13.1.55 Sātaccamūlakasappāyakārīsutta

Jhānasaṃyutta

Jhānavagga

Sātaccamūlakasappāyakārīsutta

716. 1349 Sāvatthinidānaṃ. “Cattārome, bhikkhave, jhāyī. Katame cattāro? Idha, bhikkhave, ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā”ti. Idamavoca bhagavā. Attamanā te bhikkhū bhagavato bhāsitaṃ abhinandunti.

1350 Pañcapaññāsamaṃ.

1351 (Yathā pañcapaññāsaṃ veyyākaraṇāni honti tathā vitthāretabbāni.)

1352 Khandhavaggo tatiyo.

1353 Tassuddānaṃ

1354 Samādhi samāpatti ṭhiti ca,

Vuṭṭhānaṃ kallitārammaṇena ca;

Gocarā abhinīhāro sakkacca,

Sātacca athopi sappāyanti.

1355 Jhānasaṃyuttaṃ samattaṃ.

1356 Tassuddānaṃ

1357 Khandha rādhasaṃyuttañca,

diṭṭhiokkanta uppādā;

Kilesa sāriputtā ca,

nāgā supaṇṇa gandhabbā;

Valāha vacchajhānanti,

khandhavaggamhi terasāti.

1358 Khandhavaggasaṃyuttapāḷi niṭṭhitā.