8.10 Dutiyadabbasutta

Pāṭaligāmiyavagga

Dutiyadabbasutta

80. 753 Evaṃ me sutaṃ— ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi— “bhikkhavo”ti. “Bhadante”ti te bhikkhū bhagavato paccassosuṃ. Bhagavā etadavoca—

754 “Dabbassa, bhikkhave, mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi. Seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi; evamevaṃ kho, bhikkhave, dabbassa mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masī”ti.

755 Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi—

756 “Ayoghanahatasseva,

jalato jātavedaso;

Anupubbūpasantassa,

yathā na ñāyate gati. (94)

757 Evaṃ sammāvimuttānaṃ,

kāmabandhoghatārinaṃ;

Paññāpetuṃ gati natthi,

pattānaṃ acalaṃ sukhan”ti. (95)

758 Dasamaṃ.

759 Pāṭaligāmiyavaggo aṭṭhamo.

760 Tassuddānaṃ

761 Nibbānā caturo vuttā,

cundo pāṭaligāmiyā;

Dvidhāpatho visākhā ca,

dabbena saha te dasāti.

762 Udāne vaggānamuddānaṃ

763 Vaggamidaṃ paṭhamaṃ varabodhi,

Vaggamidaṃ dutiyaṃ mucalindo;

Nandakavaggavaro tatiyo tu,

Meghiyavaggavaro ca catuttho.

764 Pañcamavaggavarantidha soṇo,

Chaṭṭhamavaggavaranti jaccandho;

Sattamavaggavaranti ca cūḷo,

Pāṭaligāmiyamaṭṭhamavaggo.

765 Asītimanūnakasuttavaraṃ,

Vaggamidaṭṭhakaṃ suvibhattaṃ;

Dassitaṃ cakkhumatā vimalena,

Addhā hi taṃ udānamitīdamāhu.

766 Udānapāḷi niṭṭhitā.