4.1 Bhaddākāpilānītherīgāthā

63.

103 “Putto buddhassa dāyādo,

kassapo susamāhito;

Pubbenivāsaṃ yovedi,

saggāpāyañca passati.

64.

104 Atho jātikkhayaṃ patto,

abhiññāvosito muni;

Etāhi tīhi vijjāhi,

tevijjo hoti brāhmaṇo.

65.

105 Tatheva bhaddā kāpilānī,

tevijjā maccuhāyinī;

Dhāreti antimaṃ dehaṃ,

jetvā māraṃ savāhiniṃ.

66.

106 Disvā ādīnavaṃ loke,

ubho pabbajitā mayaṃ;

Tyamha khīṇāsavā dantā,

sītibhūtamha nibbutā”ti.

107 … Bhaddā kāpilānī therī… .

108 Catukkanipāto niṭṭhito.