9.2.33 Parāyanasutta

Asaṅkhatasaṃyutta

Dutiyavagga

Parāyanasutta

409. 1741 “Parāyanañca vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo— idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī”ti. (Yathā asaṅkhataṃ tathā vitthāretabbaṃ.) (33)

1742 Tettiṃsatimaṃ.

1743 Dutiyo vaggo.

1744 Tassuddānaṃ

1745 Asaṅkhataṃ anataṃ anāsavaṃ,

Saccañca pāraṃ nipuṇaṃ sududdasaṃ;

Ajajjaraṃ dhuvaṃ apalokitaṃ,

Anidassanaṃ nippapañca santaṃ.

1746 Amataṃ paṇītañca sivañca khemaṃ,

Taṇhākkhayo acchariyañca abbhutaṃ;

Anītikaṃ anītikadhammaṃ,

Nibbānametaṃ sugatena desitaṃ.

1747 Abyābajjho virāgo ca,

suddhi mutti anālayo;

Dīpo leṇañca tāṇañca,

saraṇañca parāyananti.

1748 Asaṅkhatasaṃyuttaṃ samattaṃ.