Tikanipāta
Kumbhavagga
Kāyanibbindajātaka
127. 846 “Phuṭṭhassa me aññatarena byādhinā,
Rogena bāḷhaṁ dukhitassa ruppato;
Parisussati khippamidaṁ kaḷevaraṁ,
Pupphaṁ yathā paṁsuni ātape kataṁ.
128. 847 Ajaññaṁ jaññasaṅkhātaṁ,
asuciṁ sucisammataṁ;
Nānākuṇapaparipūraṁ,
jaññarūpaṁ apassato.
129. 848 Dhiratthumaṁ āturaṁ pūtikāyaṁ,
Jegucchiyaṁ assuciṁ byādhidhammaṁ;
Yatthappamattā adhimucchitā pajā,
Hāpenti maggaṁ sugatūpapattiyā”ti.
849 Kāyanibbindajātakaṁ[460] tatiyaṁ.
- Kāyanibbindajātakaṁ: kāyavicchandajātakaṁ (sī), kāyavicchindajātakaṁ (pā1) (Word Variant) ↩