Mahāvibhaṅga
Nissaggiyakaṇḍa
Pattavagga
Cīvaraacchindanasikkhāpada
631. 2336 Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā upanando sakyaputto bhātuno saddhivihārikaṁ bhikkhuṁ etadavoca— “ehāvuso, janapadacārikaṁ pakkamissāmā”ti. “Nāhaṁ, bhante, gamissāmi; dubbalacīvaromhī”ti. “Ehāvuso, ahaṁ te cīvaraṁ dassāmī”ti tassa cīvaraṁ adāsi. Assosi kho so bhikkhu— “bhagavā kira janapadacārikaṁ pakkamissatī”ti. Atha kho tassa bhikkhuno etadahosi— “na dānāhaṁ āyasmatā upanandena sakyaputtena saddhiṁ janapadacārikaṁ pakkamissāmi, bhagavatā saddhiṁ janapadacārikaṁ pakkamissāmī”ti. Atha kho āyasmā upanando sakyaputto taṁ bhikkhuṁ etadavoca— “ehi dāni, āvuso, janapadacārikaṁ pakkamissāmā”ti. “Nāhaṁ, bhante, tayā saddhiṁ janapadacārikaṁ pakkamissāmi, bhagavatā saddhiṁ janapadacārikaṁ pakkamissāmī”ti. “Yampi tyāhaṁ, āvuso, cīvaraṁ adāsiṁ, mayā saddhiṁ janapadacārikaṁ pakkamissatī”ti, kupito anattamano acchindi. Atha kho so bhikkhu bhikkhūnaṁ etamatthaṁ ārocesi. Ye te bhikkhū appicchā…pe… te ujjhāyanti khiyyanti vipācenti— “kathañhi nāma āyasmā upanando sakyaputto bhikkhussa sāmaṁ cīvaraṁ datvā kupito anattamano acchindissatī”ti.
2337 Atha kho te bhikkhū āyasmantaṁ upanandaṁ sakyaputtaṁ anekapariyāyena vigarahitvā bhagavato etamatthaṁ ārocesuṁ…pe… “saccaṁ kira tvaṁ, upananda, bhikkhussa sāmaṁ cīvaraṁ datvā kupito anattamano acchindī”ti? “Saccaṁ, bhagavā”ti. Vigarahi buddho bhagavā…pe… kathañhi nāma tvaṁ, moghapurisa, bhikkhussa sāmaṁ cīvaraṁ datvā kupito anattamano acchindissasi. Netaṁ, moghapurisa, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—
632. 2338 “Yo pana bhikkhu bhikkhussa sāmaṁ cīvaraṁ datvā kupito anattamano acchindeyya vā acchindāpeyya vā, nissaggiyaṁ pācittiyan”ti. (25:44)
633. 2339 Yo panāti yo yādiso…pe… bhikkhūti…pe… ayaṁ imasmiṁ atthe adhippeto bhikkhūti.
2340 Bhikkhussāti aññassa bhikkhussa.
2341 Sāmanti sayaṁ datvā.
2342 Cīvaraṁ nāma channaṁ cīvarānaṁ aññataraṁ cīvaraṁ, vikappanupagaṁ pacchimaṁ.
2343 Kupito anattamanoti anabhiraddho āhatacitto khilajāto.
2344 Acchindeyyāti sayaṁ acchindati, nissaggiyaṁ pācittiyaṁ[351].
2345 Acchindāpeyyāti aññaṁ āṇāpeti, āpatti dukkaṭassa. Sakiṁ āṇatto bahukampi acchindati, nissaggiyaṁ hoti. Nissajjitabbaṁ saṁghassa vā gaṇassa vā puggalassa vā. Evañca pana, bhikkhave, nissajjitabbaṁ…pe… “idaṁ me, bhante, cīvaraṁ bhikkhussa sāmaṁ datvā acchinnaṁ nissaggiyaṁ imāhaṁ saṁghassa nissajjāmī”ti…pe… dadeyyāti…pe… dadeyyunti…pe… āyasmato dammīti.
634. 2346 Upasampanne upasampannasaññī cīvaraṁ datvā kupito anattamano acchindati vā acchindāpeti vā, nissaggiyaṁ pācittiyaṁ. Upasampanne vematiko cīvaraṁ datvā kupito anattamano acchindati vā acchindāpeti vā, nissaggiyaṁ pācittiyaṁ. Upasampanne anupasampannasaññī cīvaraṁ datvā kupito anattamano acchindati vā acchindāpeti vā, nissaggiyaṁ pācittiyaṁ.
2347 Aññaṁ parikkhāraṁ datvā kupito anattamano acchindati vā acchindāpeti vā, āpatti dukkaṭassa. Anupasampannassa cīvaraṁ vā aññaṁ vā parikkhāraṁ datvā kupito anattamano acchindati vā acchindāpeti vā, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
635. 2348 Anāpatti— so vā deti, tassa vā vissasanto gaṇhāti, ummattakassa, ādikammikassāti.
2349 Cīvaraacchindanasikkhāpadaṁ niṭṭhitaṁ pañcamaṁ.
- pācittiyaṁ: nissaggiyaṁ hoti (syā1-3) (Word Variant) ↩