10.1.12 Sahāyakasutta

Bhikkhusaṃyutta

Bhikkhuvagga

Sahāyakasutta

246. 1307 Sāvatthiyaṃ viharati. Atha kho dve bhikkhū sahāyakā āyasmato mahākappinassa saddhivihārino yena bhagavā tenupasaṅkamiṃsu. Addasā kho bhagavā te bhikkhū dūratova āgacchante. Disvāna bhikkhū āmantesi— “passatha no tumhe, bhikkhave, ete bhikkhū sahāyake āgacchante kappinassa saddhivihārino”ti? “Evaṃ, bhante”. “Ete kho te bhikkhū mahiddhikā mahānubhāvā. Na ca sā samāpatti sulabharūpā, yā tehi bhikkhūhi asamāpannapubbā. Yassa catthāya kulaputtā sammadeva agārasmā anagāriyaṃ pabbajanti tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharantī”ti.

1308 Idamavoca bhagavā. Idaṃ vatvāna sugato athāparaṃ etadavoca satthā—

1309 “Sahāyāvatime bhikkhū,

cirarattaṃ sametikā;

Sameti nesaṃ saddhammo,

dhamme buddhappavedite.

1310 Suvinītā kappinena,

dhamme ariyappavedite;

Dhārenti antimaṃ dehaṃ,

jetvā māraṃ savāhinin”ti.

1311 Dvādasamaṃ.

1312 Bhikkhuvaggo paṭhamo.

1313 Tassuddānaṃ

1314 Kolito upatisso ca,

ghaṭo cāpi pavuccati;

Navo sujāto bhaddi ca,

visākho nando tisso ca;

Theranāmo ca kappino,

sahāyena ca dvādasāti.

1315 Bhikkhusaṃyuttaṃ samattaṃ.

1316 Nidānavaggo dutiyo.

1317 Tassuddānaṃ

1318 Nidānābhisamayadhātu,

anamataggena kassapaṃ;

Sakkārarāhulalakkhaṇo,

opammabhikkhunā vaggo.

1319 Dutiyo tena pavuccatīti.

1320 Nidānavaggasaṃyuttapāḷi niṭṭhitā.