1.1.10 Araññasutta

10. 31 Sāvatthinidānaṃ. Ekamantaṃ ṭhitā kho sā devatā bhagavantaṃ gāthāya ajjhabhāsi—

32 “Araññe viharantānaṃ,

santānaṃ brahmacārinaṃ;

Ekabhattaṃ bhuñjamānānaṃ,

kena vaṇṇo pasīdatī”ti.

33 “Atītaṃ nānusocanti,

nappajappanti nāgataṃ;

Paccuppannena yāpenti,

tena vaṇṇo pasīdati.

34 Anāgatappajappāya,

atītassānusocanā;

Etena bālā sussanti,

naḷova harito luto”ti.

35 Naḷavaggo paṭhamo.

36 Tassuddānaṃ

37 Oghaṃ nimokkhaṃ upaneyyaṃ,

Accenti katichindi ca;

Jāgaraṃ appaṭividitā,

Susammuṭṭhā mānakāminā;

Araññe dasamo vutto,

Vaggo tena pavuccati.