Ārambhakathā
1. 2 Milindo nāma so rājā,
sāgalāyaṁ puruttame;
Upagañchi nāgasenaṁ,
gaṅgā ca[1] yathā sāgaraṁ.
3 Āsajja rājā citrakathiṁ,
ukkādhāraṁ tamonudaṁ;
Apucchi nipuṇe pañhe,
ṭhānāṭṭhānagate puthū.
4 Pucchā visajjanā[2] ceva,
gambhīratthūpanissitā;
Hadayaṅgamā kaṇṇasukhā,
abbhutā lomahaṁsanā.
5 Abhidhammavinayogāḷhā,
suttajālasamattitā;
Nāgasenakathā citrā,
opammehi nayehi ca.
6 Tattha ñāṇaṁ paṇidhāya,
hāsayitvāna mānasaṁ;
Suṇātha nipuṇe pañhe,
kaṅkhāṭṭhānavidālaneti.
2. 7 Taṁ yathānusūyate— atthi yonakānaṁ nānāpuṭabhedanaṁ sāgalaṁ nāma nagaraṁ nadīpabbatasobhitaṁ ramaṇīyabhūmippadesabhāgaṁ ārāmuyyānopavanataḷākapokkharaṇisampannaṁ nadīpabbatavanarāmaṇeyyakaṁ sutavantanimmitaṁ nihatapaccatthikaṁ[3] paccāmittānupapīḷitaṁ vividhavicitradaḷhamaṭṭālakoṭṭhakaṁ varapavaragopuratoraṇaṁ[4] gambhīraparikhāpaṇḍarapākāraparikkhittantepuraṁ. Suvibhattavīthicaccaracatukkasiṅghāṭakaṁ suppasāritānekavidhavarabhaṇḍaparipūritantarāpaṇaṁ vividhadānaggasatasamupasobhitaṁ[5] himagirisikharasaṅkāsavarabhavanasatasahassappaṭimaṇḍitaṁ gajahayarathapattisamākulaṁ abhirūpanaranārigaṇānucaritaṁ ākiṇṇajanamanussaṁ puthukhattiyabrāhmaṇavessasuddaṁ vividhasamaṇabrāhmaṇasabhājanasaṅghaṭitaṁ[6] bahuvidhavijjāvanta[7] naraciranisevitaṁ[8] kāsikakoṭumbarikādinānāvidhavatthāpaṇasampannaṁ suppasāritarucirabahuvidhapupphagandhāpaṇaṁ gandhagandhitaṁ āsīsanīyabahuratanaparipūritaṁ disāmukhasuppasāritāpaṇaṁ siṅgāravāṇijagaṇānucaritaṁ kahāpaṇarajatasuvaṇṇakaṁsapattharaparipūraṁ pajjotamānanidhiniketaṁ pahūtadhanadhaññavittūpakaraṇaṁ paripuṇṇakosakoṭṭhāgāraṁ bahvannapānaṁ bahuvidhakhajjabhojjaleyyapeyyasāyanīyaṁ uttarakurusaṅkāsaṁ sampannasassaṁ āḷakamandā viya devapuraṁ.
8 Ettha ṭhatvā tesaṁ pubbakammaṁ kathetabbaṁ, kathentena ca chadhā vibhajitvā kathetabbaṁ. Seyyathidaṁ— pubbayogo milindapañhaṁ lakkhaṇapañhaṁ meṇḍakapañhaṁ anumānapañhaṁ opammakathāpañhanti.
9 Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
- ca: gaṅgāva (sī, maku, pā1) (Word Variant) ↩
- visajjanā: vissajjanā (sī, pā1) (Word Variant) ↩
- nihatapaccatthikaṁ: nihatapaccatthika (sī, pā1), nīhata (maku), nippaccatthikaṁ (ka-ma) (Word Variant) ↩
- varapavaragopuratoraṇaṁ: pavarapacuragopuratoraṇaṁ (sī) (Word Variant) ↩
- vividhadānaggasatasamupasobhitaṁ: satatamupasobhitaṁ (ka-ma) (Word Variant) ↩
- vividhasamaṇabrāhmaṇasabhājanasaṅghaṭitaṁ: ... sammābhājana ... (ka-ma), ... samabhājana ... (cha1) (Word Variant) ↩
- bahuvidhavijjāvanta: ... vijjādhara (ka-ma) (Word Variant) ↩
- naraciranisevitaṁ: naravīra ... (sī, pā1) (Word Variant) ↩