Uragavagga
Munisutta
209. 240 [126] Santhavāto bhayaṁ jātaṁ,
niketā jāyate rajo;
Aniketamasanthavaṁ,
etaṁ ve munidassanaṁ. (1) [127]
210. 241 Yo jātamucchijja na ropayeyya,
Jāyantamassa nānuppavecche;
Tamāhu ekaṁ muninaṁ carantaṁ,
Addakkhi so santipadaṁ mahesi. (2)
211. 242 Saṅkhāya vatthūni pamāya[128] bījaṁ,
Sinehamassa nānuppavecche;
Sa ve munī jātikhayantadassī,
Takkaṁ pahāya na upeti saṅkhaṁ. (3)
212. 243 Aññāya sabbāni nivesanāni,
Anikāmayaṁ aññatarampi tesaṁ;
Sa ve munī vītagedho agiddho,
Nāyūhatī pāragato hi hoti. (4)
213. 244 Sabbābhibhuṁ sabbaviduṁ sumedhaṁ,
Sabbesu dhammesu anūpalittaṁ;
Sabbañjahaṁ taṇhakkhaye vimuttaṁ,
Taṁ vāpi dhīrā muni[129] vedayanti. (5)
214. 245 Paññābalaṁ sīlavatūpapannaṁ,
Samāhitaṁ jhānarataṁ satīmaṁ;
Saṅgā pamuttaṁ akhilaṁ anāsavaṁ,
Taṁ vāpi dhīrā muni vedayanti. (6)
215. 246 Ekaṁ carantaṁ munimappamattaṁ,
Nindāpasaṁsāsu avedhamānaṁ;
Sīhaṁva saddesu asantasantaṁ,
Vātaṁva jālamhi asajjamānaṁ;
Padmaṁva toyena alippamānaṁ[131],
Netāramaññesamanaññaneyyaṁ;
Taṁ vāpi dhīrā muni vedayanti. (7) [130]
216. 247 Yo ogahaṇe thambhorivābhijāyati,
Yasmiṁ pare vācāpariyantaṁ[132] vadanti;
Taṁ vītarāgaṁ susamāhitindriyaṁ,
Taṁ vāpi dhīrā muni vedayanti. (8)
217. 248 Yo ve ṭhitatto tasaraṁva ujju,
Jigucchati kammehi pāpakehi;
Vīmaṁsamāno visamaṁ samañca,
Taṁ vāpi dhīrā muni vedayanti. (9)
218. 249 Yo saññatatto na karoti pāpaṁ,
Daharo majjhimo ca muni[133] yatatto;
Arosaneyyo na so roseti[134] kañci,
Taṁ vāpi dhīrā muni vedayanti. (10)
219. 250 Yadaggato majjhato sesato vā,
Piṇḍaṁ labhetha paradattūpajīvī;
Nālaṁ thutuṁ nopi nipaccavādī,
Taṁ vāpi dhīrā muni vedayanti. (11)
220. 251 Muniṁ carantaṁ virataṁ methunasmā,
Yo yobbane nopanibajjhate kvaci;
Madappamādā virataṁ vippamuttaṁ,
Taṁ vāpi dhīrā muni vedayanti. (12)
221. 252 Aññāya lokaṁ paramatthadassiṁ,
Oghaṁ samuddaṁ atitariya tādiṁ;
Taṁ chinnaganthaṁ asitaṁ anāsavaṁ,
Taṁ vāpi dhīrā muni vedayanti. (13)
222. 253 Asamā ubho dūravihāravuttino,
Gihī dāraposī amamo ca subbato;
Parapāṇarodhāya gihī asaññato,
Niccaṁ munī rakkhati pāṇine[136] yato. (14) [135]
223. 254 Sikhī yathā nīlagīvo[137] vihaṅgamo,
Haṁsassa nopeti javaṁ kudācanaṁ;
Evaṁ gihī nānukaroti bhikkhuno,
Munino vivittassa vanamhi jhāyatoti. (15)
255 Munisuttaṁ dvādasamaṁ.
256 Uragavaggo paṭhamo.
257
258 Urago dhaniyo ceva,
visāṇañca tathā kasi;
Cundo parābhavo ceva,
vasalo mettabhāvanā.
259 Sātāgiro āḷavako,
Vijayo ca tathā muni;
Dvādasetāni suttāni,
Uragavaggoti vuccatīti.
- 28Mi:942, 28Mi:1673 (Cross Reference) ↩
- Santhavāto: sandhavato (ka-ma) (Word Variant) ↩
- pamāya: pahāya (sī, ka-ma), samāya (katthaci) pa + mī + tvā = pamāya, yathā (Word Variant) ↩
- muni: muniṁ (sī, pā1) (Word Variant) ↩
- Padmaṁva: padumaṁva (sī, syā1-3, pā1) (Word Variant) ↩
- alippamānaṁ: alimpamānaṁ (syā1-3, ka-ma) (Word Variant) ↩
- vācāpariyantaṁ: vācaṁ pariyantaṁ (ka-ma) (Word Variant) ↩
- muni: daharo ca majjhimo ca munī (sī), daharo ca majjho ca munī (syā1-3, kaṃ, pā1) (Word Variant) ↩
- roseti: so na roseti (sī, pā1), na roseti (syā1-3) (Word Variant) ↩
- Gihī: gihi (ka-ma) (Word Variant) ↩
- pāṇine: pāṇino (sī) (Word Variant) ↩
- nīlagīvo: nīlagivo (syā1-3) (Word Variant) ↩