3.1.5 Paṭhamaesanāsutta

Tikanipāta

Paṭhamavagga

Paṭhamaesanāsutta

54. 350 Vuttañhetaṃ bhagavatā vuttamarahatāti me sutaṃ—

351 “Tisso imā, bhikkhave, esanā. Katamā tisso? Kāmesanā, bhavesanā, brahmacariyesanā— imā kho, bhikkhave, tisso esanā”ti. Etamatthaṃ bhagavā avoca. Tatthetaṃ iti vuccati—

352 “Samāhito sampajāno,

sato buddhassa sāvako;

Esanā ca pajānāti,

esanānañca sambhavaṃ.

353 Yattha cetā nirujjhanti,

maggañca khayagāminaṃ;

Esanānaṃ khayā bhikkhu,

nicchāto parinibbuto”ti.

354 Ayampi attho vutto bhagavatā, iti me sutanti.

355 Pañcamaṃ.