—  “atthi katassa paticayo”ti.

267. 511 × Na vattabbaṃ—  “parihāyati arahā arahattā”ti? Āmantā. Nanu vuttaṃ bhagavatā—  “pañcime, bhikkhave, dhammā samayavimuttassa bhikkhuno parihānāya saṃvattanti. Katame pañca? Kammārāmatā, bhassārāmatā, niddārāmatā, saṅgaṇikārāmatā, yathāvimuttaṃ cittaṃ na paccavekkhati. Ime kho, bhikkhave, pañca dhammā samayavimuttassa bhikkhuno parihānāya saṃvattantī”ti. Attheva suttantoti? Āmantā. Tena hi parihāyati arahā arahattāti.

512 ๐ Atthi arahato kammārāmatāti? Na hevaṃ vattabbe.

513 ๐ Atthi arahato kammārāmatāti? Āmantā. Atthi arahato rāgo kāmarāgo kāmarāgapariyuṭṭhānaṃ kāmarāgasaṃyojanaṃ kāmogho kāmayogo kāmacchandanīvaraṇanti? Na hevaṃ vattabbe.

514 ๐ Atthi arahato bhassārāmatā, atthi arahato niddārāmatā, atthi arahato saṅgaṇikārāmatāti? Na hevaṃ vattabbe.

515 ๐ Atthi arahato saṅgaṇikārāmatāti? Āmantā. Atthi arahato rāgo kāmarāgo kāmarāgapariyuṭṭhānaṃ kāmarāgasaṃyojanaṃ kāmogho kāmayogo kāmacchandanīvaraṇanti? Na hevaṃ vattabbe.

268. 516 ๐ Parihāyati arahā arahattāti? Āmantā. Arahā arahattā parihāyamāno kiṃ pariyuṭṭhito parihāyatīti? Rāgapariyuṭṭhito parihāyatīti. Pariyuṭṭhānaṃ kiṃ paṭicca uppajjatīti? Anusayaṃ paṭicca uppajjatīti. Atthi arahato anusayāti? Na hevaṃ vattabbe.

517 ๐ Atthi arahato anusayāti? Āmantā. Atthi arahato kāmarāgānusayo paṭighānusayo mānānusayo diṭṭhānusayo vicikicchānusayo bhavarāgānusayo avijjānusayoti? Na hevaṃ vattabbe.

518 ๐ Dosapariyuṭṭhito parihāyatīti…pe…  mohapariyuṭṭhito parihāyatīti… . Pariyuṭṭhānaṃ kiṃ paṭicca uppajjatīti? Anusayaṃ paṭicca uppajjatīti. Atthi arahato anusayāti? Na hevaṃ vattabbe…pe… .

519 ๐ Atthi arahato anusayāti? Āmantā. Atthi arahato kāmarāgānusayo…pe…  avijjānusayoti? Na hevaṃ vattabbe.

520 ๐ Parihāyati arahā arahattāti? Āmantā. Arahato arahattā parihāyamānassa kiṃ upacayaṃ gacchatīti? Rāgo upacayaṃ gacchatīti. Sakkāyadiṭṭhi upacayaṃ gacchatīti, vicikicchā upacayaṃ gacchatīti, sīlabbataparāmāso upacayaṃ gacchatīti? Na hevaṃ vattabbe. Doso upacayaṃ gacchatīti…pe…  moho upacayaṃ gacchatīti, sakkāyadiṭṭhi upacayaṃ gacchatīti, vicikicchā upacayaṃ gacchatīti, sīlabbataparāmāso upacayaṃ gacchatīti? Na hevaṃ vattabbe.

521 ๐ Parihāyati arahā arahattāti? Āmantā. Arahā ācinatīti? Na hevaṃ vattabbe. Arahā apacinatīti? Na hevaṃ vattabbe. Arahā pajahatīti? Na hevaṃ vattabbe. Arahā upādiyatīti? Na hevaṃ vattabbe. Arahā visinetīti? Na hevaṃ vattabbe. Arahā ussinetīti? Na hevaṃ vattabbe. Arahā vidhūpetīti? Na hevaṃ vattabbe. Arahā sandhūpetīti? Na hevaṃ vattabbe.

522 Nanu arahā nevācinati na apacinati apacinitvā ṭhitoti? Āmantā. Hañci arahā nevācinati na apacinati apacinitvā ṭhito, no ca vata re vattabbe—  “parihāyati arahā arahattā”ti.

523 Nanu arahā neva pajahati na upādiyati pajahitvā ṭhitoti? Āmantā. Hañci arahā neva pajahati na upādiyati pajahitvā ṭhito, no ca vata re vattabbe—  “parihāyati arahā arahattā”ti.

524 Nanu arahā neva visineti na ussineti visinitvā ṭhitoti? Āmantā. Hañci arahā neva visineti na ussineti visinitvā ṭhito, no ca vata re vattabbe—  “parihāyati arahā arahattā”ti.

525 Nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe—  “parihāyati arahā arahattā”ti.

526 Parihānikathā niṭṭhitā.