Catutthapaṇṇāsaka

Upāsakavagga

Gihisutta

179. 1036 Atha kho anāthapiṇḍiko gahapati pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Atha kho bhagavā āyasmantaṃ sāriputtaṃ āmantesi—  “yaṃ kañci, sāriputta, jāneyyātha gihiṃ odātavasanaṃ pañcasu sikkhāpadesu saṃvutakammantaṃ catunnaṃ ābhicetasikānaṃ diṭṭhadhammasukhavihārānaṃ nikāmalābhiṃ akicchalābhiṃ akasiralābhiṃ, so ākaṅkhamāno attanāva attānaṃ byākareyya—  ‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’ti.

1037 Katamesu pañcasu sikkhāpadesu saṃvutakammanto hoti? Idha, sāriputta, ariyasāvako pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti. Imesu pañcasu sikkhāpadesu saṃvutakammanto hoti.

1038 Katamesaṃ catunnaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī? Idha, sāriputta, ariyasāvako buddhe aveccappasādena samannāgato hoti—  ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṃ buddho bhagavā’ti. Ayamassa paṭhamo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.

1039 Puna caparaṃ, sāriputta, ariyasāvako dhamme aveccappasādena samannāgato hoti—  ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti. Ayamassa dutiyo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.

1040 Puna caparaṃ, sāriputta, ariyasāvako saṃghe aveccappasādena samannāgato hoti—  ‘suppaṭipanno bhagavato sāvakasaṃgho ujuppaṭipanno bhagavato sāvakasaṃgho ñāyappaṭipanno bhagavato sāvakasaṃgho sāmīcippaṭipanno bhagavato sāvakasaṃgho, yadidaṃ cattāri purisayugāni aṭṭha purisapuggalā esa bhagavato sāvakasaṃgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā’ti. Ayamassa tatiyo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.

1041 Puna caparaṃ, sāriputta, ariyasāvako ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṃvattanikehi. Ayamassa catuttho ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya. Imesaṃ catunnaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī.

1042 Yaṃ kañci, sāriputta, jāneyyātha gihiṃ odātavasanaṃ—  imesu pañcasu sikkhāpadesu saṃvutakammantaṃ, imesañca catunnaṃ ābhicetasikānaṃ diṭṭhadhammasukhavihārānaṃ nikāmalābhiṃ akicchalābhiṃ akasiralābhiṃ, so ākaṅkhamāno attanāva attānaṃ byākareyya—  ‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’ti.

1043 Nirayesu bhayaṃ disvā,

pāpāni parivajjaye;

Ariyadhammaṃ samādāya,

paṇḍito parivajjaye.

1044 Na hiṃse pāṇabhūtāni,

vijjamāne parakkame;

Musā ca na bhaṇe jānaṃ,

adinnaṃ na parāmase.

1045 Sehi dārehi santuṭṭho,

paradārañca ārame;

Merayaṃ vāruṇiṃ jantu,

na pive cittamohaniṃ.

1046 Anussareyya sambuddhaṃ,

dhammañcānuvitakkaye;

Abyāpajjaṃ hitaṃ cittaṃ,

devalokāya bhāvaye.

1047 Upaṭṭhite deyyadhamme,

puññatthassa jigīsato;

Santesu paṭhamaṃ dinnā,

vipulā hoti dakkhiṇā.

1048 Santo have pavakkhāmi,

sāriputta suṇohi me;

Iti kaṇhāsu setāsu,

rohiṇīsu harīsu vā.

1049 Kammāsāsu sarūpāsu,

gosu pārevatāsu vā;

Yāsu kāsuci etāsu,

danto jāyati puṅgavo.

1050 Dhorayho balasampanno,

kalyāṇajavanikkamo;

Tameva bhāre yuñjanti,

nāssa vaṇṇaṃ parikkhare.

1051 Evamevaṃ manussesu,

yasmiṃ kismiñci jātiye;

Khattiye brāhmaṇe vesse,

sudde caṇḍālapukkuse.

1052 Yāsu kāsuci etāsu,

danto jāyati subbato;

Dhammaṭṭho sīlasampanno,

saccavādī hirīmano.

1053 Pahīnajātimaraṇo,

brahmacariyassa kevalī;

Pannabhāro visaṃyutto,

katakicco anāsavo.

1054 Pāragū sabbadhammānaṃ,

anupādāya nibbuto;

Tasmiñca viraje khette,

vipulā hoti dakkhiṇā.

1055 Bālā ca avijānantā,

dummedhā assutāvino;

Bahiddhā dadanti dānāni,

na hi sante upāsare.

1056 Ye ca sante upāsanti,

sappaññe dhīrasammate;

Saddhā ca nesaṃ sugate,

mūlajātā patiṭṭhitā.

1057 Devalokañca te yanti,

kule vā idha jāyare;

Anupubbena nibbānaṃ,

adhigacchanti paṇḍitā”ti.

1058 Navamaṃ.