3.8 Satipaṭṭhānakathā

Paññāvagga

Satipaṭṭhānakathā

34. 1882 Sāvatthinidānaṁ. “Cattārome, bhikkhave, satipaṭṭhānā. Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ. Vedanāsu… citte… dhammesu dhammānupassī viharati ātāpī sampajāno satimā, vineyya loke abhijjhādomanassaṁ. Ime kho, bhikkhave, cattāro satipaṭṭhānā”ti.

35. 1883 Kathaṁ kāye kāyānupassī viharati? Idhekacco pathavīkāyaṁ aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti, paṭinissajjati, no ādiyati. Aniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati. Imehi sattahi ākārehi kāyaṁ anupassati. Kāyo upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ kāyaṁ anupassati. Tena vuccati— “kāye kāyānupassanāsatipaṭṭhānā”.

1884 Bhāvanāti catasso bhāvanā— tattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.

1885 Idhekacco āpokāyaṁ…pe… tejokāyaṁ… vāyokāyaṁ… kesakāyaṁ… lomakāyaṁ… chavikāyaṁ… cammakāyaṁ… maṁsakāyaṁ… rudhirakāyaṁ… nhārukāyaṁ^[362]… aṭṭhikāyaṁ… aṭṭhimiñjakāyaṁ aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati, nirodheti, no samudeti; paṭinissajjati, no ādiyati. Aniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati. Imehi sattahi ākārehi kāyaṁ anupassati. Kāyo upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ kāyaṁ anupassati. Tena vuccati— “kāye kāyānupassanāsatipaṭṭhānā”.

1886 Bhāvanāti catasso bhāvanā— tattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṁ kāye kāyānupassī viharati. (1)

1887 Kathaṁ vedanāsu vedanānupassī viharati? Idhekacco sukhaṁ vedanaṁ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṁ pajahati…pe… paṭinissajjanto ādānaṁ pajahati. Imehi sattahi ākārehi vedanaṁ anupassati. Vedanā upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ vedanaṁ anupassati. Tena vuccati— “vedanāsu vedanānupassanāsatipaṭṭhānā”.

1888 Bhāvanāti catasso bhāvanā…pe… āsevanaṭṭhena bhāvanā…pe… idhekacco dukkhaṁ vedanaṁ…pe… adukkhamasukhaṁ vedanaṁ… sāmisaṁ sukhaṁ vedanaṁ… nirāmisaṁ sukhaṁ vedanaṁ… sāmisaṁ dukkhaṁ vedanaṁ… nirāmisaṁ dukkhaṁ vedanaṁ… sāmisaṁ adukkhamasukhaṁ vedanaṁ… nirāmisaṁ adukkhamasukhaṁ vedanaṁ… cakkhusamphassajaṁ vedanaṁ… sotasamphassajaṁ vedanaṁ… ghānasamphassajaṁ vedanaṁ… jivhāsamphassajaṁ vedanaṁ… kāyasamphassajaṁ vedanaṁ… manosamphassajaṁ vedanaṁ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṁ pajahati…pe… paṭinissajjanto ādānaṁ pajahati. Imehi sattahi ākārehi vedanaṁ anupassati. Vedanā upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ vedanaṁ anupassati. Tena vuccati— “vedanāsu vedanānupassanāsatipaṭṭhānā”.

1889 Bhāvanāti catasso bhāvanā…pe… evaṁ vedanāsu vedanānupassī viharati. (2)

1890 Kathaṁ citte cittānupassī viharati? Idhekacco sarāgaṁ cittaṁ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṁ pajahati…pe… paṭinissajjanto ādānaṁ pajahati. Imehi sattahi ākārehi cittaṁ anupassati. Cittaṁ upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ cittaṁ anupassati. Tena vuccati— “citte cittānupassanāsatipaṭṭhānā”.

1891 Bhāvanāti catasso bhāvanā…pe… āsevanaṭṭhena bhāvanā.

1892 Idhekacco vītarāgaṁ cittaṁ…pe… sadosaṁ cittaṁ… vītadosaṁ cittaṁ… samohaṁ cittaṁ… vītamohaṁ cittaṁ… saṁkhittaṁ cittaṁ… vikkhittaṁ cittaṁ… mahaggataṁ cittaṁ… amahaggataṁ cittaṁ… sauttaraṁ cittaṁ… anuttaraṁ cittaṁ… samāhitaṁ cittaṁ… asamāhitaṁ cittaṁ… vimuttaṁ cittaṁ… avimuttaṁ cittaṁ… cakkhuviññāṇaṁ… sotaviññāṇaṁ… ghānaviññāṇaṁ… jivhāviññāṇaṁ… kāyaviññāṇaṁ… manoviññāṇaṁ aniccato anupassati, no niccato…pe… paṭinissajjati, no ādiyati. Aniccato anupassanto niccasaññaṁ pajahati…pe… paṭinissajjanto ādānaṁ pajahati. Imehi sattahi ākārehi cittaṁ anupassati. Cittaṁ upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena taṁ cittaṁ anupassati. Tena vuccati— “citte cittānupassanāsatipaṭṭhānā”.

1893 Bhāvanāti catasso bhāvanā…pe… āsevanaṭṭhena bhāvanā. Evaṁ citte cittānupassī viharati. (3)

1894 Kathaṁ dhammesu dhammānupassī viharati? Idhekacco ṭhapetvā kāyaṁ ṭhapetvā vedanaṁ ṭhapetvā cittaṁ tadavasese dhamme aniccato anupassati, no niccato; dukkhato anupassati, no sukhato; anattato anupassati, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato anupassanto niccasaññaṁ pajahati, dukkhato anupassanto sukhasaññaṁ pajahati, anattato anupassanto attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati. Imehi sattahi ākārehi te dhamme anupassati. Dhammā upaṭṭhānaṁ, no sati. Sati upaṭṭhānañceva sati ca. Tāya satiyā tena ñāṇena te dhamme anupassati. Tena vuccati— “dhammesu dhammānupassanāsatipaṭṭhānā”.

1895 Bhāvanāti catasso bhāvanā— tattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā. Evaṁ dhammesu dhammānupassī viharatīti. (4)

1896 Satipaṭṭhānakathā niṭṭhitā.