1.4.7 Sappurisadānasutta

Paṭhamapaṇṇāsaka

Dānavagga

Sappurisadānasutta

37. 355 “Aṭṭhimāni, bhikkhave, sappurisadānāni. Katamāni aṭṭha? Suciṃ deti, paṇītaṃ deti, kālena deti, kappiyaṃ deti, viceyya deti, abhiṇhaṃ deti, dadaṃ cittaṃ pasādeti, datvā attamano hoti. Imāni kho, bhikkhave, aṭṭha sappurisadānānīti.

356 Suciṃ paṇītaṃ kālena,

kappiyaṃ pānabhojanaṃ;

Abhiṇhaṃ dadāti dānaṃ,

sukhettesu brahmacārisu.

357 Neva vippaṭisārissa,

cajitvā āmisaṃ bahuṃ;

Evaṃ dinnāni dānāni,

vaṇṇayanti vipassino.

358 Evaṃ yajitvā medhāvī,

saddho muttena cetasā;

Abyābajjhaṃ sukhaṃ lokaṃ,

paṇḍito upapajjatī”ti.

359 Sattamaṃ.